Ileta Ọrukaro ra ya Vwe Itu i Kọrint
13 Orhianẹ mia djẹ edjadjẹ ituakpọ ọrhẹ edjadjẹ emakashe, ọrẹn mie vwo ẹgwọlọ-ọ, nọyẹ mi họhọ ugege re kporo yanghene simba* ra ha ze owuowọnwan. 2 Mi rhe vwo ẹghẹlẹ aruẹmẹrẹn ọrhẹ omẹgbanhon mi ne vwẹruọ odjahen ọfuanfon na ephian kugbe irherhe na ephian, mi rhe ji vwo esegburhomẹmro mi ne ghwie igbenu, ọrẹn mie vwo ẹgwọlọ-ọ, nọyẹ mie fiemru-u. 3 Mi rhe tiobọnu enyerẹn mẹ ephian ha ghẹrẹ awọrọ, mi rha ji yenyan fọkime mi ha ugboma mẹ kpahontọre, ọrẹn mie vwo ẹgwọlọ-ọ, nọyẹ mia mẹrẹn erere owuorowu-u.
4 Ẹgwọlọ o vwo erhionrin ọrhẹ uruemru esiri. Ẹgwọlọ ọ vwọ rioma-a. Ọ vwọ yenya-an, ọ vwọ kparoma-a. 5 O vwo ruẹ yanghan yangha-an,* ọ vwọ gwọlọ ọdamẹ omobọ ye ọvo-o, ọ vwọ tuekwẹre-e. Ọ vwọ ji sẹrorẹ eghrẹn* rhẹ ẹhẹ-ẹn. 6 Ọ vwọ ghọghọ fọkiẹ obiobiomu-u, ukpomaran ọ ghọghọ fọkiẹ urhomẹmro na. 7 O zinrin kemru kemru, o vwo imwẹro kpahen kemru kemru, o fiẹrorhọ i kemru kemru, o vwo edirin i kemru kemru.
8 Ẹgwọlọ o vwo sefughwẹ-ẹ. Ọrẹn, orhianẹ o vwo ẹghẹlẹ aruẹmẹrẹn, ana haye toba. Orho vwo edjadjẹ* sansan, aye ina dobọji, orho vwo irherhe, ana haye toba. 9 Fọkime irherhe ame ọ gba-a, aruẹmẹrẹn ame ọ ji gba-a. 10 Ọrẹn, oborẹ ọgbare na ọrhọ rhe, oborẹ ọ vwọ gba na no no notọre. 11 Ọke mia ha ọmọvwerhe, mia tẹmro jerẹ ọmọvwerhe, mie roro jerẹ ọmọvwerhe, mie vwẹruọ emru jerẹ ọmọvwerhe. Ọrẹn, vwana mie rhiẹ omirẹghwa ne na, ni mi tiobọnu iruemru ọmọvwerhe. 12 Vwana, ọwan a ha ujegbe uteru mẹrẹn ekwakwa bisi bisi. Ọrẹn ọke ọrana, ana dabu mẹrẹn ekwakwa fiotọre. Ọke ọnana, irherhe mi vwori ọ ji gba-a, ọrẹn ọke ọrana, irherhe mẹ nọ nọ gba jerẹ oborẹ Osolobrugwẹ ọ dabu rhe mẹ fiotọre. 13 Ọrẹn vwana, ekwakwa esa enana yi na hẹrhẹ: esegburhomẹmro, ifiẹrorhọ ọrhẹ ẹgwọlọ, ọrẹn ọrọ maido usuẹn aye yẹ ẹgwọlọ.