Fa jw.org Di Gyima Wɔ Daselɛlilɛ Nu

Yɛ Intanɛte gyimalilɛleka ne ɛlɛboa yɛ kpalɛ yeamaa yɛabɔ edwɛkpa ne nolo wɔ “aleɛabo ɛleka biala.” (Gyi. 1:8) Suamenlema dɔɔnwo ɛnze jw.org ne. Saa nolobɔlɛnli bie ka nwolɛ edwɛkɛ a, yɛɛ bɛ adwenle kɔ zo a.

Neavolɛ adenduvo bie ɛhwe Duzu Ati A Ɔwɔ Kɛ Ɛsukoa Baebolo Ne A? video ne ɛgua ye fonu zo na ɔnyia nwolɛ adenle biala a ɔye. Kɛ neazo la, saa ɔkɔ azua nu a, ɔka kɛ: “Melɛfa mekɛ ekyi meakpɔla menli meaboa bɛ meamaa bɛanyia kpuyia nsa mɔɔ hyia la anwo mualɛ: Duzu ati a ngyegyelɛ ɛbu ewiade ye anu ɛ? Kɛzi Nyamenle bali nwolɛ gyima ɛ? Yɛɛ kɛ ɔkɛyɛ na yɛagyinla ɔ nloa ɛ? Mualɛ ne wɔ video ezinra ɛhye anu.” Ɔka ɔwie a, ɔbɔ video ne abo na akee yeanlea kɛzi suamenle ne bayɛ ye nyɛleɛ la. Kɛmɔ video ne yɛ anyelielɛ la ati menli dɔɔnwo ɛlɛnea a bɛnye bɛ nye kɔkpula kɛ ɔbawie. Akee neavolɛ adenduvo ne ka kɛ: “Ɛdele kɛ ɛbahola wɔalua Intanɛte ne azo wɔabiza Baebolo ɛzukoalɛ nwo adenle. Mebahola meahile wɔ kɛzi bɛyɛ ye la kɛkala.” Saa suamenle ne die to nu a, ɔfa Edwɛkpa brohyua ne ɔkile ye kɛzi bɛyɛ ye la. Saa suamenle ne ɛnlɛ mekɛ a, ɔyɛ ngyehyɛleɛ kɛ ɔba bieko a ɔbahile ye. Saa ɔkɔ kɛ ɔkakpondɛ aleɛ bie yeali a, ɔka edwɛkɛ ko ne ala bie ɔkile awie mɔɔ de ɔ nwo ɛkɛ ne la wɔ mekɛ mɔɔ adawubɔlɛ ɛlɛkɔ zolɛ la. Ɛlɛfa jw.org wɔali gyima wɔ wɔ daselɛlilɛ nu ɔ?