Menli Dɔɔnwo Anwo Yɛ Bɛ Koonwu​—Duzu A Ɛbayɛ Na Ɛ Nwo Anyɛ Wɔ Koonwu A?

• “Menli mɔɔ wɔ U.S. la anu kɛyɛ foa ko mɔɔ bɛnle ngakula la ka kɛ bɛ nwo yɛ bɛ koonwu, titili bɛdabɛ mɔɔ bɛli ɛvolɛ 18 kɔdwu 25 la.”​​—Our Epidemic of Loneliness and Isolation: The U.S. Surgeon General’s Advisory on the Healing Effects of Social Connection and Community, 2023.

• “[The World Health Organization] bɔle amaneɛ kɛ yekpa menli ekpunli bie mɔɔ bɛ gyima a le kɛ bɛbabu anwokoonwuyɛlɛ kɛ ɔle anwodolɛ na bɛamaa menli anwosesebɛ bɛamaa bɛava bɛ adwenle bɛazie kɛzi bɛbabikye awie mɔ la azo. Eza bɛbakpondɛ ndenle mgbalɛ bɛalua zo bɛaho bɛatia anwokoonwuyɛlɛ wɔ maanle kɔsɔɔti azo bɔbɔ saa maanle ɛhye mɔ di ehyia a.”​​—World Health Organization, November 15, 2023.

Baebolo ne fa folɛdulɛ kpalɛ mɔɔ boa maa yɛ nee awie mɔ nyia agɔnwolɛvalɛ kpalɛ amaa yɛ nwo anyɛ yɛ koonwu la maa.

Baebolo ngyinlazo mɔɔ bahola aboa

Te ninyɛne mɔɔ ɛyɛ a ɔmmaa ɛmbikye awie mɔ la ɛyɛlɛ zo. Ninyɛne ɛhye mɔ bie a le mekɛ dɔɔnwo mɔɔ ɛfa ɛkɔ sohyia media azo la. Kpondɛ ndenle mɔɔ ɛbalua zo wɔahɔ awie mɔ ɛkɛ na ɛ nee bɛ anyia agɔnwolɛvalɛ kpalɛ la.

• Baebolo ngyinlazo: “Agɔnwolɛ kpalɛ da ɛlɔlɛ ali mekɛ biala yɛɛ ɔle adiema mɔɔ bɛwo ye bɛmaa anwongyelelɛ mekɛ.”​​—Mrɛlɛbulɛ 17:17.

Kpondɛ ndenle mɔɔ ɛbalua zo wɔaboa awie mɔ la. Saa yɛyɛ ninyɛne mgbalɛ yɛmaa awie mɔ a ɔmaa yɛ nee bɛ nyia agɔnwolɛvalɛ kpalɛ na yɛ nye die.

• Baebolo ngyinlazo: “Anyelielɛ dɔɔnwo wɔ ɛmaanlɛ nu tɛla ɛlielɛ.”​​—Gyima ne 20:35.

Kɔ yɛ wɛbsaete ne azo na ɛbanyia Baebolo nu edwɛkɛ dɔɔnwo mɔɔ fale kɛzi yɛ nee awie mɔ banyia agɔnwolɛvalɛ kpalɛ anwo la.