Ɛbahola Wɔahɔ Nɔsolɛ Nu Daselɛlilɛ Ɔ?
1. Kɛmɔ nwomanli ko hanle la, mekɛ boni a ɛnee ɛzoanvolɛ Pɔɔlo ta di daselɛ wɔ azua nu a?
1 Buluku ne mɔɔ se, Daily Life in Bible Times la kile kɛ ɛnee ɛzoanvolɛ Pɔɔlo ta di daselɛ wɔ azua nu “ɔvi ewiazo dɔne 4 toonwo aledwolɛ.” Yɛnze saa ɛnee kɛ Pɔɔlo ngyehyɛleɛ ne de la ɛne, noko yɛze kɛ ɛnee Pɔɔlo lɛ ɛhulolɛ kɛ ‘ɔbayɛ ɛhye mɔ amuala wɔ edwɛkpa ne ati.’ (1 Kɔl. 9:19-23) Ɛhye bie a le kɛ ɔbayɛ ngyehyɛleɛ yeahɔ azua nu wɔ mekɛ mɔɔ ɔbado menli dɔɔnwo la.
2. Duzu ati a ɔle kpalɛ kɛ yɛkɔ nɔsolɛ nu daselɛlilɛ ɛ?
2 Nolobɔlɛma mɔɔ wɔ ɛleka dɔɔnwo la ta kɔ azua nu nwonlomɔ wɔ dapɛne ne anu. Noko, asoo ɛhye a tɛde mekɛ kpalɛ wɔ bɛ ɛkɛ a? Adekpakyelɛnli ko ka ye azɛlɛsinli ne anwo edwɛkɛ kɛ: “Awie biala ɛnle sua nu wɔ alehyenlɛ ne anu. Noko ɔdwu nɔsolɛ a menli dɔɔnwo wɔ sua nu.” Nɔsolɛ nu daselɛlilɛ bahola amaa yɛanyia adenle kɛnlɛma yɛabɔ edwɛkpa ne nolo yɛahile mrenya titile. Suamenle ne mɔ ta die bɛ menle wɔ sua nu yɛɛ bɛkulo kɛ bɛdi adwelie. Saa mgbanyima ne mɔ nea na ɔbaboa a, ɔwɔ kɛ bɛyɛ daselɛlilɛ nwo ngyehyɛleɛ wɔ nɔsolɛ nu.
3. Kɛ ɔkɛyɛ na yɛahile kɛ yɛlɛ nwunu wɔ mekɛ mɔɔ yɛlɛdi daselɛ nɔsolɛ nu la ɛ?
3 Ɔhyia Nwunu: Nɔsolɛ nu daselɛlilɛ hyia nwunu. Kɛ neazo la, saa ɛnwu kɛ ɔnle kpalɛ ɔmmaa suamenle ne, le kɛ mekɛ mɔɔ ɔlɛdi debie la a, ɔle kpalɛ kɛ ɛbaha kɛ ɛbara nzinlii. Saa awozinli wɔ nu a, gyinla ɛleka mɔɔ suamenle ne banwu wɔ la, na yɛ ye ndɛndɛ da ɛ nwo ali nee bodane mɔɔ ɔti ɛlɛba ye ɛkɛ la. Eza nrɛlɛbɛ wɔ nu kɛ menli nwiɔ balua nwo anzɛɛ bɛbalua kɛ ekpunli yɛɛ ɔwɔ kɛ ɛgyinla ɛleka mɔɔ le wienyi mɔɔ ɔnrɛha ɛ ngomekye la. Mmakɔ nɔɔzo somaa mɔɔ ɔbagyegye suamenle ne mɔ mɔɔ bɛlɛda la. (2 Kɔl. 6:3) Saa ɛleka ne bie yɛ ɛzulolɛ nɔsolɛ nu a, di daselɛ wɔ ɛkɛ ne alewɔzo.—Mrɛ. 22:3.
4. Nyilalɛ boni a wɔ nɔsolɛ nu daselɛlilɛ zo a?
4 Nyilalɛ: Saa yɛkola yɛdi menli daselɛ a ɔmaa yɛ nye die wɔ daselɛlilɛ nu. Yɛdi daselɛ dɔɔnwo noko a yɛɛ yɛnyia adenle yɛboa awie mɔ yɛmaa ‘bɛnwu nɔhalɛ ne na bɛnyia ngoane a.’ (1 Tem. 2:3, 4) Asoo ɛbahola wɔayɛ wɔ ngyehyɛleɛ kpalɛ na wɔahɔ nɔsolɛ nu daselɛlilɛ?