Thomas Jackson/Stone via Getty Images
BƐHƆ ZO BƐZINZA!
Anyelazo Wɔ Ɛkɛ Wɔ 2024—Duzu A Baebolo Ne Ka A?
Menli dɔɔnwo suzu kɛ yɛnrɛnyia ngyegyelɛ mɔɔ ɛlɛkɔ zo wɔ ewiade ye la anwo sɔbelɛ wɔ 2024. Noko, yɛbahola yɛanyia kenle bie anwo anyelazo. Wɔ ni?
Baebolo ne maa yɛnyia anyelazo
Baebolo ne ɛbɔ ɛwɔkɛ kɛ Nyamenle baye ngyegyelɛ mɔɔ maa ɔyɛ kɛ asɛɛ yɛnlɛ anyelazo biala wɔ yɛ ɛbɛlabɔlɛ nu ɛnɛ la avi ɛkɛ. Ɔnrɛhyɛ, Nyamenle ‘bakyikyi yɛ nye anwo monle kɔsɔɔti, na ewule ɛnle ɛkɛ bieko, yɛɛ alɔbɔlɛ nee ɛzunlɛ nee nyane ɛnle ɛkɛ bieko.’—Yekile 21:4.
Amaa wɔazukoa kenle bie anwo ɛwɔkɛ mɔɔ wɔ Baebolo ne anu la anwo ninyɛne dɔɔnwo la, kenga edwɛkɛ “Ninyɛne Bayɛ Kpalɛ Kenle Bie.”
Kɛzi Baebolo ne bahola aboa wɔ kɛkala la
Kenle bie anwo ɛwɔkɛ mɔɔ wɔ Baebolo ne anu la bahola aboa wɔ yeamaa wɔanyia anyelazo kɛ ninyɛne bayɛ kpalɛ. (Wulomuma 15:13) Folɛdulɛ kpalɛ mɔɔ wɔ Baebolo ne anu la bahola aboa wɔ yeamaa wɔagyinla ngyegyelɛ mɔɔ ɛlɛyia ye kɛkala, mɔɔ bie a le ehyia, nzisi yɛɛ anwodolɛ la anloa.
Nea kɛzi Baebolo ne anu anyelazo boale nrenyia bie maanle ɔnyianle anzodwolɛ nee anyelielɛ ɔnva nwo kɛ ɔle ehyianli la. Nea vidio Juan Pablo Zermeño: Gyihova Maanle Menyianle Ɛbɛlabɔlɛ Kpalɛ.
Nea kɛzi Baebolo ne bahola aboa wɔ wɔ mekɛ mɔɔ wɔ adwenle kɛbua wɔ fɔlɛ, ɛlɛdi nyane, adwenleadwenle ɛdɔ ɛ nwo yɛɛ mekɛ mɔɔ wɔ kulovolɛ bie kɛwu la. Kenga edwɛkɛ “Asoo Mebahola Meanyia Arɛlekyekyelɛ Edwɛkɛ Wɔ Baebolo Ne Anu?”
Nea kɛzi raalɛ bie mɔɔ hɔle sogya mɔɔ ɛnee bu ɔ nwo kɛ “ɔnlɛ anyelazo yɛɛ ɔndwenle awie anwo” la zukoale Baebolo ne na ɔnyianle anyelazo la. Nea vidio I Put Down My Rifle.
Maa 2024 ɛyɛ ɛvolɛ kpalɛ ɛmaa wɔ nee wɔ abusua ne. Sukoa kɛzi Baebolo ne bahola aboa wɔ la anwo ninyɛne dɔɔnwo. Maa yɛ nee wɔ ɛzukoa Baebolo ne mɔɔ ɛndua ɛhwee a. Sukoa kɛzi Nyamenle bahola amaa wɔanyia “anzodwolɛ adwenle” kɛkala yɛɛ “kenle bie nee anyelazo” la.—Gyɛlɛmaya 29:11.