Yɛbɔ Mɔdenle Yɛnyia Anyuhɔlɛ Wɔ Daselɛlilɛ Nu​—Yɛyɛ Sia Kɔkpɔla Nwo Ngyehyɛleɛ

DEƐMƆTI ƆHYIA LA:

Yɛkpondɛ kɛ yɛgugua nɔhalɛ ma ne mɔɔ yɛdua la azo nzule. (1Kɔ 3:6) Saa yɛyia awie mɔɔ ɔ nye die edwɛkɛ ne anwo la a, ɔle kpalɛ kɛ yɛbabiza ye kpuya mɔɔ yɛba bieko a yɛ nee ye bazuzu nwolɛ la. Ɛhye bamaa suamenle ne anye ala kɛ yɛbara, na ɔnrɛmaa sia kɔkpɔla ne ɛnrɛyɛ se. Saa yɛsia yɛkɔ a, yɛbahola yɛaha yɛahile ye kɛ yɛra kɛ yɛbabua ɛkenle kpuya ne mɔɔ yɛbizale ye la.

KƐZI BƐYƐ YE LA:

• Saa ɛlɛsiezie edwɛkɛ mɔɔ ɛbaha wɔ azua nu la a, fa kpuya mɔɔ ɛkɔ bieko a ɛbabua la boka nwo. Kpuya ne bahola ayɛ edwɛkɛ mɔɔ bɛbua mɔɔ wɔ buluku mɔɔ ɛlɛfa wɔamaa la anu. Anzɛɛ kpuya mɔɔ nwolɛ mualɛ ne wɔ mbuluku mɔɔ yɛfa yɛyɛ debiezukoalɛ mɔɔ saa ɛsia ɛkɔ a ɛbahola wɔava wɔahile ye la anu.

• Saa ɛ nee awie mɔɔ ɔ nye liele edwɛkɛ ne anwo la tendɛ wie a, maa ɔnwu ye kɛ ɛkulo kɛ ɛsia ɛba na akee ka kpuya ne mɔɔ wɔziezie kɛ ɛba bieko a ɛ nee ye bazuzu nwolɛ la kile ye. Saa ɔbayɛ boɛ a, ɛbahola wɔalie ye adelɛse anzɛɛ fonu nɔma.

• Saa ɛkile ye mekɛ fɔɔnwo bie kɛ ɛbazia wɔara a, kɔ.​—Mt 5:37.