Agɔnwolɛma Ɛmmaa Yɛ Nwo Ɛnyɛ Yɛ Koonwu​—⁠Kɛzi Baebolo Ne Kola Boa La

Menli mɔɔ yɛ kpɔkɛdelɛ nwo gyima la nwunle kɛ anwokoonwuyɛlɛ yɛle ngyegyelɛ kpole wɔ 2023 anu mɔɔ ɔwɔ kɛ bɛyɛ nwolɛ debie a. Asoo ngyegyelɛ ɛhye lɛ ye sɔbelɛ?

• Dɔketa Vivek Murthy mɔɔ yɛ apelehyɛne wɔ U.S. la ka kɛ, “anwokoonwuyɛlɛ nee yɛ nwo mɔɔ yɛtwe yɛfi awie mɔ anwo la kola sɛkye yɛ kpɔkɛdelɛ yɛɛ ɔmmaa yɛ nye ɛnlie.” Noko eza ɔka kɛ: “Yɛbahola yɛayɛ nwolɛ debie.” Adenle boni azo? “Ɔlua ninyɛne ngyikyi mɔɔ yɛbayɛ ye alehyenlɛ biala yɛamaa agɔnwolɛvalɛ mɔɔ yɛ nee awie mɔ lɛ la anu amia la azo.”a

Tɛ awie mɔɔ twe ɔ nwo fi awie mɔ anwo la angomekye a anwo yɛ ye koonwu a. Bie mɔ bɔbɔ anwo yɛ bɛ koonwu wɔ mekɛ mɔɔ bɛwɔ menli dɔɔnwo avinli la. Ɔnva nwo debie mɔɔ maa awie anwo yɛ ye koonwu la, Baebolo ne bahola aboa yɛ. Ɔtu yɛ folɛ kpalɛ mɔɔ boa yɛ maa yɛɛ nee awie mɔ agɔnwolɛvalɛ nu mia amaa yɛ nwo anyɛ yɛ koonwu la.

Baebolo ngyinlazo mɔɔ kola boa yɛ

Nwu kɛzi bɛdi adwelie kpalɛ la. Ɛhye kile kɛ ɔwɔ kɛ ɛka wɔ edwɛkɛ ɛkile awie mɔ na eza ɛtie bɛ kpalɛ wɔ mekɛ mɔɔ bɛlɛtendɛ la. Saa ɛmaa awie mɔ nwu kɛ ɛkulo bɛ edwɛkɛ a, ɔbamaa agɔnwolɛvalɛ mɔɔ ɛ nee bɛ lɛ la anu amia.

• Baebolo ngyinlazo: “Bɛmmadwenle bɛ ngomekye bɛ boɛyɛlɛ nwo, emomu bɛdwenle awie mɔ noko ɛdeɛ nwo.”​—Felepaema 2:4.

Fa menli dɔɔnwo agɔnwolɛ. Fa menli mɔɔ le mgbanyinli tɛla wɔ anzɛɛ ɛtɛla bɛ la agɔnwolɛ, anzɛɛ asolo bɛ amaamuo anzɛɛ maanle mɔɔ bɛvi nu la agɔnwolɛ.

• Baebolo ngyinlazo: “Bɛbuke bɛ ahonle nu kpalɛ.”​—2 Kɔlentema 6:13.

Amaa wɔanwu kɛzi bɛ nee awie mɔ nyia agɔnwolɛvalɛ mɔɔ anu mia la anwo edwɛkɛ dɔɔnwo la, kenga edwɛkɛ “Satisfying Our Hunger for Friendship.”