Fa Yɛ Intanɛte Gyimalilɛ Ɛleka Ne Di Gyima Wɔ Daselɛlilɛ Nu​—“Baebolo Kpuyia Mɔɔ Bɛbua”

Saa ɛkɔ jw.org na ɛbuke “Bible Teachings” foa ne a, ɛbanwu “Bible Questions Answered” wɔ ɛkɛ. Saa yɛnwu kpuyia ɛhye mɔ mɔɔ bɛta bɛbiza la kpalɛ a, yɛbahola yɛamaa suamenlema mɔɔ kɛbiza yɛ kpuyia ɛhye mɔ bie la anwu mualɛ ne wɔ yɛ Intanɛte gyimalilɛ ɛleka ne. Yɛbahola yɛava kpuyia ɛhye mɔ yɛabɔ adawubɔlɛ bo wɔ daselɛlilɛ nu. Yɛbahola yɛakpa kpuyia ɛhye mɔ ko nee kɛzi bɛhilehile nu wɔ jw.org ne azo mɔɔ menli anye die nwo wɔ yɛ azɛlɛsinli ne anu la, yɛabiza suamenle ne adwenle wɔ nwo, na akee yɛaha mɔɔ Baebolo ne ka la yɛahile ye. Akee yɛbahola yɛaha anzɛɛ yɛahile ye ɛleka mɔɔ yɛnyianle yɛ edwɛkɛ ne la. Eza yɛbahola yɛamaa yeagenga mualɛ ne wɔ Intanɛte gyimalilɛ ɛleka ne. Neavolɛ adenduvo bie aye ɛva ɛhye ɛli gyima na yeboa kpalɛ. Ɔka kɛ: “Menli dɔɔnwo ɛngola ɛnnwu ye, ‘Saa Nyamenle a ɛlɛmaa yɛanwu amaneɛ a.’ Ɛkulo kɛ ɛnyia nwolɛ mualɛ ne wɔ kɛkɛ 51 anu ɔ?” Akee ɔbɔ mualɛ ne mɔɔ yehwe yegua ye moba ne azo la ɔmaa ɔtie. Ɔfa Baebolo ne Kilehile tile 11 ne ɔkile ye ɔfa ɔdwula adawubɔlɛ ne.