Ewian Inyikọ na
8 Harẹn i Sọl, o ji kwerhọ ye ne kpe i Stivin hwu.
Uvuẹn ẹdẹ ọrana, na kparehaso ukoko rọ ha i Jerusalẹm omamọ. Ọsoso imizu na ni hrabọ lele ekogho i Judia ọrhẹ Sameria, jokpanẹ inyikọ na ọvo. 2 Ọrẹn, ehworhare ezẹko ra zofẹn Osolobrugwẹ ni kpare orinmi Stivin ye sion, aye ni ji mwuomarhọ omamọ fọkiẹ i Stivin. 3 Ọrẹn, Sọl nọ kparehaso ukoko na omamọ. No kpe ruẹ oghwa owu riẹ ọrọrọ ji kpolo ehworhare ọrhẹ emẹse ruẹ otafe, no ji fiẹ aye rhẹ ekanron.
4 Ọrẹn, imizu ri hrabọ lele ekete ephian na, ne ghwoghwo iyẹnrẹn esiri ẹmro Osolobrugwẹ uvuẹn ọsoso otọre na. 5 Filip no riẹ amwa* i Sameria, no ghwoghwo rẹn ihworho kpahen i Kristi na. 6 Ihworho buebun na dabu kpomaviẹ rẹn oborẹ i Filip ọ ta, aye na kerhọ ye ji mẹrẹn ekwakwa igbevwunu ro ruẹ. 7 Habaye, o vwo ihworho buebun rẹ ikpodje i ha oma aye. Ikpodje na ne kperẹ phia gbangbanhon orho le aye nẹ oma ihworho na. O ji simi ihworho ugboma aye i hwuru ọrhẹ ikpolo. 8 Omarana, ihworho ri ha uvuẹn amwa ọrana na ghọghọ omamọ.
9 Vwana, o vwo ọhworhare owu re se i Saimọn ro ruẹ irueruo imajiki uvuẹn amwa ọrana avwẹdẹrhe, irueruo yi no gbe ọsoso agbamwa i Sameria unu, nọ ji ta taghene ọye ọkpẹ ohworho. 10 Ihworho na ephian, te emọvwerhe ọrhẹ imirẹghwa, na kpomaviẹ riẹn ji ta: “Ọhworhare ọnana yẹ Omẹgbanhon Osolobrugwẹ, re se Ọrode.” 11 Omarana, aye na dabu kerhọ ye fọkime o jiri ne ibiesuọn rẹ irueruo imajiki enẹyen o gbe aye unu. 12 Ọrẹn, ọke aye e vwo imwẹro kpahen i Filip ro ghwoghwo kpahen iyẹnrẹn esiri Uvie Osolobrugwẹ ọrhẹ odẹ i Jesu Kristi, ehworhare ọrhẹ emẹse ne bromarhame. 13 Saimọn dede no mo rhiẹ odibo i Kristi. Ọke ro bromarhame hin, no leli Filip ọke ephian. Ọke rọ mẹrẹn eka ọrhẹ ewian igbevwunu ra phia, no gberie unu omamọ.
14 Ọke inyikọ ri ha i Jerusalẹm e rhon taghene ihworho i Sameria i rhiabọ dede ẹmro Osolobrugwẹ ne, aye ni dje i Pita ọrhẹ i Jọn bru aye. 15 Aye ni nyarhẹn ya nẹrhomo rẹn aye, nẹ aye i sabu vwo ẹhẹn ọfuanfon na. 16 Fọkime o vwo ohworho owuorowu usuẹn aye ro vwo ẹhẹn ọfuanfon na ne-e, ukpomaran aye i ghwai bromarhame uvuẹn odẹ Ọrovwori Jesu ọvo. 17 Omarana, inyikọ awanva na ni ha abọ kpahen aye, ẹhẹn ọfuanfon na nọ ruẹ oma aye.
18 Vwana, ọke i Saimọn ọ mẹriẹn taghene ẹhẹn ọfuanfon na ọ ruẹ oma ihworho na ọke inyikọ na i rha ha abọ kpahen aye, nọ gwọlọ yẹ aye igho, 19 nọ tare: “Are i ji yẹ mẹ omẹgbanhon ọnana, neneyo ẹhẹn ọfuanfon na ọ sabu ruẹ oma i kohworho kohworho mi ha abọ mẹ kpahen.” 20 Ọrẹn, Pita nọ ta riẹn: “Wẹwẹ ọrhẹ idọlọ efuanfon enọ ina ghwọghọ fughwẹ, fọkime we roro taghene wu na sabu ha igho dẹ ẹghẹlẹ ọphẹ Osolobrugwẹ. 21 O vwo oborẹ o teruo uvuẹn ẹmro ọnana-a, fọkime ọmuduo ọ phiọn uvuẹn obaro Osolobrugwẹ-ẹ. 22 Omarana, gba ghwẹriẹ nẹ irueruo ọkon ọnana ji rẹ i Jehova* sẹ ọnọ sabu harhomuo, fọkiẹ irorẹdjẹ ọkon rọ ha ọmuduo na. 23 Fọkime mie nie taghene wu vwo ọmudu ọvwiavwia,* wẹwẹ jẹ ọvrẹn rẹn irueruo ọsọsọ.” 24 Omarana, Saimọn nọ ta rẹn aye: “Are i leli mẹ rẹ i Jehova,* neneyo ọsoso ekwakwa are i tare na i ja rha phia mẹ.”
25 Omarana, ọke aye a dabu se oseri ji ghwoghwo ẹmro i Jehova* hin, aye ni ghwẹrioma riẹ i Jerusalẹm. Ọke aye a nyarhẹn, aye ne ghwoghwo iyẹnrẹn esiri na uvuẹn ọko i Sameria buebun.
26 Ọrẹn, ọmakashe i Jehova* nọ ta rẹn i Filip taghene: “Vẹnrẹn riẹ izede ro nẹ i Jerusalẹm riẹ i Gaza, rọ ha obọrẹ o riotọre na.” (Ọnana izede ato.) 27 Omarana, no vẹnrẹnren ji nyarhẹn. Nughe! nọ mẹrẹn onyẹ Itiopia owu ro vwo ẹrhẹ ọduado,* ro ji vwo omẹgbanhon uvuẹn otọre usun i Kandesi ro rhiẹ orodje ọmase Itiopia. Ọhworhare na yọ hẹrote ọsoso efe ọmase na, o ji riẹ i Jerusalẹm ya ga ogame bi. 28 Ọke ro siyẹ okalokpọ owọnren ọnẹyen rọ ghwẹrioma rie, no se eyaya ọmẹraro Aizaya phia gorigori. 29 Omarana, ẹhẹn ọfuanfon na nọ ta rẹn i Filip: “Bru okalokpọ owọnren ọnana nya.” 30 Omarana, Filip nọ zẹ lele okalokpọ owọnren na ji rhon ọhworhare na ro se ọbe ọmẹraro Aizaya, nọ nọriẹn: “Wu ghini vwẹruọ oborẹ we se na?” 31 Nọ kpahenrhọ riẹn: “Marhẹ mi ne ru vwẹruọ ye orhianẹ ohworho ọ ha userhumu mẹ-ẹ?” Omarana, nọ ta rẹn i Filip nọ ruẹ okalokpọ owọnren na me lelie siyẹ. 32 Vwana, ọnana yẹ ekete eyaya ọfuanfon na rẹ ọhworhare na o se: “A kpareriẹ riẹ ekete re ne kpe yi jerẹ ogegede. Habaye, jerẹ ọmogegede rọ fọre gbien uvuẹn obaro ohworho rọ gwọlọ bọnrọn ẹtuiẹn, ọ vwọ ji kpahẹnmro owuorowu-u. 33 Uvwrọke ra phọphiẹ, e brorhiẹn ọsoso hariẹ-ẹn. Ọrọmo yọ nọ dabu ta kpahen uvwiẹ ro nurhe fiotọre? Fọkime e kperie hwu nẹ otọrakpọ na ne.”
34 Onyẹ Itiopia na nọ nọ i Filip: “Biko, ọrọmo yẹ ọmẹraro na ọ ta kpahan? Ọ ta kpahen omayen gbinẹ ohworho ọrọrọ?” 35 Filip nọ tuẹn ẹmro ẹta rhọ, nọ ji ha ekete eyaya ọfuanfon ọnana ghwoghwo iyẹnrẹn esiri ro sekpahen i Jesu hariẹn. 36 Vwana, ọke aye a nyarhẹn uvuẹn izede, aye ni te ekete owu rẹ ame ọ havwọ, ọhworhare na nọ tare: “Nughe! Ame ọ ha aran, me yọ nọ da mẹ obọ ji ni mi je rhe bromarhame?” 37* —— 38 Omarana, ọhworhare na nọ ta rẹn ọrọ ghwa okalokpọ owọnren na nọ domaji. Filip ọrhẹ ọhworhare na ni ruẹ uvuẹn ame na, no brurie rhẹ ame. 39 Ọke aye e nẹ uvuẹn ame na rhe, ẹhẹn ọfuanfon i Jehova* no suẹn i Filip riẹ ekete ọrọrọ ogege, ọhworhare na ọrhọ mẹriẹn ghwomara-an. Ọrẹn, ọye nọ ghwẹrioma rie rhẹ aghọghọ. 40 Filip nọ mẹrẹn omayen uvuẹn Ashdọd, nọ nya uvwre okogho ọrana ji ghwoghwo iyẹnrẹn esiri na uvuẹn ọsoso emwa na bọmọke o ki te i Sẹseria.