Nwane A Balie Maanlema Ne A?​—Duzu A Baebolo Ne Ka A?

United Nations ne bɔ amaneɛ kɛ:

• Menli mɔɔ ɛwu wɔ Gaza nee Israel konle ne anu ɔvi October 7 kɔdwu October 23, 2023 la dodo bo 6,400 yɛɛ menli 15,200 ɛbodɛboda. Menli ɛhye mɔ anu dɔɔnwo le maanlema anzɛɛ menli mɔɔ ɛnze konle ne anwo bie la. Eza menli apenle dɔɔnwo ɛdu ɛvi bɛ azua nu.

• Ɔkadwu September 24, 2023 la, ɛnee Russia nee Ukraine konle ne ɛmaa bɛhu menli 9,701 yɛɛ menli 17,748 ɛbodɛboda wɔ Ukraine.

Anyelazo boni a Baebolo ne maa menli mɔɔ konle ɛmaa bɛlɛnwu amaneɛ la nyia a?

Deɛmɔti yɛlɛ anyelazo la

Baebolo ne ka kɛ Nyamenle bamaa ‘bɛagyakyi konle wɔ azɛlɛ ye kɔsɔɔti azo.’ (Edwɛne 46:9) Ɔbava anwuma arane anzɛɛ belemgbunlililɛ bie yeazie alesama arane ne mɔ agyakɛ anu. (Daneɛle 2:44) Nyamenle Belemgbunlililɛ ne bamaa menli anwo adɔ bɛ.

Nea mɔɔ Gyisɛse Kelaese mɔɔ le Nyamenle Belemgbunlililɛ ne azo Belemgbunli la bayɛ la:

• “Ɔbalie ehyianli mɔɔ su kpondɛ moalɛ, koahweabane nee mɔɔ ɛnlɛ boavolɛ la noko. Ɔbaze koahweabane nee ehyianli anwunvɔne, na yealie ehyianli ngoane. Ɔbalie bɛ yeavi nzisi nee basabasayɛlɛ nu.”​—Edwɛne 72:12-14.

Nyamenle balua ye Belemgbunlililɛ ne azo yeaye ngyegyelɛ nee amaneɛnwunlɛ mɔɔ konle nee basabasayɛlɛ ɛva ɛra la yeavi ɛkɛ bɔkɔɔ.

• “Ɔbakyikyi bɛ nye anwo monle kɔsɔɔti, na ewule ɛnle ɛkɛ bieko, yɛɛ alɔbɔlɛ nee ɛzunlɛ nee nyane ɛnle ɛkɛ bieko. Alimoa ninyɛne ne ɛpɛ nu.”​—Yekile 21:4.

Ɔnrɛhyɛ Nyamenle Belemgbunlililɛ ne bayɛ nzenzaleɛ kpole wɔ azɛlɛ ye azo. Baebolo ne hanle dole ɛkɛ ne kɛ yɛbade ‘konle mɔɔ bikye yɛ nee konle mɔɔ wɔ moamoa la anwo amaneɛbɔlɛ.’ (Mateyu 24:6) Edwɛkɛ ɛhye mɔ nee gyɛne maa ɔda ali kɛ yɛde alesama tumililɛ ne “mekɛ mɔɔ li awieleɛ” la anu.​—2 Timote 3:1.