Ɔwɔ Kɛ Bɛgugua Nzule Wɔ Ma Zo Amaa Yeanyi
1. Duzu a ɔwɔ kɛ yɛgugua zolɛ nzule amaa yeanyi a?
1 Ɔwɔ kɛ bɛgugua nzule wɔ ma mɔɔ bɛkɛlua wɔ tola nu la azo amaa yeanyi. Zɔhane ala a ɔde wɔ nɔhalɛ ma ne mɔɔ yɛdua wɔ menli mɔɔ wɔ yɛ azɛlɛsinli ne anu ahonle nu la anwo a. (1 Kɔl. 3:6) Saa yɛkulo kɛ bɛsosɔ ndinli, bɛnyi na bɛyɛ kpalɛ a, ɔwɔ kɛ yɛyɛ sia kɔkpɔla na yɛfa Nyamenle Edwɛkɛ ne yɛgugua nzule wɔ sɛkɛlɛneɛ adenle zo ma ɛhye mɔ azo.
2. Kɛzi yɛbahola yɛaboa suamenle ne yɛamaa ɔ nye alie debie bieko mɔɔ yɛbazukoa la anwo ɛ?
2 Biza Kpuyia: Saa ɛsiezie edwɛkɛ mɔɔ ɛbaha la a, duzu ati a eza ɛmkpondɛ kpuyia bie mɔɔ yɛ anyelielɛ mɔɔ ɛbahola wɔabua wɔ mekɛ mɔɔ ɛbayɛ sia kɔkpɔla la ɛ? Biza kpuyia ne wɔ mekɛ mɔɔ lumua mɔɔ bɛkɛdendɛ bɛkɛwie la, na yɛ ngyehyɛleɛ kpalɛ sia kɔ ye ɛkɛ. Menli dɔɔnwo ɛnwu kɛ nvasoɛ wɔ zo kɛ bɛbakpondɛ debie bɛavi Baebolo ne Kilehile buluku ne anu mɔɔ bamaa bɛava bɛahile kɛzi bɛyɛ Baebolo ɛzukoalɛ la.
3. Edwɛkɛ boni a ɛbahola wɔava wɔaboka wɔ kɛlɛtokɛ ne anwo a?
3 Yɛ Kɛlɛtokɛ: Ɛ nee awie tendɛ wɔ mekɛ mɔɔ lumua la anu ɛwie ala a, yɛ nwolɛ kɛlɛtokɛ. Kɛlɛ ahenle duma nee ye address. Eza ɔle kpalɛ kɛ ɛyɛ kenle nee mekɛ mɔɔ ɛ nee ye dendɛle, mɔɔ bɛhanle nwolɛ edwɛkɛ yɛɛ buluku mɔɔ bie a ɛvale ɛmanle ye la anwo kɛlɛtokɛ. Ɔhanle kɛ ɔkɔ asɔne bie ɔ? Ɔlɛ abusua ɔ? Asoo ɔhanle ninyɛne mɔɔ ɔ nye die nwo nee mɔɔ gyegye ye la anwo edwɛkɛ? Edwɛkɛ zɛhae bamaa wɔanwu mɔɔ ɛsia ɛkɔ ye ɛkɛ a ɛ nee ye bazuzu nwolɛ la. Kɛlɛ mekɛ mɔɔ ɛhanle kɛ ɛbazia wɔahɔ ye ɛkɛ nee kpuyia mɔɔ ɛbabua la noko to ɛkɛ.
4. Saa yɛlɛboa awie mɔɔ anye die edwɛkɛ ne anwo la a, duzu ati a ɔnle kɛ yɛgyakyi ɛ?
4 Mmagyakyi: Seetan ɛnrɛgyakyi mɔdenle mɔɔ ɔlɛbɔ kɛ ‘ɔye edwɛkɛ ne yeavi’ menli adwenle nu la. (Mak. 4:14, 15) Ɛhye ati, saa ɛkɔ ahenle sua nu biala a ɛndo ye a mmamaa ɛ sa nu to. Ɛbahola wɔahɛlɛ ye kɛlata anzɛɛ wɔahɛlɛ debie wɔava wɔazia ye anlenkɛ ne anu ɔ? Adekpakyelɛnli ko nee raalɛ bie zukoale debie wɔ anlenkɛnloa noko ɛnee ɔkɔ raalɛ ne sua nu biala a ɔndo ye, yemɔti ɔhɛlɛle kɛlata ɔmanle ye. Ɔyɛle dedee mɔɔ adiema raalɛ ne hɔdole ye wɔ sua nu la, raalɛ ne hanle kɛzi ɔyɛ ye fɛ kpole kɛ ɔdwenle ɔ nwo la. Mekɛ mɔɔ yɛlɛgugua nɔhalɛ ma ne azo nzule la, yɛ nye balie kɛ yɛkɛnwu kɛ bɛlɛfifi, bɛanyi na ‘bɛazo ma mɔnwo abulasa, abulasia yɛɛ ɛya.’—Mak. 4:20.