Ewian Inyikọ na
7 Ọrẹn, orherẹn ọduado na nọ nọriẹn: “Oborẹ aye a ta na urhomẹmro?” 2 Stivin nọ kpahenrhọ: “Imizu mẹ ọrhẹ esẹ mẹ, are i kerhọ. Osolobrugwẹ ro vwo odidi na ọ homaphia rẹn Ebraham ro rhiẹ ọsẹ ọwan rode ọke rọ ha i Mẹsopotemia, bọmọke o ki ye rhirhiẹ i Heran. 3 Nọ ta riẹn: ‘Vẹnrẹn nẹ otọre ọnọ ọrhẹ uvwre ihworho ekruon, ne wu riẹ otọre mi ne dje wẹn na.’ 4 Ọke oru, no nẹ otọre itu i Kaldia ye rhirhiẹ i Heran. Ọke ọsẹ ye o hwu hin, Osolobrugwẹ nọ ta riẹn no nẹ avwaye me rhirhiẹ otọre ọnana rẹ are e rhirhiẹ vwana. 5 Ọrẹn, ọ yẹ ye uku owuorowu uvuẹn otọre na-a, ọ tobọ vwo ibiẹ otọre ro no fiẹ oghwẹ rhọ-ọ. Ọrẹn, Osolobrugwẹ no vive riẹn taghene ọnọ ha otọre na riẹn ọrhẹ emọyen* nẹ aye i haye riuku, dedevwo ọke ọrana o ji vwiẹ ọmọ-ọ. 6 Habaye, Osolobrugwẹ nọ ta riẹn taghene emọyen* ine rhiẹ epha uvuẹn otọre ro vwo rhiẹ ọrẹ aye. Ihworho otọre ọrana ina ha aye ruẹ evrẹn ji ha oja riẹ aye ẹgbukpe 400. 7 Osolobrugwẹ nọ tare, ‘Ni mi na ha agbamwa ọrana rọ harẹ aye ruẹ evrẹn na guẹnzọn. Ekwakwa enana i rha vrẹn ne, aye ni ne nẹ abọ evrẹn ji ha ogame rọ fonron ha mẹ uvuẹn ekete ọnana.’
8 “Osolobrugwẹ no ji lelie riẹ ọphọ osamo. Ọke oru, Ebraham no vwiẹ Aizik ji samiẹ ọke ẹdọke ẹrẹnren a gba. Aizik no vwiẹ* i Jekọb, Jekọb nọ yo vwiẹ emọ ri rhiẹ urhomu ekrun 12 na. 9 Aye* na rioma kpahen omizu aye ro rhiẹ i Josẹf, aye ni rhẹriẹ rẹn itu Ijipt. Ọrẹn, Osolobrugwẹ ọrhẹ ọye i gba havwiẹ. 10 No simirien nẹ ikpokpogho yi ephian, nọ lẹrheriẹ vwo ekwerhọ i Fero ro rhiẹ orodje Ijipt ji lẹrhiẹ dje ẹghwanren phia uvuẹn obaruiẹ. Fero nọ hariẹ mwu no suẹn Ijipt ọrhẹ ọsoso oghwa ye. 11 Ọrẹn, orhọmo ọgbogbanhon nọ homaphia uvuẹn ọsoso Ijipt ọrhẹ i Kenan. Nọ suẹ ojẹriọ ọgbogbanhon, esẹ ọwan ride arha mẹrẹn emaren owuorowu re-e. 12 Ọrẹn, Jekọb no rhonrin taghene emaren ọ ha Ijipt, omarana no dje esẹ ọwan ride nyarhẹn ọke ukaro. 13 Ọke ro dje aye nyarhẹn ọgbọreva ye, Josẹf no dje omayen rẹn imizie. Ọke oru, Fero no mo rhe ekrun i Josẹf. 14 Omarana, Josẹf no dje urhomu vwe ọsẹ ye ro rhiẹ i Jekọb ọrhẹ ọsoso ekruien, nẹ aye i nẹ ekete ọrana rhe, ọsoso aye awan 75. 15 Omarana, Jekọb no riẹ Ijipt, no ji hwu rhẹ oboran, omaran ji te esẹ ọwan ride. 16 Na kpare isuaso aye riẹ i Shikẹm ye sin rhẹ uvuẹn usin rẹ Ebraham ọ ha idọlọ efuanfon dẹ mie emọ i Hemọ uvuẹn i Shikẹm.
17 “Ọke Osolobrugwẹ ọnọ ha ive ro ve rẹn Ebraham te orugba ọ joma te ne, ihworho na ni bunrhọ omamọ uvuẹn Ijipt. 18 Ọke oru, na ha orodje ọrọrọ mwu no suẹn Ijipt, orodje ọnana o rhe i Josẹfu-u. 19 Orodje ọnana nọ djiroro ọkon kpahen ihworho ọwan, nọ ha oja riẹ esẹ ọwan ride ji lẹrhẹ aye sẹrerhumuji emọ aye eboban vwo, neneyo e kpe emọ na hwu. 20 Uvwrọke ọrana ye vwiẹ i Mosis, o vwo erhumu omamọ uvuẹn ukẹro Osolobrugwẹ. Na hẹrote yi ibiamo esa uvuẹn oghwa ọsẹ ye. 21 Ọrẹn, ọke ra sẹrerhumujie vwo, ọmọ ọgbọtọ i Fero nọ kpareriẹ ha ji mọriẹn ghwanren jerẹ ọmọyen. 22 Omarana, ne yoni Mosis kpahen ọsoso ẹghwanren itu Ijipt. Itiọrurhomẹmro, ẹmriẹn ọrhẹ irueruo yi i djephia taghene o vwo omẹgbanhon omamọ.
23 “Ọke ro te ẹgbukpe 40, no brorhiẹn rọ nọ kọn bru imizie ri rhiẹ emọ Izrẹl. 24 Ọke rọ mẹrẹn onyẹ Ijipt owu ro sehiẹn omizie, nọ chochọn omizie re sehiẹn na, nyoma ro kpe onyẹ Ijipt na hwu. 25 No roro taghene imizie ine vwẹruọ ye taghene Osolobrugwẹ ọ gwọlọ nyoma yen simi aye, ọrẹn aye e vwẹruọ ye omara-an. 26 Ẹdẹ ọreva ye ọke rọ mẹrẹn ihworho awanva ra wọnrọn, no bruru aye nya ji damoma rọ nọ kwaphiẹ ẹmro na rhọ, nọ ta rẹn aye: ‘Ọse, are imizu. Mesoriẹ are a wọnrọn oma are?’ 27 Ọrẹn ọro sehiẹn ọreva ye na, nọ mwa i Mosis ji nọ yen: ‘Ọrọmo yọ haruọ mwu osun ọrhẹ oguẹnzọn ame? 28 Gbinẹ wa gwọlọ kpe mẹ hwuẹ jerẹ oborẹ wu kpe onyẹ Ijipt na odẹrorieri na?’ 29 Ọke i Mosis o rhon ẹmro ọnana, nọ zẹ ye rhirhiẹ otọre i Midian jerẹ ọpha, avwaye yo vwiẹ emọyen ehworhare awanva.
30 “Ẹgbukpe 40 a vrẹn, ọmakashe nọ homaphia riẹn uvuẹn erhanren rọ bara uvuẹn orhan ivwẹn na uvuẹn ato ọrẹ Ugbenu i Sainai. 31 Oborẹ i Mosis ọ mẹrẹnren na no gberie unu. Ọrẹn, ọke rọ gwọlọ ye ni oborẹ ọ phia, no rhon uphele i Jehova* rọ tare: 32 “Mẹmẹ yẹ Osolobrugwẹ esọ ride, Osolobrugwẹ Ebraham ọrhẹ Aizik kugbe i Jekọb.’ Mosis nọ phariẹ, orho hinmi ye ni oborẹ ọ phia na-a. 33 Jehova* nọ ta riẹn: ‘Kuẹ isabatuọ nẹ aghwọ, fọkime ekete wu mevi na otọre ọfuanfon. 34 Itiọrurhomẹmro, mi mẹrẹn oborẹ e sehiẹn ihworho mẹ ri ha Ijipt ne, mi ji rhon oviẹ omemwurhọ aye ne. Omarana, ni mi rhe me simi aye. Vwana mọ, mi ne djo riẹ Ijipt.’ 35 Mosis ọnana rẹ aye i tenren taghene: ‘Ọrọmo yọ haruọ mwu osun ọrhẹ oguẹnzọn?’ yẹ Osolobrugwẹ o djeri nyoma ọmakashe rọ homaphia riẹn uvuẹn orhan ivwẹn na, no rhiẹ osun ọrhẹ ọro no simi aye. 36 Mosis no sunrun aye nẹ Ijipt ji ruẹ ekwakwa igbevwunu ọrhẹ eka sansan uvuẹn Ijipt, uvuẹn Urhie Ọbobare na ọrhẹ uvuẹn ato na ọsoso ẹgbukpe 40.
37 “Mosis yọ ta rẹn emọ Izrẹl taghene: ‘Osolobrugwẹ ọnọ ha ọmẹraro jerẹ omẹmẹ mwu rẹn are nẹ usuẹn imizu are.’ 38 Mosis ọnana ọrhẹ emọ Izrẹl na yi ha uvuẹn ato na, kugbe ọmakashe na rọ tẹmro riẹn uvuẹn Ugbenu i Sainai. Mosis nọ tẹmro rẹn esẹ ọwan ride. Nyoma yen yẹ Osolobrugwẹ o ji tiobọnu ẹmro ọfuanfon ọnẹyen ro nyerẹn na harẹn ọwan. 39 Esẹ ọwan ride e kwe huphele yi-i, ukpomaran aye ni djẹriẹ fughwẹ ji ghwẹrioma riẹ Ijipt uvuẹn ọmudu aye. 40 Aye ni ta rẹn Erọn: ‘Ma isolobrugwẹ rẹn ame ri ne suẹn ame. Fọkime ame e rhe oborẹ ọ phia rẹn i Mosis ọnana ro sunrun ame nẹ otọre Ijipt rhe na-a.’ 41 Omarana, aye ni ma oma ọmọ erhuẹn uvuẹn ẹdẹ erana ji ze izobo rẹn oma na, aye na riakpọ uvuẹn obaro oborẹ aye i ha abọ ma na. 42 Omarana, Osolobrugwẹ nọ sẹrerhumuji aye vwo ji nyaji aye vwo nẹ aye i ha ogame rẹn ekwakwa ri ha odjuwu na, jerẹ oborẹ a ya rhẹ uvuẹn ọbe Emẹraro na: ‘O oghwa Izrẹl, rhẹ omẹmẹ yẹ are i tiobọnu ẹghẹlẹ yanghene ze izobo riẹn uvwre ẹgbukpe 40 uvuẹn ato na-a. 43 Ukpomaran, are na kpare ibọkpọ i Molọk ọrhẹ ukereti osolobrugwẹ i Rifan. Are ni ma ema aye neneyo are i ga aye. Omarana, mi ne le are riẹ abọ evrẹn seseri vrẹn i Babilọn.’
44 “Esẹ ọwan ride i vwo ibọkpọ ọrẹ oseri na uvuẹn ato na, ọnana yẹ ibọkpọ Osolobrugwẹ o jurhi rẹn i Mosis nọ bọn lele udje rọ mẹrẹnren na. 45 Ọke oru, ne tiobọnu ibọkpọ ọnana rẹn esẹ ọwan ride, aye ọrhẹ i Joshua ni kpareriẹ ruẹ otọre egbamwa na rẹ Osolobrugwẹ o le ihworho aye nie fọkiẹ esẹ ọwan ride. Avwaye nọ yọ havwọ ye te ẹdẹ i Devid. 46 Devid no vwo ekwerhọ Osolobrugwẹ, nọ ji ta taghene ọ gwọlọ bọn oghwa rẹn Osolobrugwẹ i Jekọb. 47 Ọrẹn, Solomọn nọ yọ bọn oghwa na rẹn Osolobrugwẹ. 48 Itiọrurhomẹmro, Ọrọ Mai Rierun na o vwo rhirhiẹ eghwa rẹ ituakpọ i bọnre-en, jerẹ oborẹ ọmẹraro na ọ tare taghene: 49 ‘Odjuwu na yẹ aga usun mẹ, otọrakpọ na yẹ akaba mia kwruọ aghwẹ kpahan, omaran i Jehova* ọ tare. Aruẹ oghwa ọgo yẹ are ina bọn ha mẹ? Yanghene bọgo mi ne ronmoma? 50 Mẹmẹ yi ha abọ mẹ ma ekwakwa enana ephian, rhomaran?’
51 “Are ri rhiẹ iludu ọrhẹ ihworho ri vwa ha ọmudu ọrhẹ erhọ aye rhon ẹmro na,* ọke ephian yẹ are a kparahasuẹ ẹhẹn ọfuanfon na. Oborẹ esẹ are ride i ruru, yẹ are a ghwai ruẹ na. 52 Ọgo usuẹn emẹraro na yẹ esẹ are ride i vwa kparehaso? Aye i kpe ihworho ri ghwoghwo kpahen ẹrhiọ ohworho ọvwata na, are nọ yi rhẹriẹ jeghwai kpe yi hwu. 53 A nyoma emakashe tiobọnẹ Urhi na rẹn are, ọrẹn are i vwa nyalelie-e.”
54 Ọke aye e rhon ẹmro enana, aye na tuekwẹre gbangbanhon uvuẹn ọmudu aye, aye na riẹ ikanwun aye fọkiẹ i Stivin. 55 Ọrẹn, ẹhẹn ọfuanfon na nọ vuọn oma i Stivin, no ni odjuwu na ji kpararo mẹrẹn odidi Osolobrugwẹ ọrhẹ i Jesu ro mevi obọrhen Osolobrugwẹ. 56 Nọ tare: “Nughe! Mia mẹrẹn idjuwu na ri rhiefirhọ ọrhẹ Ọmọ onyakpọ na ro mevi obọrhen Osolobrugwẹ.” 57 Omarana, aye ni kperi phia rhẹ uphele gorigori ji ha abọ rhurhu erhọ aye, aye ephian ni họrhọ bruie. 58 Ọke aye a mwa yen riẹ otafe amwa na hin, aye ne fie. Iseri efian na ni kuẹ ewun otafe aye nu, ji haye kẹrẹ aghwẹ idama owu re se i Sọl. 59 Ọke aye e fiẹ i Stivin, nọ rẹ orẹ ọnana: “Ọrovwori Jesu, rhiabọ ha ẹhẹn mẹ.” 60 Ọke oru, no sighwẹ ji kperi phia rhẹ uphele gorigori taghene: “Jehova,* wu vwa mọrẹn ọdandan ọnana ba aye obọ-ọ.” Ọke rọ tẹmro ọnana hin, no hwuru.*