Yɛbɔ Mɔdenle Yɛnyia Anyuhɔlɛ Wɔ Daselɛlilɛ Nu—Kile Menli Nwo Anyelielɛ

Deɛmɔti Ɔhyia La: Gyisɛse nwunle menli ne kɛ asolo bɛ nuhua ko biala, na ɔhilele bɛ nwo anyelielɛ. Kɛ neazo la, kenle ko bie Gyisɛse nwunle ye kɛ nrenya bie mɔɔ anzo ɛdi la ɛyɛ basaa, yemɔti mekɛ mɔɔ ɔyɛ ye ayile la, ɔvale ye ɔhɔle ahane amaa ɛlɔne ne annwu ye. (Maake 7:31-35) Ɔnwunle ye ɛdoavolɛma ne sinlidɔlɛ yemɔti yeanga edwɛkɛ dɔɔnwo yeangile bɛ. (Dwɔn 16:12) Mɔɔ Gyisɛse wɔ anwuma bɔbɔ la, ɔhilele menli nwo anyelielɛ. (2 Tem. 4:17) Kɛ Kelaese ɛdoavolɛma la, yɛkpondɛ kɛ yɛfa ɔ gyakɛ. (1 Pita 2:21; 1 Dwɔn 3:16, 18) Eza saa yɛdwenle suamenle ne tɛnlabelɛ, mɔɔ ɔ nye die nwo nee mɔɔ ɔdwenle nwo la anwo a, yɛ ɛzonlenlɛ gyima ne bazo ma. Saa suamenle ne nwu kɛ tɛ kɛ yɛlɛba yɛaraha edwɛkɛ anzɛɛ yɛamaa ye buluku ala, na emomu yɛkulo ye edwɛkɛ a, ɔbadie.

Kɛzi Bɛyɛ Ye La:

Siezie ɛ nwo kpalɛ. Mmapele ɛ nwo, sele na da agɔnwolɛvalɛ subane ali.
Gua ɛ nye aze nea ninyɛne mɔɔ wɔ ɛkɛ la. Ɛnea a ahenle ne lɛ ngakula ɔ? ɔ nye die egyinli anzɛɛ nyɛmoa nwo ɔ? ɔlɛ diedi bie mɔ ɔ? Bie a ɛbahola wɔamaa wɔ edwɛkɛ ne avane ye tɛnlabelɛ ne anwo.
Maa ɔhile ye adwenle na nyia abotane tie ye kpalɛ. Nea ɔ nyunlu maa ɔnwu kɛ ɛlɛtie ye. Saa ɔkile ye adwenle ɔwie a, ɛbahola wɔavi ahonle nu wɔayɛ ye mo. Ɛ nee ye mmasu kpolera.
Kakyihakyi wɔ edwɛkɛ nu. Saa ɔbayɛ boɛ a, maa wɔ edwɛkɛ ne ɛvane mɔɔ ahenle baha la anwo. Mmadwenle kɛ ɛhye ɛyɛlɛ yɛ se, ɔluakɛ yɛ trate, brohyua nee magazine ne mɔ ka edwɛkɛ ngakyile dɔɔnwo. Saa ɛnwu kɛ mekɛ mɔɔ wɔhɔ ye ɛkɛ ne la ɛnle kpalɛ ɔluakɛ bie a ɔnlɛ alagye a, maa wɔ edwɛkɛ ne ɛyɛ sikalɛ.

Sɔ Ɛhye Nea Wɔ Siane Ɛhye Anu:

Bɛyɛ ɛhye wɔ bɛ nɔsolɛ abusua ɛzonlenlɛ ne abo anzɛɛ saa bɛwɔ daselɛlilɛ nu na suamenle ne ka edwɛkɛ bie a nolobɔlɛnli ne ɛhakyi ye edwɛkɛ ɛdeɛ ne ɔmaa ɔvane nwolɛ.
Saa bɛlɛyɛ daselɛlilɛ ayia a, adiema ne mɔɔ banlea zolɛ la bahola aha anzɛɛ ayɛ kɛzi bɛbahola bɛahile awie anwo anyelielɛ la anwo yɛkile.