Anwokoonwuyɛlɛ Nwo Ngyegyelɛ Ɛyɛ Kpole​—⁠Mɔɔ Baebolo Ne Ka La

Neɛnleanua bie mɔɔ bɛyɛ ye kenlensa ye wɔ ewiade ɛleka dɔɔnwo la kile kɛ menli nna anu ko biala anwo yɛ ye koonwu.

• “Awie biala anwo kola yɛ ye koonwu ɔnva nwo ɛvolɛ mɔɔ yeli anzɛɛ ɛleka mɔɔ ɔwɔ la.”​​—Chido Mpemba, mɔɔ le World Health Organization’s Commission on Social Connection kpanyinli la.

Tɛ mgbanyima anzɛɛ menli mɔɔ bɛmbikye awie la a anwo yɛ bɛ koonwu a kɛ mɔɔ menli dɔɔnwo dwenle la, emomu ngakula, menli mɔɔ te kpɔkɛ, bɛnyia bɛ nwo anzɛɛ bɛgya la noko anwo yɛ bɛ koonwu. Saa awie ɛmbikye menli anzɛɛ ɔ nwo yɛ ye koonwu a ɔbahola yeaha ye kpɔkɛdelɛ yɛɛ ɔnrɛmaa ɔ nye ɛnrɛlie.

• Dɔketa Vivek Murthy, mɔɔ le kpanyinli mɔɔ yɛ apelehyɛne wɔ U.S. la ka kɛ, “Anwokoonwuyɛlɛ ɛnle nganeɛ ɛtane mɔɔ awie te ala.” Ɔka ɔtoa zo kɛ: “Anwokoonwuyɛlɛ ku menli kɛ mɔɔ awie mɔɔ no sigalɛte 15 kenle ko biala la kola wu ala la.”

Mɔɔ Baebolo Ne Ka La

Yɛ Bɔvolɛ ne ɛngulo kɛ yɛ nwo yɛ yɛ koonwu. Nyamenle bodane a le kɛ alesama nee awie mɔ badɛnla na bɛ nye alie dahuu.

• Baebolo ngyinlazo: “Nyamenle hanle kɛ: ‘Ɔnle kpalɛ kɛ nrenyia ne angomekye kɛdɛnla.’”​—Gyɛnɛsese 2:18.

Nyamenle kulo kɛ yɛfa ye agɔnwolɛ. Yebɔ ɛwɔkɛ kɛ saa yɛbɔ mɔdenle yɛbikye ye a ɔbabikye yɛ.​—Gyemise 4:8.

• Baebolo ngyinlazo: “Anyelielɛ a le bɛdabɛ mɔɔ bɛze bɛ sunsum nu ngyianlɛ la, ɔluakɛ anwuma Belemgbunlililɛ ne le bɛ ɛdeɛ.”​—Mateyu 5:3.

Nyamenle kulo kɛ yɛ nee awie mɔ bɔ nu sonle ye. Saa yɛyɛ zɔ a ɔmaa yɛ nye die kpalɛ.

• Baebolo ngyinlazo: “Bɛmaa yɛzuzu yɛ nwo ngoko amaa yɛamaa yɛ nwo anwosesebɛ yɛahɔ ɛlɔlɛ nee gyima kpalɛ ɛyɛlɛ nu, bɛmmamaa yɛgyakyi kɛ yɛkɛhɔ yɛ nyianu ne mɔ,  . . . emomu bɛmaa yɛmaa yɛ nwo anwosesebɛ.”​—Hibuluma 10:24, 25.

Amaa wɔanwu deɛmɔti ɔhyia kɛ yɛko yɛtia anwokoonwuyɛlɛ la anwo edwɛkɛ dɔɔnwo la, kenga edwɛkɛ“Loneliness in a World of Mass Connection.”