Yɛbɔ Mɔdenle Yɛnyia Anyuhɔlɛ Wɔ Daselɛlilɛ Nu—Yɛyɛ Anyelielɛ Ne Anwo Kɛlɛtokɛ

“Nea ɛ nwo boɛ na nea wɔ ngilehilelɛ ne boɛ.” (1 Tem. 4:16) Edwɛkɛ ɛhye mɔɔ sunsum ne hanle ɛzoanvolɛ Pɔɔlo manle ɔhanle ɔhilele Temɔte la kile kɛ, ɔnva nwo kɛ yɛle fofolɛ anzɛɛ yɛlɛ anwubielɛ la, ɔwɔ kɛ yɛbɔ mɔdenle yɛnyia anyuhɔlɛ kɛ edwɛkpakavolɛma. Amaa yɛayɛ zɔ la, bɛbava edwɛkɛ fofolɛ bie mɔɔ ati se, “Yɛbɔ Mɔdenle Yɛnyia Anyuhɔlɛ Wɔ Daselɛlilɛ Nu” la bɛara Yɛ Belemgbunlililɛ Gyima ne anu. Edwɛkɛ ko biala bazuzu mɔdenlebɔlɛ ko mɔɔ hyia la anwo, na yeava kɛzi yɛbahola yɛayɛ zɔ la anwo nzuzulɛ bie mɔ yɛamaa. Wɔ siane ne anu, bɛbamaa yɛ muala anwosesebɛ kɛ yɛli zɔhane mɔdenlebɔlɛ ne anwo gyima titile. Saa siane ne ba awieleɛ a, Ɛzonlenlɛ Nyianu foa bie bamaa yɛanyia adenle yɛahile kɛzi zɔhane mɔdenlebɔlɛ ne mɔɔ yɛvale yɛ adwenle yɛziale zo boale yɛ la. Siane ɛhye anu, bɛlɛmaa yɛ anwosesebɛ kɛ yɛbɔ mɔdenle yɛyɛ anyelielɛ ne anwo kɛlɛtokɛ.

Deɛmɔti Ɔhyia La: Saa yɛbayɛ yɛ gyima ne bɔkɔɔ a, ɔnle kɛ yɛka edwɛkɛ ne ala. Ɔwɔ kɛ yɛsia yɛkɔ menli mɔɔ hilele nwolɛ anyelielɛ la ɛkɛ na yɛkilehile bɛ, amaa yɛagugua nɔhalɛ ma ne azo nzule. (Mat. 28:19, 20; 1 Kɔl. 3:6-9) Ɛhye kile kɛ ɔwɔ kɛ yɛnwu ahenle bieko, yɛka mɔɔ hyia ye la anwo edwɛkɛ, na yɛtoa adwelie mɔɔ yɛlile la azo. Ɛhye ati, saa yɛnyia awie mɔɔ anye die nwolɛ la a, ɔhyia kɛ yɛyɛ nwolɛ kɛlɛtokɛ.