Fa Wɔ Mekɛ Di Gyima Kpalɛ Wɔ Daselɛlilɛ Nu
Gyihova Alasevolɛ vale dɔnehwele 1,945,487,604 lile daselɛ wɔ 2014 ɛzonlenlɛ ɛvolɛ ne anu—daselɛ wienyi mɔɔ kile kɛ yɛbɔ kpɔkɛ kɛ yɛyɛ dɔɔnwo wɔ Gyihova ɛzonlenlɛ nu a! (Edw. 110:3; 1 Kɔl. 15:58) Kɛmɔ “mekɛ ne ɛwie” la ati, asoo yɛbahola yɛava yɛ mekɛ ekyii mɔɔ ɛha la yɛaha edwɛkɛ ne yɛahile menli dɔɔnwo ɔ?—1 Kɔl. 7:29.
Saa yɛbahola yɛava yɛ mekɛ yɛali gyima kpalɛ wɔ daselɛlilɛ nu a, ɔwɔ kɛ yɛyɛ nzenzaleɛ. Kɛ neazo la, saa ɛta ɛfa dɔnehwele ko anzɛɛ dɔɔnwo ɛyɛ ɛzonlenlɛ gyima ne foa titili bie mɔɔ ɛ nee menli ɛndendɛ a, ɛbahola wɔayɛ nzenzaleɛ amaa wɔanyia mekɛ ɛ nee menli dɔɔnwo adendɛ ɔ? Asolo ɛleka biala nee ye tɛnlabelɛ. Noko nzuzulɛ mɔɔ doɔdoa zo la bahola aboa wɔ yeamaa wɔava wɔ mekɛ wɔali gyima kpalɛ na wɔantoto wɔ “abotokuma ne mɔ mgbane mgbane.”—1 Kɔl. 9:26.
Azua Nu Daselɛlilɛ: Wɔ ɛvolɛ dɔɔnwo mɔɔ ɛpɛ nu la anu, nolobɔlɛma ta fa azua nu daselɛlilɛ ne bɔ bɛ daselɛlilɛ gyima ne abo. Noko kɛmɔ menli dɔɔnwo yɛ gyima wɔ alehyenlɛ ne anu la ati, nzɔne ati a ɛngɔ azua nu wɔ mekɛ mɔɔ ewia ne anloa kɛha aze anzɛɛ ɔlɛkɔ nɔsolɛ nu mɔɔ menli dɔɔnwo ɛlɛdie bɛ menle wɔ sua nu la ɛ? Saa yɛdi daselɛ wɔ awɔdenle zo anzɛɛ gyima gyima nu wɔ alehyenlɛ ne anu a, ɔso ma kpalɛ.
Bagua Nu Daselɛlilɛ: Ɔwɔ kɛ bɛnea asafo ne azɛlɛsinli ne anu ɛleka mɔɔ menli dɔɔnwo fa la na bɛfa ɛkponle anzɛɛ ehwili mɔɔ bɛfa mbuluku bɛgua zo la bɛsie ɛkɛ. (Nea July 2013 Yɛ Belemgbunlililɛ Gyima ne, m. 5.) Saa akee menli ɛnda ɛnva ɛleka mɔɔ bɛfa mbuluku ne bɛsie la a, Asafo Ɛzonlenlɛ Kɔmatii ne bahola azi kpɔkɛ kɛ bɛye mbuluku ne bɛhɔ ɛleka fofolɛ mɔɔ menli dɔɔnwo fa ɛkɛ la.
Sia Kɔkpɔla Nee Baebolo Ɛzukoalɛ: Ɛbahola wɔava wɔ sia kɔkpɔla nee wɔ Baebolo ɛzukoalɛ ne wɔawula mekɛ mɔɔ ɛnnyia menli ɛ nee bɛ ɛndendɛ la ɔ? Kɛ neazo la, saa ɛkɔ azua nu Folɛ nwonlomɔ a ɛkɔto menli a, ɛbahola wɔahɔ wɔ Baebolo sukoavoma ɛkɛ wɔ ewiazo anzɛɛ nɔsolɛ nu. Saa nolobɔlɛma kɔ ahɔyɛ sia kɔkpɔla a, bɛbahola bɛayɛ ngyehyɛleɛ bɛahɔ bɛ sukoavoma mɔɔ de bikye nwolɛ la ɛkɛ wɔ mekɛ ko ne ala anu amaa bɛahola bɛayɛ dɔɔnwo wɔ daselɛlilɛ nu ɔ?
Saa yɛkɔ daselɛlilɛ biala a, yɛbahola yɛabu mekɛ ne anwo mgbonda ɛdeɛ, noko saa yɛ daselɛlilɛ ne so ma a, ɔmaa yɛ nye die kpole. Saa ɛnwu ye kɛ ɛzonlenlɛ gyima foa bie mɔɔ ɛyɛ ye wɔ mekɛ titili bie anu la ɛnzo ma a, sɔ fofolɛ nea. Sɛlɛ Gyihova, “egyinli menle ne” maa ɔhile wɔ adenle amaa wɔahola wɔava wɔ mekɛ wɔali gyima nrɛlɛbɛ nu!—Mat. 9:38.