Moalɛ Maa Mbusua
1. Kɛzi dapɛne biala Ɛnwomenlelielɛ ne boale Yizilayɛ mbusua ɛ?
1 Ɛnwomenlelielɛ ne ɛnee le ngyehyɛleɛ mɔɔ Gyihova vi ɛlɔlɛ nu yɛle manle ɔboale mbusua a. Yizilayɛma liele bɛ ɛnwomenle vile gyima mɔɔ bɛyɛ ye dahuu la anwo na bɛnyianle mekɛ bɛzuzule Gyihova kpalɛyɛlɛ nee agɔnwolɛvalɛ mɔɔ bɛ nee ye lɛ la anwo. Ɛnee awovolɛ kola dua adenle ɛhye azo kilehile bɛ mra Mɛla ne bɛmaa ɔka bɛ ahonle. (Mɛla 6:6, 7) Ɛnwomenlelielɛ ne manle Gyihova menli nyianle mekɛ vale bɛ adwenle ziele bɛ ɛzonlenlɛ ne azo dapɛne biala.
2. Duzu a Ɛnwomenlelielɛ ne maa yɛnwu ye wɔ Gyihova anwo a?
2 Nɔhalɛ nu, Gyihova ɛmkpondɛ kɛ mbusua di Ɛnwomenlelielɛ ne bieko. Noko akee, mɛla ne maa yɛnwu Nyamenle anwo debie. Ye menli sunsum nu boɛyɛlɛ hyia ye dahuu. (Aye. 48:17, 18) Ɛnɛ, adenle ko mɔɔ Gyihova dua zo da ye menli nwo ɛlɔlɛ ɛhye ali la a le Abusua Ɛzonlenlɛ nɔsolɛ ne.
3. Abusua Ɛzonlenlɛ nɔsolɛ ne bodane a le duzu?
3 Abusua Ɛzonlenlɛ Nɔsolɛ Ne Bodane A Le Duzu? Wɔ January 2009, yɛbɔle ɔ bo kɛ yɛfa Asafo Buluku Ɛzukoalɛ nee Teokelase Ɛzonlenlɛ Sukulu ne yɛɛ Ɛzonlenlɛ Nyianu ne yɛabɔ nu yɛayɛ. Adwenle ko mɔɔ ɔti bɛyɛle nzenzaleɛ ɛhye la a le kɛ bɛmaa mbusua anyia adenle aye nɔsolɛ bie azie ɛkɛ bɛava bɛayɛ abusua ɛzonlenlɛ amaa bɛ sunsum nu gyinlabelɛ ne anu amia. Bɛmanle abusua biala dele ɔ bo kɛ, saa ɔkɛyɛ boɛ a, ɔva ye abusua debiezukoalɛ ne ɔhɔ nɔsolɛ ne mɔɔ ɛnee yɛfa yɛyɛ buluku ɛzukoalɛ ne la, na bɛva mekɛ ɛhye bɛdo bɛ bo aze bɛzukoa Baebolo ne na bɛbɔ nwolɛ adawu bɛva bɛli abusua ne ngyianlɛ nwo gyima.
4. Ɔwɔ kɛ abusua adawubɔlɛ ne yɛ dɔnehwele ko ɔ? Kilehile nu.
4 Amaa yɛahola yɛahɔ Asafo Buluku Ɛzukoalɛ ne la, ɛnee ɔwɔ kɛ yɛnyia mekɛ yɛsiezie yɛ nwo, yɛfo kale nee mɔɔ bokɛboka nwo la. Wɔ yɛ nuhua dɔɔnwo afoa nu, dɔnehwele ko debiezukoalɛ ɛhye ɛnee die yɛ mekɛ dɔɔnwo. Nzenzaleɛ ɛhye mɔɔ bɛyɛ wɔ yɛ debiezukoalɛ ne anu la bamaa yɛahola yɛava mekɛ ɛhye yɛazonle Gyihova kɛ abusua. Ɛhye ati, ɔngyia kɛ yɛmaa yɛ Abusua Ɛzonlenlɛ nɔsolɛ ne yɛ dɔnehwele ko ala. Emomu, ɔwɔ kɛ yɛsuzu yɛ abusua ne ngyianlɛ nee sinlidɔlɛ nwo na yɛye mekɛ dodo mɔɔ yɛbava yɛali nwolɛ gyima la.
5. Ɔwɔ kɛ bɛfa mekɛ ne amuala bɛbɔ nu bɛbɔ adawu ɔ? Kilehile nu.
5 Ɔwɔ Kɛ Bɛfa Mekɛ Ne Amuala Bɛbɔ Nu Bɛbɔ Adawu Ɔ? Saa agyalɛma nee mbusua mɔɔ bɛlɛ ngakula la bɔ nu suzu Ngɛlɛlera ne anu edwɛkɛ nwo a, bɛmaa bɛ nwo anwosesebɛ. (Wulo. 1:12) Ɔka abusua ne ɔbɔ nu. Ɛhye ati, ɔwɔ kɛ Ngɛlɛlera ne anu adawubɔlɛ yɛ debie mɔɔ hyia wɔ Abusua Ɛzonlenlɛ nɔsolɛ ne anu. Noko akee, abusua ne anu sonla ko biala noko bahola anyia mekɛ ayɛ ɔ ti anwo debiezukoalɛ. Kɛ neazo la, saa bɛyia nuhua bɛbɔ adawu bɛwie a, abusua ne bahola abɔ nu adɛnla ɛkɛ wɔ mekɛ mɔɔ bɛ nuhua ko biala ɛlɛkɔ zo azukoa ye debie la, wɔannea a bɛ nuhua ko baziezie ɔ nwo amaa debiezukoalɛ anzɛɛ yeagenga magazine ne mɔ bie. Mbusua bie mɔ yɛ kɛ bɛnrɛnlea tɛlevihyɛne wɔ zɔhane nɔsolɛ ne anu.
6. Kɛzi ɔwɔ kɛ adawubɔlɛ ne yɛ ɛ?
6 Kɛzi Ɔwɔ Kɛ Adawubɔlɛ Ne Yɛ Ɛ? Ɔngyia kɛ dahuu ɔyɛ kɛ kpuyia nee mualɛ adawubɔlɛ la. Amaa Abusua Ɛzonlenlɛ nɔsolɛ ne ayɛ kɛnlɛma nee anyelielɛ la, mbusua dɔɔnwo yɛ bɛ ngyehyɛleɛ ne kɛ dapɛne ne anu debiezukoalɛ ne la. Bɛkyehyɛ adawubɔlɛ ne anu bɛyɛ ye afoa ngakyile na bɛdua ndenle ngakyile zo bɛdi nwolɛ gyima. Kɛ neazo la, bɛkola bɛbɔ nu bɛkenga Baebolo ne, bɛsiezie debiezukoalɛ foa ne bie, na bɛyɛ mɔɔ bɛbaha ye daselɛlilɛ nu la anwo yɛkile. Adehilelɛ bie mɔ wɔ mukelɛ 6.
7. Duzu a ɔwɔ kɛ awovolɛ nea yɛ a?
7 Duzu A Ɔwɔ Kɛ Awovolɛ Nea Yɛ A? Wɔ abusua ne bazukoa debie kpalɛ a, ɔwɔ kɛ bɛte nganeɛ kɛ ɛlɔlɛ nee anzondwolɛ wɔ ɛleka mɔɔ bɛyɛ debiezukoalɛ ne la. Ɔyɛ na maanle nu le kpalɛ a bɛbahola bɛazukoa debie wɔ alie nwo. Saa ɔhyia a bɛmaa bɛ adenle bɛmaa bɛdwazo ekyii. Mbusua bie mɔ di anzɛɛ bɛno debie ekyi wɔ mekɛ mɔɔ bɛkɛkpɔne la. Awovolɛ ɛnrɛlua Abusua Ɛzonlenlɛ nɔsolɛ ne azo ɛnrɛdea anzɛɛ ɛnrɛha awie anyunlu ɛdeɛ, noko bɛbahola bɛava mekɛ ne bie bɛali ngyegyelɛ bie mɔɔ bɛyɛ ye nzonlɛ la anwo gyima. Noko akee, ɔkɛyɛ kpalɛ kɛ bɛkɛnyia mekɛ fofolɛ wɔ dapɛne ne anu na bɛ nee kakula bie kɛzuzu ye edwɛkɛ bie mɔɔ awie te a ɔkɛgyegye ye la anwo wɔ fealera nu amaa bɛangua ɔ nyunlu aze wɔ ɔ mediema ne mɔ anyunlu. Ɔnle kɛ Abusua Ɛzonlenlɛ nɔsolɛ ne yɛ nwenle mɔɔ anyelielɛ biala ɛnle nu a, emomu, ɔwɔ kɛ ɔmaa ɔda ali kɛ yɛsonle anyelielɛ Nyamenle ne.—1 Tem. 1:11.
8, 9. Anwoziezielɛ boni a ɔwɔ kɛ mbusua tile yɛ a?
8 Kɛzi Abusua Tile Ne Bahola Aziezie Ɔ Nwo Ɛ? Saa debiezukoalɛ ne baboa abusua ne kpalɛ a, ɔwɔ kɛ abusua tile ne dumua siezie ɔ nwo maa Abusua Ɛzonlenlɛ nɔsolɛ ko biala na ɔnwu debie mɔɔ ɔwɔ kɛ bɛbɔ nwolɛ adawu nee adenle kpalɛ mɔɔ bɛbalua zo bɛayɛ ye la. (Mrɛ. 21:5) Ɔle kpalɛ kɛ kunli kɛbiza ɔ ye adwenle wɔ ɛhye anwo. (Mrɛ. 15:22) Mbusua tile, duzu ati a ɔyɛ a bɛmbiza bɛ mra na bɛndie mɔɔ bɛkɛha la ɛ? Saa bɛyɛ zɔ a ɔbaboa bɛ yeamaa bɛanwu mɔɔ bɛ nye die nwo nee mɔɔ hyia bɛ la.
9 Wɔ dapɛne ne bie mɔ anu ɔnrɛhyia kɛ abusua tile ne fa mekɛ dɔɔnwo siezie ɔ nwo. Bie a abusua ne bahulo kɛ bɛsukoa ninyɛne mɔɔ bɛta bɛsukoa la bie dapɛne biala, ɛhye kile kɛ ɔngyia kɛ mekɛ biala abusua tile ne yɛ ngyehyɛleɛ fofolɛ. Bie a ɔbanwu kɛ nvasoɛ wɔ zo kɛ bɛwie debiezukoalɛ ko biala a ɔwɔ kɛ ɔsiezie ɔ nwo wɔ mekɛ mɔɔ abusua ne sunsum nu ngyianlɛ tɛbɔ ye adwenle nu la. Mbusua tile bie mɔ kɛlɛ debie sikalɛ mɔɔ bɛbabɔ nwolɛ adawu la fa beta ɛleka mɔɔ abusua ne bahola anwu ye la, bie a frigye ne anwo. Ɛhye maa bɛ nye die, bɛ nye da ye ade na abusua ne nyia mekɛ siezie bɛ nwo kɛmɔ ɔhyia la.
10. Kɛzi menli mɔɔ bɛ ngome a bɛde la bahola ava Abusua Ɛzonlenlɛ nɔsolɛ ne ali gyima ɛ?
10 Na Saa Me Ngomekye A Mewɔ Abusua Ne Anu Ɛ? Menli mɔɔ bɛ ngome a bɛde la bahola ava Abusua Ɛzonlenlɛ nɔsolɛ ne ayɛ bɛ ti anwo debiezukoalɛ. Baebolo ɛgengalɛ, debiezukoalɛ mɔɔ bɛsiezie bɛ nwo bɛmaa yɛɛ The Watchtower nee Awake! ɛgengalɛ ɔwɔ kɛ boka bɛ ti anwo debiezukoalɛ ngyehyɛleɛ kpalɛ biala anwo. Nolobɔlɛma bie mɔ eza fa debie gyɛne boka bɛ ti anwo debiezukoalɛ ngyehyɛleɛ ne anwo. Ɔdwu mekɛ ne bie a, bɛbahola bɛado ɛsalɛ bɛavɛlɛ nolobɔlɛnli gyɛne anzɛɛ abusua bie bɛamaa bɛaboka bɛ nwo na bɛabɔ Ngɛlɛlera ne anu adawu mɔɔ maa anwosesebɛ la.
11, 12. Abusua Ɛzonlenlɛ nɔsolɛ mɔɔ bɛyɛ ye dahuu la azo nvasoɛ bie mɔ a le boni?
11 Nvasoɛ Boni Mɔ A Wɔ Abusua Ɛzonlenlɛ Mɔɔ Bɛyɛ Ye Dahuu La Azo A? Menli mɔɔ fi ahonle muala anu fa bɛ nwo wula nɔhalɛ ɛzonlenlɛ nu la bikye Gyihova kpalɛ. Bieko, mbusua bɔ nu sonle a ɔmaa koyɛlɛ mɔɔ wɔ abusua ne anu la anu mia. Agyalɛma bie hɛlɛle nyilalɛ mɔɔ bɛnyia ye la anwo edwɛkɛ kɛ: “Kɛmɔ yɛle adekpakyelɛma mɔɔ yɛnlɛ ngakula la ati, yɛ nye la yɛ Abusua Ɛzonlenlɛ nɔsolɛ ne amgba. Yɛte nganeɛ kɛ yɛlɛbikye yɛ nwo nee yɛ anwuma Selɛ ne kpalɛ. Ɛnɛ, saa ɔdwu kenle mɔɔ yɛfa yɛsukoa debie yɛbɔ nu la na yɛdwazo nwonlomɔ a, yɛbiza yɛ nwo kɛ: ‘Ɛze mɔɔ wɔ ɛkɛ ne nɔsolɛ a? Abusua Ɛzonlenlɛ nɔsolɛ!’”
12 Ngyehyɛleɛ mɔɔ maa yɛyɛ abusua ɛzonlenlɛ wɔ nɔsolɛ bie anu la eza boa mbusua mɔɔ bɛnlɛ alagye la. Awovolɛ ko mɔɔ lɛ ngakula mrenya nwiɔ na eza ɔle dahuu adekpakyelɛnli la hɛlɛle kɛ: “Dɛba ne ɛnee yɛngola yɛnyɛ yɛ abusua debiezukoalɛ ne. Ɛnee ɔnda ɔngɔ zo ɔluakɛ ɛnee mefɛ la ati. Ɛnee mennwu mɔɔ ɔwɔ kɛ meyɛ na yeayɛ kpalɛ a. Yemɔti mekɛlɛ meala bɛ ase somaa wɔ Abusua Ɛzonlenlɛ nɔsolɛ ne anwo. Yɛkola yɛyɛ abusua debiezukoalɛ dahuu na ɔlɛboa yɛ.”
13. Duzu a bahile kɛzi ngyehyɛleɛ ɛhye baboa wɔ abusua ne kpalɛ ɛ?
13 Kɛmɔ ɛnee Ɛnwomenlelielɛ ne de la, Abusua Ɛzonlenlɛ nɔsolɛ le ahyɛlɛdeɛ mɔɔ vi yɛ anwuma Selɛ ne ɛkɛ mɔɔ baboa mbusua a. (Gye. 1:17) Kɛzi Yizilayɛ mbusua lile Ɛnwomenlelielɛ ne la a hilele kɛzi ɔboale bɛ kpalɛ wɔ sunsum nu a. Zɔhane ala a kɛzi yɛbava nɔsolɛ ne mɔɔ yɛfa yɛyɛ abusua ɛzonlenlɛ ne yɛali gyima la a bahile kɛzi ɔbaboa yɛ abusua ne kpalɛ a. (2 Kɔl. 9:6; Gal. 6:7, 8; Kɔl. 3:23, 24) Saa ɛfa ngyehyɛleɛ ɛhye ɛdi gyima kpalɛ a, wɔ abusua ne bahola aha mɔɔ edwɛndovo ne hanle la bie kɛ: ‘Na mame, ɔle kpalɛ kɛ menwɔbikye Nyamenle; meyɛ Gyihova Nyamenle ne me ɛvealeka.’—Edw. 73:28.
[Edwɛkɛ mɔɔ bɛkpa wɔ mukelɛ 5]
Ɔnle kɛ Abusua Ɛzonlenlɛ nɔsolɛ ne yɛ nwenle mɔɔ anyelielɛ biala ɛnle nu a, emomu, ɔwɔ kɛ ɔmaa ɔda ali kɛ yɛsonle anyelielɛ Nyamenle ne
[Ɛlɛka wɔ mukelɛ 6]
FA SIE
Abusua Ɛzonlenlɛ Nɔsolɛ Nwo Nzuzulɛ Bie Mɔ
Baebolo:
• Bɛbɔ nu bɛgenga dapɛne Baebolo ɛgengalɛ ne foa bie. Saa bɛyɛ edwɛkɛ mɔɔ bɛlɛkenga la zɔ a ɔkɛyɛ boɛ a, bɛmaa sonla ko ɛha nuhua edwɛkɛ ne, na menli mɔɔ ɛha la ɛgenga menli mɔɔ wɔ nu la edwɛkɛ ɛdeɛ ne.
• Bɛyɛ Baebolo ɛgengalɛ ne foa bie anwo yɛkile.
• Bɛmaa abusua ne anu sonla ko biala ɛlumua ɛgenga Baebolo tile ne mɔ mɔɔ bɛhile la na bɛyɛ edwɛkɛ ne anwo kpuyia ko anzɛɛ nwiɔ mɔɔ bɛlɛ la nzonlɛ. Akee bɛbɔ nu bɛyɛ awie biala kpuyia ne anwo neɛnleanu.
• Dapɛne biala bɛhɛlɛ Baebolo ne anu ngyehyɛnu bie wɔ kaade zo na bɛbɔ mɔdenle kɛ bɛkɛhakye na bɛkɛhilehile nu. Bɛyɛ kaade ne dɔɔnwo, na bɛnlea kɛ saa dapɛne biala bɛnea zolɛ a bɛkɛnwu ngɛlɛlera dɔɔnwo mɔɔ bɛkakye a.
• Bɛdie Baebolo ɛgengalɛ mɔɔ bɛhye la na bɛli ɛgengalɛ ne anzi wɔ bɛ Baebolo ne anu.
Debiezukoalɛ:
• Bɛbɔ nu bɛzukoa debiezukoalɛ ne foa bie.
• Bɛzukoa Belemgbunlililɛ edwɛne mɔɔ bɛbado ye dapɛne bieko la.
• Saa awie lɛ ɛdendɛlɛ wɔ Teokelase Ɛzonlenlɛ Sukulu ne anu anzɛɛ yɛkile wɔ Ɛzonlenlɛ Nyianu ne anu a, bɛzuzu kɛzi ɔbayɛ ye la anwo anzɛɛ bɛyɛ bɛhile abusua ne.
Abusua Ne Ngyianlɛ:
• Bɛbɔ nu bɛzuzu Young People Ask anzɛɛ Learn From the Great Teacher mbuluku ne anu edwɛkɛ bie anwo.
• Bɛyɛ edwɛkɛ bie mɔɔ bahola azi wɔ sukulu la anwo yɛkile.
• Bɛyɛ debie mɔɔ maa awovolɛ nee ngakula ne mɔ kakyi bɛ gyimalilɛ ne la bɛnlea. Ngakula ne mɔ yɛ edwɛkɛ bie anwo neɛnleanu na akee bɛ nee awovolɛ ne mɔ suzu nwolɛ.
Daselɛlilɛ:
• Bɛzukoa edwɛkɛ mɔɔ bɛbava bɛali daselɛ wɔ dapɛne awieleɛ la.
• Bɛzuzu bodane kpalɛ mɔɔ abusua ne bahola ava azie bɛ nye zo na bɛayɛ dɔɔnwo wɔ daselɛlilɛ nu wɔ Ngakyelɛlilɛ mekɛ ne anu anzɛɛ mekɛ mɔɔ bɛmaa sukulu adenle la.
• Bɛmaa abusua ne anu sonla ko biala ɛnyia mekɛ ekyi ɔva ɔkpondɛ kɛzi ɔbabua kpuyia gyɛne mɔɔ awie bahola abiza wɔ daselɛlilɛ nu la, na bɛyɛ nwolɛ yɛkile.
Nzuzulɛ Bieko:
• Bɛbɔ nu bɛgenga magazine fofolɛ mɔɔ ɛra la anu edwɛkɛ.
• Bɛmaa abusua ne anu sonla ko biala ɛlumua ɛgenga magazine fofolɛ ne anu edwɛkɛ bie mɔɔ ɔ nye die nwolɛ la, na akee bɛmaa ɔha nwolɛ edwɛkɛ.
• Ɔyɛ a bɛdo ɛsalɛ bɛvɛlɛ nolobɔlɛnli anzɛɛ agyalɛma bie bɛmaa bɛboka bɛ nwo bɛyɛ bɛ Abusua Ɛzonlenlɛ nɔsolɛ ne, na bɛbizebiza bɛ edwɛkɛ.
• Bɛnlea yɛ video ne mɔ bie na bɛzuzu nwolɛ.
• Bɛbɔ nu bɛzuzu “Young People Ask” anzɛɛ “For Family Review” mɔɔ ba Awake! nu la anwo.
• Bɛbɔ nu bɛzuzu “Teach Your Children” anzɛɛ “For Young People” mɔɔ wɔ The Watchtower ne anu la anwo.
• Bɛgenga na bɛzuzu Yearbook fofolɛ ne foa bie anzɛɛ buluku fofolɛ mɔɔ bɛyele ye wɔ maangyeba nyianu ne abo la anwo.
• Bɛkɔ nyianu biala bɛba a bɛzuzu ninyɛne titile mɔɔ bɛdele la anwo.
• Bɛnlea ninyɛne mɔɔ Gyihova ɛbɔ la, na bɛzuzu mɔɔ ɔmaa yɛsukoa yɛfi Gyihova ɛkɛ la anwo.
• Bɛbɔ nu bɛyɛ debie mɔɔ le kɛ Nowa ɛlɛne ne la anwo neazo, azɛkɛlata anzɛɛ edwɛkɛ mɔɔ bɛhyehyɛ la.