“Konle Ne Le Gyihova Ɛdeɛ”

Wɔ 1999, France arane ne hanle kɛ ɔwɔ kɛ France Bɛtɛle ne tua ndoboa mɔɔ mediema yele ɔvi 1993 kɔdwu 1996 la anwo adwule. Yɛvale edwɛkɛ ne yɛhɔdole kɔɔto ngakyile mɔɔ wɔ France la anyunlu, noko biala amboa yɛ. Mɔɔ bɛlile edwɛkɛ ne bɛtiale yɛ wɔ kɔɔto bie anu la anzi, arane ne liele yɛ ezukoa mɔɔ la bange la anu dodo mɔɔ bo euro mgbe nna nee foa la (U.S. dɔla 6,300,000). Ɛnee ECHR ne ala a le yɛ anyelazo a. Noko kolaa na ECHR ne adie yɛ edwɛkɛ ne la, ɔhanle kɛ yɛ nee France arane ne lɔyama yɛɛ ECHR ne agyakɛnugyinlavolɛ ko ɛlimoa ɛhɔziezie edwɛkɛ ne na yɛnlea saa yɛ nloa bazɛ yɛ nwo a.

Ɛnee yɛze kɛ ye biala anu ECHR ne agyakɛnugyinlavolɛ ne baha ahile yɛ kɛ yɛdua adwule mɔɔ France arane ne se yɛdua la bie. Noko yɛnwunle ye wienyi kɛ saa yɛtua euro ko bɔbɔ a, ɛnee yɛanva Baebolo ngyinlazo yɛanli gyima. Mediema mrenyia nee mraalɛ yele ndoboa ne kɛ bɛfa bɛaboa Belemgbunlililɛ gyima ne, ɔti bɛ ndoboa ne ɛnle arane ne ɛdeɛ. (Mat. 22:21) Noko kɛmɔ yɛbu ECHR ne mɛla la ati a yɛhɔle ayia zɔhane a.

Yɛyiale wɔ ECHR ne ayia asalo ngɛnlɛma ne mɔ ko anu. Adwelielilɛ ne ambɔ ɔ bo boɛ. Mɔɔ ECHR ne agyakɛnugyinlavolɛ ne bɔ ye edwɛkɛ ne abo la ala la, ɔhanle kɛ ɔ nye la kɛ Gyihova Alasevolɛ badua adwule ne mɔɔ arane ne se bɛdua la bie. Ɛkɛ ne ala debie hwenle yɛ nu kɛ yɛbiza ye kɛ, “Asoo ɛze kɛ arane ne ɛlimoa ɛlie yɛ ezukoa mɔɔ la bange la anu dodo mɔɔ bo euro mgbe nna nee foa la dɛba ɔ?”

Ɛkola ɛnwu ye wɔ ɔ nyunlu kɛ edwɛkɛ ne ɛzi ɔ nwo kpalɛ, ɔluakɛ ɛnee ɔnze kɛ mɔɔ arane ne ɛyɛ la ɛne. Mɔɔ France arane ne lɔyama ne hanle kɛ amgba bɛliele zɔhane ezukoa ne la, akee adwenle mɔɔ ECHR ne agyakɛnugyinlavolɛ ne lɛ ye wɔ edwɛkɛ ne anwo la hakyile bɔkɔɔ. Ɔdeanle bɛ na ɔpɛle ayia ne azo ɛkɛ ne ala. Akee menwunle kɛ Gyihova a hakyile debie biala a, amaa yɛali konim wɔ edwɛkɛ ne anu. Mɔɔ yɛfi ɛkɛ ne la, ɛnee yɛ nye ɛlie kpole, noko mɔɔ hɔle zolɛ la zinle yɛ nwo kpalɛ.

Wɔ June 30, 2011, ECHR ndɛnebuavolɛma ne amuala buale yɛ benle. Bɛbɔle adwule ne mɔɔ bɛse yɛdua la bɛguale ye lɔ na bɛhanle bɛhilele France arane ne kɛ ɔva yɛ ezukoa biala mɔɔ ɔliele la ɔmaa yɛ na eza ɔdua nwolɛ mpaefoa! Zɔhane ndɛnebualɛ ne ɛbɔ nɔhalɛ ɛzonlenlɛ nwo bane wɔ France too badwu ɛnɛ. Kpuya zɔhane mɔɔ rale yɛ adwenle nu arɛlevilɛ nu mɔɔ yɛbizale la yɛle kɛ bolɛ ne mɔɔ Devidi dole bɔle Golayate ati anu la, ɔmaanle debie biala hakyile. Duzu ati a yɛlile konim a? Yemɔ a le kɛ, kɛ mɔɔ Devidi hanle hilele Golayate la, ɛnee “konle ne le Gyihova ɛdeɛ.”—1 Sa. 17:​45-47.

Tɛ edwɛkɛ ɛhye angomekye a yɛlile konim wɔ nu a. Badwu ɛnɛ, ɔnva nwo kɛ arane mɔɔ bɛlɛ tumi nee ɛzonlenlɛ ngakyile dwazo tia yɛ la, yɛli konim 1,225 wɔ edwɛkɛ mɔɔ bɛlile ye wɔ maanle ngakyile 70 kɔɔto mgbole nu yɛɛ kɔɔto gyɛne mɔɔ wɔ ewiade amuala anu la anu. Konimlilɛ ɛhye mɔ ɛbɔ fanwodi mɔɔ yɛlɛ la anwo bane, bie a le kɛ bɛbalie yɛ ɛzonlenlɛ ne bɛado nu wɔ mɛla nu, yɛbanyia adenle yɛayɛ yɛ daselɛlilɛ gyima ne wɔ bagua nu, yɛnrɛva yɛ nwo yɛnrɛwula maanle nwo ɛhulolɛ ɛvoyialilɛ nu yɛɛ yɛnrɛlie mogya.

Kɛ ɔyɛle mɔɔ meyɛ gyima wɔ Gyihova Alasevolɛ Ewiade Amuala Gyima Ne Ati mɔɔ wɔ New York, U.S.A. la na akee me nwo rale edwɛkɛ mɔɔ bɛlile ye wɔ Europe la anu ɛ?

EDWƐKPATƐLƐVOLƐMA MƆƆ BƆ MƆDENLE LA A TETELE ME A

Me awovolɛ, George nee Lucille wiele Geleade sukulu ne mɔɔ tɔ zo 12 la, na ɛnee bɛlɛsonle wɔ Ethiopia na bɛwole me wɔ ɛkɛ ne wɔ 1956. Bɛvale me bɛdonle ɛvoya mɔɔ limoa la anu edwɛkpakavolɛ Felepe. (Gyi. 21:8) Arane ne vale ɔ sa dole yɛ ɛzonlenlɛ ne azo wɔ 1957. Ɛnee mele ekyi ɛdeɛ, noko mekakye ye kpalɛ kɛ ɛnee me awovolɛ kɔfea ɛleka bie na bɛayɛ debiezukoalɛ. Kɛmɔ ɛnee mele kakula la ati, ɛnee mesuzu kɛ ɔle debie mɔɔ yɛ anyelielɛ! Noko wɔ 1960, arane mgbanyima dule yɛ vile maanle ne anu.

Me abusua ne dule hɔle Wichita, Kansas, U.S.A., na bɛammaa ɛlɔlɛ mɔɔ bɛlɛ wɔ ɛzonlenlɛ gyima ne anwo wɔ mekɛ mɔɔ ɛnee bɛle edwɛkpatɛlɛvolɛma la anga aze. Bɛvale nɔhalɛ ne bɛbɔle bɛ ɛbɛla yɛɛ bɛhilehilele me nee me diema raalɛ kpanyinli Judy yɛɛ me diema nrenyia kakula Leslie mɔɔ bɛwole bɛdabɛ noko wɔ Ethiopia la kɛ yɛhulo Gyihova na yɛva yɛ ahonle kɔsɔɔti yɛzonle ye. Menlile ɛvolɛ 13 la yɛɛ bɛzɔnenle me a. Ɛvolɛ nsa anzi, yɛ abusua ne dule hɔle Arequipa, Peru, ɛleka mɔɔ ɛnee bɛhyia moalɛ kpole la.

Wɔ 1974 mɔɔ ɛnee meli ɛvolɛ 18 la, Peru Bɛtɛle ne maanle me nee mediema mrenyia gyɛne nna bie yɛle adekpakyelɛ titilima. Ɛnee ɔwɔ kɛ yɛkɔyɛ edwɛkɛhanlɛ gyima ne wɔ ɛleka mɔɔ awie biala ɛtɛdile daselɛ wɔ ɛkɛ ne ɛlɛ la wɔ Andes Awoka ne mɔ azo. Ɛnee ɛhye kile kɛ ɔwɔ kɛ yɛdi menli mɔɔ bɛka Quechua nee Aymara aneɛ ne la daselɛ. Ɛnee yɛfa yɛ kale bie mɔɔ bɛyɛ ye kɛ sua mɔɔ ɛnee yɛta yɛfɛlɛ ye The Ark, ɔluakɛ ɛnee ɔzɔho ɛlɛka la a yɛtu adenle a. Mekakye ye kpalɛ kɛ ɛnee medua Baebolo ne azo memaa menli ne nwu ye kɛ ɔnrɛhyɛ, Gyihova baye ehyia, anwodolɛ nee ewule avi ɛkɛ. (Yek. 21:​3, 4) Bɛ nuhua dɔɔnwo razonlenle Gyihova.

MENGƆLE EWIADE AMUALA GYIMA NE ATI

Wɔ 1977 ne anu mɔɔ Albert Schroeder mɔɔ ɛnee ɔboka Gyihova Alasevolɛ Neazo Eku ne anwo la hɔkpɔlale Peru la, ɔmaanle me anwosesebɛ kɛ membiza ewiade amuala gyima ne ati Bɛtɛle ɛzonlenlɛ nwo adenle. Ɔti menyɛle ye zɔ. Yeangyɛ, wɔ June 17, 1977, membɔle me gyimayɛlɛ bo wɔ Brooklyn Bɛtɛle. Menyɛle gyima wɔ Cleaning and Maintenance department too ɛvolɛ nna.

Wɔ June 1978, menyiale Elizabeth Avallone wɔ maanle maanle avinli nyianu bie mɔɔ bɛyɛle ye wɔ New Orleans, Louisiana la abo. Ɔle kɛ medame la, awovolɛ mɔɔ bɛfa nɔhalɛ ne bɛbɔ bɛ ɛbɛla la a tetele ye a. Ɛnee Elizabeth ɛva ɛvolɛ nna ɛyɛ dahuu adekpakyelɛ, yɛɛ ɛnee ɔkulo kɛ ɔfa ye ngoane mekɛ kɔsɔɔti ɔyɛ dahuu ɛzonlenlɛ gyima ne. Ɛnee yɛta yɛkɛlɛ yɛ nwo ngɛlata. Yɛkanwu ye la, ɛnee ɛhulolɛ ne ɛkyekye yɛ bɔkɔɔ. Yɛgyale wɔ October 20, 1979, na yɛ mu nwiɔ yɛbɔle yɛ Bɛtɛle gyimayɛlɛ ne abo.

Mediema mɔɔ bɛwɔ Brooklyn Spanish, asafo mɔɔ yɛlimoale yɛhɔle nu anu la liele yɛ kɛnlɛma. Mekɛ ɛlɛkɔ la, yɛdɛnlanle asafo ngakyile nsa anu, ɛnee mediema ne mɔ lɛ ɛlɔlɛ yɛɛ bɛboale yɛ wɔ yɛ Bɛtɛle gyimayɛlɛ ne anu. Yɛ nye sɔ moalɛ mɔɔ bɛvale bɛmaanle yɛ yɛɛ kɛzi yɛ gɔnwo mɔ nee yɛ mbusuafoɔ boale yɛ maanle yɛnleanle yɛ awovolɛ wɔ mekɛ mɔɔ ɛnee bɛyɛ mgbanyinli la kpalɛ.

MENGƆMBOKALE YƐ MEDIEMA MƆƆ BƐDI EDWƐKƐ WƆ KƆƆTO LA ANWO

Wɔ January 1982, bɛhanle kɛ mengɔmboka Legal Department ne mɔɔ wɔ Bɛtɛle la anwo na ɔzinle me nwo kpole. Mɔɔ menyɛle gyima wɔ ɛkɛ ne ɛvolɛ nsa la, bɛmaanle mengɔle sukulu mɔɔ bɛsukoa mɛla nwo debie la amaa meanyia kɛlata mɔɔ bamaa meayɛ lɔya la. Mɔɔ melɛkɔ sukulu ne la, menwunle ye kɛ amuanrɛɛ konim ngakyile mɔɔ Gyihova Alasevolɛ lile wɔ kɔɔto ngakyile nu la a maa menli mɔɔ bɛwɔ United States nee ewiade ye ɛleka ngakyile la kola nyia nwolɛ adenle yɛ ninyɛne dɔɔnwo a. Me nye liele nwolɛ kpalɛ noko eza ɔzinle me nwo kpole. Saa yɛlɛsukoa debie a, bɛsuzu edwɛkɛ ɛhye mɔ anwo bɛkɔ moa kpalɛ.

Wɔ 1986, mɔɔ ɛnee meli ɛvolɛ 30 la, bɛkpale me kɛ menea Legal Department ne azo. Me nye liele ɛhye anwo noko eza ɔyele adwenleadwenle ɔdole me nwo, ɔluakɛ ɛnee metɛnyinle yɛɛ menze mɔɔ la me nyunlu a.

Bɛliele me bɛdole nu kɛ mele lɔya wɔ 1988, noko memaanle nwoma mɔɔ menzukoale ye wɔ sukulu la zɛkyele me sunsum nu gyinlabelɛ kpole kpalɛ mɔɔ meannwu nuhua fee a. Nwoma kpole ɛzukoalɛ kola maa awie yɛ angomedi na ɔnyia adwenle kɛ kɛmɔ yezukoa debie titili bie anwo debie la ati, ɔle kpalɛ ɔtɛla menli mɔɔ bɛtɛsukoale zɔhane ninyɛne ne mɔ bie la. Elizabeth boale me ɔmaanle menziale menyɛle sunsum nu ninyɛne mɔɔ ɛnee meyɛ kolaa na meahɔ sukulu ne la. Ɔliele mekɛ, noko ngyikyi ngyikyi me nwo gyinlanle me bieko wɔ sunsum nu. Mebahola meaha ye wienyi kɛ tɛ debie titili bie mɔɔ ɛsukoa nwolɛ debie wɔgua ɛ ti anu la a nwolɛ hyia kpalɛ wɔ ɛbɛlabɔlɛ nu a. Debie mɔɔ maa nvasoɛ ba awie ɛbɛlabɔlɛ zo la a le kɛ ɔ nee Gyihova banyia agɔnwolɛvalɛ kpalɛ na yeanyia ɔ nee ye menli ne anwo ɛlɔlɛ kpole.

YƐGYINLANLE EDWƐKPA NE ANZI YƐƐ YƐVALE YƐZIELE ƐKƐ NE WƆ MƐLA ADENLE ZO

Mɔɔ menwiele sukulu ne la, menvale me adwenle menziele kɛzi mebaboa legal department ne amaa yɛanlea yɛali mɛla nwo edwɛkɛ ngakyile mɔɔ wɔ Bɛtɛle la anwo gyima na yɛabɔ Gyihova ahyehyɛdeɛ ne nee nwolɛ adenle mɔɔ yɛlɛ yɛbɔ edwɛkpa ne nolo la anwo bane la azo. Ɛnee me gyima ne yɛ anyelielɛ noko ɛnee eza ɔyɛ se, ɔluakɛ ɛnee yɛ ahyehyɛdeɛ ne ɛlɛyɛ nzenzaleɛ dɔɔnwo ndɛndɛ. Kɛ neazo la, ɛnee yɛfa yɛ mbuluku ne mɔ yɛmaa awie mɔ a yɛbɔ ye bolɛ yɛdie ye ezukoa, noko wɔ 1990, bɛhanle bɛhilele Legal Department ne kɛ bɛkpondɛ adehilelɛ mɔɔ baboa yeamaa yɛagyakyi ɛhye ɛyɛlɛ la bɛrɛla. Mɔɔ yɛyɛle ye zɔ la anzi, akee saa Gyihova Alasevolɛ fa mbuluku maa a bɛmbɔ ye bolɛ bieko. Ɛhye maanle kɛzi bɛyɛ mbuluku nwo gyima wɔ Bɛtɛle nee kɛzi yɛfa yɛdi gyima wɔ azɛlɛsinli ne mɔ anu la anwo gyimayɛlɛ ne yɛle sikalɛ yɛɛ ɔmmaa yɛndua nwolɛ adwule mɔɔ nwolɛ ɛngyia la. Menli bie mɔ adwenle yɛle bɛ kɛ nzenzaleɛ ɛhye bamaa ahyehyɛdeɛ ne ezukoa awie na ɔnrɛmaa daselɛlilɛ gyima ne ɛnrɛhɔ zo. Noko yeamba ye zɔ ɛlɛ. Ɔvi 1990 mɔɔ ba la, menli mɔɔ ɛlɛsonle Gyihova la ɛyɛ mɔnwo nwiɔ nee ɔ nzi, na menli kola sukoa debie fi mbuluku mɔɔ gyi Baebolo ne azo la anu mɔɔ bɛndua ɛhwee a. Medame mumua ne menwu kɛ anwosesebɛ mɔɔ Gyihova fa maa nee adehilelɛ mɔɔ ɔdua akɛlɛ nɔhavo ne azo ɔfa ɔmaa la a maa nzenzaleɛ ɛhye nee nzenzaleɛ gyɛne dɔɔnwo mɔɔ bɛyɛ wɔ ahyehyɛdeɛ ne nu la yɛ boɛ a.—Ɛzɛ. 15:2; Mat. 24:45.

Tɛ lɔyama mɔɔ bɛze edwɛkɛ di kpalɛ mɔɔ yɛlɛ bɛ la ati a yɛdi konim wɔ kɔɔto a. Fane dɔɔnwo ne ala, subane kpalɛ mɔɔ Gyihova menli da ye ali la a maa ndɛnebuavolɛma ne di edwɛkɛ ne maa yɛ a. Menwunle ɛhye anwo neazo wɔ 1998, wɔ mekɛ mɔɔ Neazo Eku ne anu amra nsa nee bɛ ye mɔ hɔle nyianu titili bie wɔ Cuba la. Ɛnee yɛ nee arane mgbanyima ne mɔ ɛyia fane dɔɔnwo yɛha afoa biala mɔɔ yɛngyi wɔ maanyɛlɛ nu la yɛhile bɛ, noko kɛzi Neazo Eku ne anu amra ɛhye lale atiakunlukɛnlɛma ali na bɛhilele kɛ bɛbu mgbanyima ne mɔ la a maanle bɛliele yɛ edwɛkɛ ne bɛdole nu a.

Noko saa yɛ nee bɛ ka ye bɛtɛɛ na bɛande ɔ bo a, yemɔ ‘edwɛkpa ne mɔɔ yɛgyinla ɔ nzi na yɛalua mɛla adenle zo yɛava yɛazie ɛkɛ’ la ati, yɛfa edwɛkɛ ne yɛkɔ kɔɔto. (Fel. 1:7) Kɛ neazo la, wɔ ɛvolɛ dɔɔnwo anu, arane mgbanyima mɔɔ bɛwɔ Europe nee South Korea la anlie nwolɛ adenle mɔɔ yɛlɛ kɛ yɛnrɛhɔ sogya la ando nu. Ɔlua ɛhye ati, bɛguale yɛ mediema kɛyɛ 18,000 mɔɔ bɛwɔ Europe nee mediema mɔɔ bɛbo 19,000 mɔɔ bɛwɔ South Korea la efiade, ɔluakɛ bɛ adwenle ɛmmaa bɛ adenle kɛ bɛbahɔ sogya la ati.

Akee wɔ July 7, 2011, ECHR ne zile kpɔkɛ titili bie mɔɔ ɔwɔ kɛ bɛfa bɛdi gyima wɔ Europe amuala la wɔ Bayatyan v. Armenia edwɛkɛ ne anu, kɛ ɔwɔ kɛ bɛmaa menli mɔɔ bɛngulo kɛ bɛkɔ sogya la nwolɛ adenle bɛmaa bɛyɛ gyima gyɛne bɛsie ɔ gyakɛ anu. South Korea Constitutional Court ne noko lile mɛla ko ne ala bie wɔ June 28, 2018. Saa yɛ mediema mgbavolɛ ne mɔ anu ekyi bie bɔbɔ angola gyinla a, anrɛɛ yɛnrɛhola yɛnrɛli konim ɛhye.

Legal department ne mɔɔ wɔ ewiade amuala gyima ne ati nee bɛtɛle ngakyile ne mɔ anu la ɛlɛyɛ gyima ɛsesebɛ agyinla nwolɛ adenle mɔɔ yɛlɛ yɛsonle Gyihova na yɛbɔ Belemgbunlililɛ ne anwo edwɛkpa ne nolo la anzi. Ɔle enililɛ ɔmaa yɛ kɛ yɛgyinla yɛ mediema mɔɔ arane mgbanyima dwazo tia bɛ la agyakɛ anu yɛdi bɛ edwɛkɛ yɛmaa bɛ wɔ kɔɔto la. Saa yɛfa edwɛkɛ yɛkɔ kɔɔto na yɛdi konim o, yɛanli konim o, ɔmaa yɛnyia nwolɛ adenle yɛdi amɛnladoma nee arelemgbunli yɛɛ maanle maanle ne mɔ daselɛ. (Mat. 10:18) Ɔwɔ kɛ ndɛnebuavolɛma, arane mgbanyima, menli mɔɔ bɛyɛ gyima wɔ TV nee riledio zo yɛɛ maanlema ne amuala suzu ngɛlɛlera mɔɔ yɛbahɛlɛ yɛaboka yɛ edwɛkɛ ne anwo ɔ nee mɔɔ yɛbaha ye wɔ yɛ nloa anu wɔ mekɛ mɔɔ yɛlɛdi edwɛkɛ ne la anwo. Menli mɔɔ lɛ ahonle kpalɛ la nwu kɛzi Gyihova Alasevolɛ de nee debie mɔɔ bɛ diedi ne gyi zo la. Menli ɛhye mɔ bie ɛrayɛ yɛ mediema diedima.

GYIHOVA, MEYƐ WƆ MO!

Wɔ ɛvolɛ mɔɔ bo 40 la anu, menyia nwolɛ adenle me nee mediema mɔɔ bɛwɔ bɛtɛle ngakyile nu wɔ ewiade amuala la ɛbɔ nu ɛli edwɛkɛ wɔ kɔɔto ngakyile nu yɛɛ yɛhɔ kɔɔto mgbole dɔɔnwo anu na yemaa yɛyia arane mgbanyima dɔɔnwo. Mekulo me mediema mɔɔ me nee bɛ yɛ gyima wɔ Legal Department ne mɔɔ wɔ ewiade amuala gyima ne ati nee mɔɔ bɛwɔ Bɛtɛle ngakyile nu la yɛɛ me nye die bɛ nwo. Menyia nyilalɛ dɔɔnwo yɛɛ me ahonle tɔ me azule nu.

Elizabeth ɛvi nɔhalɛlilɛ nee ɛlɔlɛ nu ɛboa me wɔ ɛvolɛ mɔɔ bo 45 la anu wɔ mekɛ kpalɛ nee mekɛ ɛtane nu. Me nye sɔ mɔɔ ɔyɛ la kpalɛ ɔluakɛ, ɔnva nwo kɛ yenyia ewule bie mɔɔ ɔta ɔmaa ɔ nwo yɛ ye bɛtɛɛ la, ɔkɔ zo ɔboa me.

Yɛnwu ye yɛ nye zo kɛ tɛ yɛdayɛ mumua ne yɛ mɔdenlebɔlɛ a maa yɛnyia anwosesebɛ na yɛdi konim a. Emomu, kɛ mɔɔ Devidi hanle la, “Gyihova le ye menli ne anwosesebɛ.” (Edw. 28:8) Amgba, “konle ne le Gyihova ɛdeɛ.”