Asoo Konle Bazi Ewiade Amuala?—⁠Duzu A Baebolo Ne Ka A?

Wɔ ɛvolɛ 30 mɔɔ ɛze ɛhɔ la anu, ɛnee menli dɔɔnwo te nganeɛ kɛ maanle maanle dɔnwo avinli le kpalɛ yɛɛ ɔlɛnyia anyuhɔlɛ bɔbɔ. Noko ninyɛne mɔɔ ɛlɛsisi kenlensa ye la kile kɛ ɛnee ɔnle zɔ.

“Israel nee Hezbollah ɛlɛko atia bɛ nwo wɔ Lebanon ɛweɛne zo na menli sulo kɛ ɔbamaa konle mɔɔ ɛlɛkɔ zo wɔ Gaza la asalo.”—Reuters, January 6, 2024.
“Ekpunli ngakyile mɔɔ Iran gyi bɛ nzi la ɛlɛko wɔ ɛleka ngakyile dɔɔnwo yɛɛ Iran nukelea akodeɛ nwo gyima ne mɔɔ ɛlɛkɔ zo la ɛyɛ ngyegyelɛ bieko ɛmaa maanle bie mɔ, ɔluakɛ kɛkala Russia nee China gyi ɔ nzi.”—The New York Times, January 7, 2024.
“Russia ɛlɛkɔ zo azɛkye ninyɛne dɔɔnwo wɔ Ukraine.”—UN News, January 11, 2024.
“Anyuhɔlɛ mɔɔ China ɛlɛnyia wɔ ezukoa afoa nu nee konle ninyɛne nu, Taiwan mɔɔ ɛlɛkpondɛ fanwodi yɛɛ Beijing nee Washington avinli mɔɔ ɛlɛsɛkye la kile kɛ ngyegyelɛ kpole bahola ara.”—The Japan Times, January 9, 2024.

Asoo Baebolo ne ka ngyegyelɛ ɛhye mɔ mɔɔ ɛlɛkɔ zo wɔ maanle maanle avinli ɛnɛ la anwo edwɛkɛ ɔ? Asoo ɔbamaa konle azi ewiade amuala ɔ?

Baebolo ne hanle mɔɔ ɛlɛsisi ɛnɛ la anwo edwɛkɛ dole ɛkɛ

Baebolo ne anga konle bie mɔɔ ɛlɛkɔ zo ɛnɛ la anwo edwɛkɛ fɔɔnwo. Noko ɔhanle konle dɔɔnwo mɔɔ bahɔ zo wɔ yɛ mekɛ ye azo la anwo edwɛkɛ kɛ ‘ɔbaye anzodwolɛ yeavi azɛlɛ ye azo.’—Yekile 6:4.

Daneɛle buluku ne hanle dole ɛkɛ ne kɛ “wɔ mekɛ mɔɔ li awieleɛ la anu,” ewiade arelemgbunli mɔɔ kulo tumi la ‘bazuhuzuhu’ bɛ nwo anzɛɛ bɛbakpondɛ menli bɛali bɛ nwo zo tumi. Ɛhye bamaa bala bɛ nwo ali kɛ bɛlɛ konle ninyɛne mgbole yɛɛ bɛbazɛkye “anwonyia” anzɛɛ ezukoa dɔɔnwo.—Daneɛle 11:40, 42, 43.

Konle bie ɛlɛba

Baebolo ne maa yɛnwu kɛ mɔɔ ɛlɛkɔ zo wɔ maanle maanle ne mɔ avinli la bahɔ zo azɛkye kolaa na yeayɛ kpalɛ. Gyisɛse hanle dole ɛkɛ ne kɛ “anwongyelelɛ kpole mɔɔ sumunli kɛ ewiade bɔle ɔ bo badwu ɛnɛ bie ɛtɛsile ɛlɛ yɛɛ bieko noko ɛnrɛzi ɛlɛ la bara.” (Mateyu 24:21) “Anwongyelelɛ kpole” zɔhane bava Amagɛdɔn konle ne, mɔɔ bɛha nwolɛ edwɛkɛ kɛ “Nyamenle, Tumivolɛ Bedevinli ne kenle kpole ne anu konle ne” la ara.—Yekile 16:14, 16.

Noko, Amagɛdɔn balie alesama ngoane na ɔnrɛzɛkye bɛ. Nyamenle balua Amagɛdɔn konle ne azo yeazɛkye sonla tumililɛ mɔɔ ɛva konle dɔɔnwo mɔɔ sɛkye ninyɛne ɛra la. Amaa wɔanwu kɛzi Amagɛdɔn bamaa yɛanyia anzodwolɛ bɔkɔɔ la, kenga edwɛkɛ ɛhye mɔ:

“Duzu A Le Amagɛdɔn Konle Ne?”
“Amagɛdɔn Le Edwɛkɛ Kpalɛ!”