Ewian Inyikọ na
18 Ọke oru, Pọl no nẹ Atẹns riẹ i Kọrint. 2 Nọ mẹrẹn onyẹ i Ju owu re se Akwila ro rhiẹ ọmotọre i Pọntọs. Ọye ọrhẹ aniẹ re se i Prisila i nẹ Itali rhe obọ, fọkime Klọdiọs o jurhi taghene ọsoso itu i Ju na i nẹ i Rom. Omarana, no bruru aye nya. 3 Fọkime aye e ruẹ ibọkpọ, Pọl nọ daji oghwa aye ji lele aye wian, fọkime aruẹ owian owu yẹ aye a wian. 4 Pọl nọ ha ẹmro phia* uvuẹn i sinagọg na uvuẹn Ẹdẹ Omeronmo ephian, no ji wene iroro itu i Ju ọrhẹ itu i Grik nẹ aye i vwo imwẹro.
5 Ọke i Sailas ọrhẹ i Timoti e nẹ i Masidonia rhe, Pọl nọ dabu fiomarhọ ẹmro na eghwoghwo ji dabu djeyi fiotọre rẹn itu i Ju na taghene i Jesu yi Kristi na. 6 Ọrẹn, ọke ihworho na a kparahasuiẹ ji hinmaro kpahiẹn, no tue ewuien ji ta rẹn aye: “Jenẹ ọbara are o rhirhiẹ urhomu are. Abọ mẹ i fonron. Nẹ ọke ọnana nyarhẹn, mi ne bru ihworho egbamwa na nya.” 7 Omarana, no nẹ avwaye* riẹ oghwa ọhworhare owu re se i Tishọs Jọstọs rọ ga Osolobrugwẹ, rẹ oghwa ye ọ kẹrẹ i sinagọg na. 8 Ọrẹn, Krispọs rọ hẹrote i sinagọg na ọrhẹ ọsoso unuoghwa ye ni me rhiẹ idibo Ọrovwori na. Itu i Kọrint buebun ri rhon ẹmro na ni vwo imwẹro ji bromarhame. 9 Habaye uvuẹn ason, Ọrovwori na nọ ta rẹn i Pọl uvuẹn emena arudo: “Wu vwa zofẹ-ẹn, ọrẹn rhe ghwoghwo, wu vwe kudu-u. 10 Fọkime mẹmẹ ọrhẹ owẹwẹ i gba havwiẹ, o vwo ohworho owuorowu rọ nọ hasuọ ji suẹ ẹkuọn wẹ-ẹn. Fọkime mi vwo ihworho buebun uvuẹn amwa ọnana.” 11 Omarana, no rhirhiẹ avwaye ẹgbukpe owu gbẹ ibiamo erhan, no ji yono aye ẹmro Osolobrugwẹ.
12 Ọke i Galio o suẹn* Akeya, itu i Ju na ni kwomakugbe kparehasuẹ i Pọl ji kpariẹ riẹ obaro aga ẹzenguon na. 13 Aye ni tare: “Ọhworhare ọnana ọ riẹriẹ ihworho, nẹ aye i ga Osolobrugwẹ uvuẹn izede rọ kparehaso urhi na.” 14 Ọrẹn, ọke i Pọl ọ gwọlọ tẹmro, Galio nọ ta rẹn itu i Ju na: “O itu i Ju, itiọrurhomẹmro, orhianẹ ọhworhare ọnana o ruẹ emru sọ yanghene ọ haso urhi, manẹ mie vwo erhionrin kerhọ are. 15 Ọrẹn, orhianẹ ẹzọn na o sekpahen ẹmro ọrhẹ edẹ ihworho kugbe urhi are, are ọvo i ya kwaphiẹ ye rhọ. Mia gwọlọ guẹnzọn ekwakwa enana-a.” 16 Omarana, no lerẹ aye nẹ obaro aga ẹzenguon na. 17 Fọkiẹ ọnana, aye ephian ni sanbọmwu i Sọstenis rọ hẹrote i sinagọg na, aye ne kpe yi uvuẹn obaro aga ẹzenguon na. Ọrẹn, Galio o kwe dumunu rhẹ ọsoso ekwakwa enana kakaka-a.
18 Ọrẹn, Pọl no rhirhiẹ avwaye ẹdẹ ezẹko. Ọke rọ mroma imizu na hin, ọye ọrhẹ Prisila kugbe Akwila ni ruẹ ọkuna riẹ i Siria. No bru ẹtuiẹn riotọre uvuẹn i Sẹnkria, fọkime o vive owu. 19 Omarana, ọke aye e te Ẹfisọs, nọ nyaji aye vwo avwaye. Ọrẹn, Pọl nọ ruẹ i sinagọg na ji lele itu i Ju na tẹmro kugbe. 20 Dedevwo aye a rẹ ye no lele aye rhirhiẹ ye ibiọke, ọrẹn o kwe-e. 21 Ukpomaran, nọ mromirẹ aye ji ta: “Mi na ghwẹrioma bru are rhe, orho rhiẹ ọhọre i Jehova.”* Ọke oru, nọ ruẹ ọkuna nẹ Ẹfisọs 22 riẹ i Sẹseria. Nọ nyarhẹn ya mroma imizu ukoko na, ọke oru no riẹ Antiọk.
23 Ọke rọ daji avwaye ibiọke, no nẹ avwaye ye kiẹn ekete sansan uvuẹn i Galesha ọrhẹ Frija, nọ bọn ọsoso idibo na gbanhan.
24 Vwana, onyẹ i Ju owu re se Apolọs ro rhiẹ ọmotọre Alẹzandria, nọ rhiẹ Ẹfisọs. Ọ dabu rhe ẹmro ta, ọ ji dabu rhe Eyaya Efuanfon na. 25 E yono Apolọs kpahen izede i Jehova,* o ji vwo oruru nyoma ẹhẹn ọfuanfon na. Nọ tẹmro ji yono ihworho kpahen i Jesu uvuẹn izede rọ gbare, ọrẹn omebrurhame i Jọn ọvo yo rheri. 26 Nọ tẹmro rhẹ ohinmi uvuẹn i sinagọg na, ọrẹn ọke i Prisila ọrhẹ Akwila e rhon ẹmriẹn, aye ni serie ba oma ji dabu dje izede Osolobrugwẹ fiotọre riẹn. 27 Habaye, fọkime Apolọs ọ gwọlọ riẹ Akeya, imizu na ni ya ileta vwe idibo ri ha oboran, ji ta rẹn aye nẹ aye i dabu rhiabọ dedie. Omarana, ọke ro te oboran, nọ dabu ha userhumu rẹn ihworho ri rhiẹ idibo i Kristi nyoma ẹghẹlẹ esiri rode Osolobrugwẹ. 28 Rhẹ oruru ọgbogbanhon, no djeyi phia uvuẹn afiede taghene iroro itu i Ju na i sọre. No djeyi rẹn aye uvuẹn Eyaya Efuanfon na taghene i Jesu yi Kristi na.