Ewian Inyikọ na
17 Aye ni nya Amfipolis ọrhẹ Apolonia vrẹn, aye ni te i Tẹsalonaika. Sinagọg itu i Ju na ọ ha avwaye. 2 Omarana, lele uruemru i Pọl, no bru aye nya uvuẹn i sinagọg na ji lele aye tẹmro nẹ Eyaya Efuanfon na sa uvwre Ẹdẹ Omeronmo esa. 3 No djeyi fiotọre rẹn aye ji rionbọrhọ ekete uvuẹn eyaya efuanfon na ri djerie phia taghene o fori nẹ i Kristi na ọ rioja, na ji rhọmiẹ nuhwu, nọ ta: “Ọnana yi Kristi ro rhiẹ i Jesu, ri mie ghwoghwo rẹn are na.” 4 Fọkiẹ ọrana, ezẹko usuẹn aye ni rhiẹ idibo i Kristi, aye ni kwomakugbe i Pọl ọrhẹ Sailas. Omaran ji te itu i Grik buebun ra ga Osolobrugwẹ kugbe emẹse buebun ri titiri.
5 Ọrẹn, fọkime itu i Ju na a rioma, aye ni koko ehworhare ezẹko uvuẹn ekete eyi na ri rhiẹ evwọkon ri vwe vwo owian. Aye ni ha ẹko ilogbozighi mwu ji suẹ ọyanghan uvuẹn amwa na. Aye ni kperuẹ oghwa i Jesin, ji ta riẹn nọ ha i Pọl ọrhẹ Sailas ruẹ otafe. 6 Fọkime aye a mẹrẹn aye-e, aye ni kpolo i Jesin ọrhẹ imizu ezẹko vwe ere suẹn amwa na, aye ne kperẹ phia: “Ehworhare enana ra suẹ ọyanghan uvuẹn ọsoso otọrakpọ na, i rhiẹ obonẹ ne. 7 Habaye, Jesin no rhiabọ dede aye ruẹ oghwa ye. Ehworhare enana ephian a kparahasuẹ urhi Siza, nyoma aye a ta taghene o vwo orodje ọrọrọ ro rhiẹ i Jesu.” 8 Ọke otu na ọrhẹ ere suẹn amwa na e rhon ẹmro enana, udu no bru aye. 9 Ọke aye a ha igho buebun mie i Jesin ọrhẹ imizu ri hẹrhẹre na hin, aye ni tiobọnẹ aye.
10 Ogege ason o te, imizu na ni dje i Pọl ọrhẹ Sailas riẹ i Beria. Ọke aye e te oboran, aye ni riẹ i sinagọg itu i Ju na. 11 Vwana, ihworho i Beria i vwo omamọ ẹhẹn ghwẹ ihworho ri ha i Tẹsalonaika, fọkime aye i rhiabọ dede ẹmro Osolobrugwẹ rhẹ oruru ọgbogbanhon. Aye na dabu ni Eyaya Efuanfon sua kẹdẹkẹdẹ, sẹ oborẹ aye e rhon na ghini urhomẹmro. 12 Omarana, buebun aye ni rhiẹ idibo i Kristi, omaran ji te ehworhare ọrhẹ emẹse i Grik buebun ri titiri. 13 Ọrẹn, ọke itu i Ju ri ha i Tẹsalonaika e rhon taghene i Pọl o ghwoghwo ẹmro Osolobrugwẹ uvuẹn i Beria, aye ni rhe mo wene ẹhẹn otu na ji suẹ ọyanghan. 14 Ogege, imizu na ni dje i Pọl riẹ obọrẹ urhie ọduado na, ọrẹn i Sailas ọrhẹ Timoti ni daji avwaye. 15 Imizu ri leli Pọl ni sunrien te Atẹns, ọke i Pọl ọ ta rẹn imizu na taghene aye i dje i Sailas ọrhẹ i Timoti vwe yi ogege, aye ni ghwẹrioma.
16 Vwana, ọke i Pọl ọ hẹrhẹ aye uvuẹn Atẹns, no* mwuomarhọ ọke rọ mẹriẹn taghene amwa na ọ vuọnren rhẹ ema. 17 Omarana, no lele itu i Ju na ọrhẹ ihworho erọrọ ra ga Osolobrugwẹ tẹmro kugbe uvuẹn i sinagọg na. Habaye, no ghwoghwo kẹdẹkẹdẹ rẹn ihworho rọ vware uvuẹn ekete eyi na. 18 Ọrẹn, egbirherhe Ẹpikurọs ọrhẹ Stọik ne lelie frẹfro, ezẹko usuẹn aye na ta: “Me yẹ ọgbẹmro ọnana ọ gwọlọ ta?” Awọrọ na ta: “Ọ họhọre taghene o ghwoghwo kpahen isolobrugwẹ emwa erọrọ.” Aye i tẹmro enana fọkime o ghwoghwo iyẹnrẹn esiri kpahen i Jesu ọrhẹ ẹrhọmọnuhwu na. 19 Omarana, aye ni mọrenriẹn ji haye riẹ Ariopagọs na, aye ni nọriẹn: “Wu na sabu ta rẹn ame kpahen uyono ọkpokpọ ọnana we ghwoghwo kpahan na? 20 Fọkime wa ta kpahen ekwakwa ezẹko re gede erhọ ame, ame i gwọlọ rhe oborẹ ekwakwa enana i mevirhọ.” 21 Itiọrurhomẹmro, ọsoso ihworho Atẹns ọrhẹ epha re rhirhiẹ* avwaye, i vwa ha ọke omeronmo aye ruẹ emru owuorowu-u, jokpanẹ ọrẹ aye ine gbikun yanghene kerhọ iyẹnrẹn ọkpokpọ. 22 Omarana, Pọl no mevi erhẹrhẹ Ariopagọs na ji ta:
“Ihworho Atẹns, mi mẹrenriẹn vwrurhe ne taghene uvuẹn i kemru kemru, are a zofẹn isolobrugwẹ na ghwẹ awọrọ. 23 Jerẹ udje, ọke mia nyavrẹn ji dabu ni ekwakwa are a gọ, ni mi mẹrẹn agbarha owu ra ya ẹmro enana rhọ, ‘Harẹn Osolobrugwẹ re Vwe Rhe.’ Omarana, oborẹ are a gọ, rẹ are i vwe rhe na, yi mie ghwoghwo rẹn are. 24 Osolobrugwẹ rọ ma akpọ na ọrhẹ ọsoso ekwakwa ri ha uvuien ro ji rhiẹ Ọrovwori odjuwu ọrhẹ otọrakpọ na, o vwo rhirhiẹ oghwa ẹga rẹ ituakpọ i ha abọ bọ-ọn. 25 O vwo ji fiẹrorhọ taghene ituakpọ ina ha userhumu riẹ-ẹn. Fọkime ọye yo tiobọnẹ arhọ, ẹhẹn re mwuẹha ọrhẹ kemru kemru rẹn ihworho ephian. 26 Ọ ma ihworho ri ha ọsoso agbamwa na nẹ oma ọhworhare owu rhe, nẹ aye i rhirhiẹ otọrakpọ na. No bru ọke rhotọre ji gberi ughwru rẹn ituakpọ sekpahen ekete aye ine rhirhiẹ, 27 neneyo aye i gwọlọ Osolobrugwẹ. Aye i rha dabu gwọliẹ, aye ni na mẹriẹn. Itiọrurhomẹmro, o serabọ rẹn ọwan owuorowu-u. 28 Fọkime nyoma yen yẹ ọwan e vwo arhọ, yẹ ọwan a nya jeghwai nyerẹn, jerẹ oborẹ eyẹbe are ezẹko i tobọ ta taghene, ‘Ọwan ephian emọyen.’
29 “Omarana, ra mẹriẹn taghene ọwan emọ Osolobrugwẹ na, o fo ne roro taghene Osolobrugwẹ ọ họhọ oro yanghene idọlọ ọfuanfon, yanghene atita-a. Ọ họhọ oborẹ ituakpọ i ha abọ jare yanghene ma-a. 30 Urhomẹmro taghene ọke bi, Osolobrugwẹ o nẹro rẹn ihworho re ruẹ ekwakwa fọkiẹ ughẹnghẹn aye. Ọrẹn vwana, ọ ta rẹn ihworho ri ha ekete ephian taghene aye i ghwẹriẹ. 31 Fọkime Osolobrugwẹ o bru ẹdẹ ne rọ nọ ha ọsoso otọrakpọ na guẹnzọn izede ọsoso. Ono ruẹ ọnana nyoma ohworho rọ ha mwu, nọ ji rhọmiẹ nuhwu neneyo o mwu ituakpọ ephian ẹro.”
32 Ọke ihworho na e rhon kpahen ẹrhọmọnuhwu, ezẹko na haye djechẹẹ. Ọrẹn, awọrọ ni tare: “Ame ine rhon mio ọke ọrọrọ kpahen ẹmro ọnana.” 33 Omarana, Pọl nọ nyaji aye vwo. 34 Ọrẹn, ihworho ezẹko ni kwomakugbe i Pọl, aye ni rhiẹ idibo i Kristi. Usuẹn aye yẹ, Dayonisiọs ro rhiẹ oguẹnzọn uvuẹn oghwa ẹghware ọrẹ Ariopagọs na, kugbe ọmase owu re se i Damaris ọrhẹ ihworho erọrọ.