Duzu Ati A Anzodwolɛ Ɛnle Menli Avinli A?​​—⁠Duzu A Baebolo Ne Ka A?

Ewiade mgbanyima nee ahyehyɛdeɛ ngakyile mɔɔ wɔ ɛkɛ la ɛtɛkolale ɛtɛmaanle anzodwolɛ ɛtɛbale. Basabasayɛlɛ ɛbu zo ɛnɛ ɛdɛla mekɛ biala ɔvi mekɛ mɔɔ bɛhonle Ewiade Konle II la. Menli kɛyɛ mgbe mgbe nwiɔ anzɛɛ saa ɛkyɛ menli mɔɔ wɔ ewiade amuala la anu nna a, bɛ nuhua ko de ɛleka mɔɔ basabasayɛlɛ ɛhye mɔ ɛlɛkɔ zo la.

Duzu ati a alesama ɛngola ɛnva anzodwolɛ ɛmba a? Duzu a Baebolo ne ka a?

Deɛmɔti alesama ɛnrɛhola ɛnrɛmaa anzodwolɛ ɛnrɛra la

1. 1. Subane mɔɔ menli da ye ali la maa ɔyɛ se kɛ bɛbakpondɛ anzodwolɛ. Baebolo ne hanle menli mɔɔ wɔ yɛ mekɛ ye azo la anwo edwɛkɛ kɛ, “[bɛbahulo] bɛ ngome bɛ nwo, bɛbahulo ezukoa, bɛbayɛ adubɛnwo, anwomemaazo, . . . bɛnrɛli nɔhalɛ, . . . menli mɔɔ bɛ nee bɛ ɛnyɛ ngyehyɛleɛ, . . . menli mɔɔ ɛngomo bɛ nwo zo, menli mɔɔ anwo yɛ ɛzulolɛ, . . . menli mɔɔ le tufoande, menli mɔɔ tu bɛ nloa anu.”​​—2 Timote 3:2-4.

2. 2. Saa Gyihovaa Nyamenle mɔɔ bɔle alesama la amboa bɛ a bɛnrɛhola bɛnrɛli bɛ ngyegyelɛ nwo gyima. Baebolo ne ka kɛ “ɔnle sonla mɔɔ ɛlɛtia la ɛdeɛ kɛ ɔbahile ɔ gyakɛ mɔɔ ɔtu bɔbɔ la adenle.”​—Gyɛlɛmaya 10:23.

3. 3. Seetan Abɔnsam mɔɔ lɛ tumi na ɔ ti yɛ se la a ɛlɛnea ewiade ne azo a na ‘ɔlɛbɛlɛbɛla azɛlɛ ye azo amra amuala.’ (Yekile 12:9) Mekɛ ala mɔɔ “ewiade ye amuala wɔ amumuyɛnli ne tumi bo” la, konle nee basabasayɛlɛ bahɔ zo.​​—1 Dwɔn 5:19.

Nwane a bahola amaa anzodwolɛ ara a?

Baebolo ne maa yɛnyia anwodozo kɛ Nyamenle a bamaa yeanyia anzodwolɛ a na tɛ sonla ɔ.

• “‘Ɔluakɛ meze adwenle mɔɔ melɛdwenle ye wɔ bɛ nwo la,’ Gyihova a se a, ‘anzodwolɛ adwenle ɔ, na tɛ munzule adwenle, kɛ mebamaa bɛ kenle bie nee anyelazo.’”​—Gyɛlɛmaya 29:11.

Kɛzi Nyamenle bamaa ɛwɔkɛ zɔhane ara nu ɛ? “Nyamenle mɔɔ maa anzodwolɛ la babɛtɛ Seetan.” (Wulomuma 16:20) Nyamenle balua anwuma arane bie mɔɔ Baebolo ne fɛlɛ ye “Nyamenle Belemgbunlililɛ ne” la azo yeamaa anzodwolɛ ara ewiade amuala. (Luku 4:43) Saa Gyisɛse Kelaese mɔɔ le Nyamenle Belemgbunlililɛ ne azo Belemgbunli la ɛlɛdi tumi a, ɔbahilehile menli yeamaa bɛadɛnla anzodwolɛ nu.​​—Ayezaya 9:6, 7.

• Amaa wɔanwu nwolɛ edwɛkɛ dɔɔnwo la, kenga “Duzu A Nyamenle Belemgbunlililɛ Ne Bayɛ A?”