Ndenle Fofolɛ Mɔɔ Bɛdua Zo Bɛyɛ Bagua Nu Daselɛlilɛ La
1. Neazo boni a ɛvoyia ne mɔɔ lumua la anu Keleseɛnema yɛle a?
1 Ɛvoyia ne mɔɔ lumua la anu Keleseɛnema anga edwɛkɛ ne wɔ azua nu ala. Bɛhanle edwɛkɛ ne wɔ bagua nu noko. (Gyi. 20:20) Kɛ neazo la, bɛhɔle ɛzonlenlɛ sua ne anu, ɛleka mɔɔ ɛnee bɛze kɛ bɛbanyia menli dɔɔnwo la. (Gyi. 5:42) Mekɛ mɔɔ ɛnee ɛzoanvolɛ Pɔɔlo wɔ Atɛnse la, ɔhanle edwɛkɛ ne alehyenlɛ biala ɔhilele menli mɔɔ wɔ gua ne anu la. (Gyi. 17:17) Ɛnɛ, adenle titile mɔɔ yɛdua zo yɛbɔ edwɛkpa ne nolo la a le azua nu daselɛlilɛ ne. Noko akee, eza yɛkɔ kale agyinlaleɛ, gyima gyima nu, nwɔhoalilɛleka, adenle mɔɔ menli dɔɔnwo fa zo, yɛɛ ɛleka gyɛne amaa yɛaha edwɛkɛ ne yɛahile menli wɔ ɛleka biala mɔɔ yɛkɛnwu bɛ la. Bɛmaa nolobɔlɛnli biala anwosesebɛ kɛ ɔbɔ mɔdenle ɔyɛ bagua nu daselɛlilɛ ɛdeɛ, noko menli dɔɔnwo banyia adenle ava bɛ nwo awula ndenle nwiɔ mɔɔ yɛ anyelielɛ mɔɔ bɛdua zo bɛyɛ bagua nu daselɛlilɛ la anu.
2. Debie fofolɛ boni a bɛbɔle ɔ bo wɔ November 2011 a?
2 Suakpole Zo Bagua Nu Daselɛlilɛ Titile: Kɛmɔ bɛha nwolɛ edwɛkɛ wɔ 2013 Yearbook ne, mukelɛ 16 nee 17 la, adenle fofolɛ mɔɔ bɛdua zo bɛyɛ bagua nu daselɛlilɛ la bɔle ɔ bo wɔ New York City wɔ November 2011. Bɛfa ɛkponle nee ninyɛne ngɛnlɛma mɔɔ bɛva aneɛ dɔɔnwo anu mbuluku bɛgua zo la bɛsiezie suakpole ne ɛleka mɔɔ menli dɔɔnwo fa la. Alehyenlɛ biala menli dɔɔnwo se nwolɛ, menli ɛhye mɔ bie de ɛleka mɔɔ bɛmmaa menli ɛnnyia adenle ɛngɔ ɛkɛ la yɛɛ bie mɔ ɛnda ɛndɛnla sua nu. Menli dɔɔnwo anye liele mbuluku ne anwo. Wɔ kenlensa ye siane bie anu, bɛmanle magazine 3,797 yɛɛ mbuluku 7,986. Menli dɔɔnwo mɔɔ zenle ɛkɛ hanle kɛ bɛ nee bɛ ɛyɛ Baebolo ɛzukoalɛ. Kɛmɔ bɛhwenle adwenle bɛziele Baebolo ɛzukoalɛ zo la ati, bɛvale menli dɔɔnwo mɔɔ anye die nwolɛ la address mɔɔ bɛliele la bɛmanle asafo mɔɔ bikye ɛkɛ la kɛ bɛdoa zo bɛboa bɛ.
3. Kɛzi bɛlɛmaa adenle fofolɛ ɛhye anu adɛlɛ ɛ?
3 Kɛmɔ adenle fofolɛ ɛhye ɛlɛkɔ zo kɛnlɛma la ati, kɛkala, bɛlɛmaa bɛayɛ bie wɔ ewiade amuala ɛleka biala mɔɔ menli dɔɔnwo wɔ la. Maanle biala anu ɔfese ne bahile suakpole mɔɔ bɛyɛ bie wɔ zolɛ a ɔbaboa a. Azuamgbole ɛhye mɔ le ɛleka mɔɔ ahale, gyima nee menli dɔɔnwo wɔ la. Yemɔ anzi, ɔfese ne bahɛlɛ asafo mɔɔ bayɛ bie la kɛlata na bamaa bɛ nwolɛ adehilelɛ fofolɛ. Bɛta bɛmaa dahuu nee adekpakyelɛma titile a yɛ a, noko wɔ ɛleka bie mɔ adekpakyelɛ boavolɛma kola yɛ gyima ɛhye bie maa ɔyɛ boɛ.
4. Kɛzi bɛyɛ suakpole zo bagua nu daselɛlilɛ titile ne ɛ?
4 Kɛzi Bɛyɛ Daselɛlilɛ Ne La: Menli mɔɔ yɛ suakpole zo bagua nu daselɛlilɛ titile ne bie la ta kendɛ maa awie ba ɛkponle ne anzɛɛ mbuluku mɔɔ bɛziezie la anwo. Saa awie ba ɛkɛ a, bɛmaa ɔfa buluku biala mɔɔ ɔ nye die nwolɛ la. Adekpakyelɛma ne dua Ngɛlɛlera ne azo bua kpuyia biala mɔɔ ɔlɛ la. Saa ɔfa buluku bie a, adekpakyelɛma ne ɛnga ndoboa ngyehyɛleɛ ne anwo edwɛkɛ ɛngile ye. Noko saa ɔbiza kɛzi yɛtua yɛ gyima ne anwo kakɛ la a, bɛkile nu bɛkile ye kɛ ɔbahola yeava ndoboa yeanwa address ne mɔɔ bɛhile wɔ buluku ne anu la. Saa ɔkɛyɛ boɛ a, bɛbiza ye kɛ: “Ɛkulo kɛ awie ba wɔ sua nu bakpɔla wɔ ɔ?” anzɛɛ “Ɛze kɛ ɛye buluku ɛhye ɛsie ahane a, awie bahola ɔ nee wɔ ayɛ Baebolo ɛzukoalɛ mɔɔ ɛndua ɛhwee ɔ?”
5. Kɛzi agyalɛma bie mɔɔ bɛyɛ daselɛlilɛ ɛhye bie la anye ɛlie kpalɛ ɛ?
5 Menli mɔɔ ɛyɛ daselɛlilɛ ɛhye bie la anye ɛlie kpalɛ. Agyalɛma bie hɛlɛle kɛ: “Saa yɛgyi ɛkponle ne anwo alehyenlɛ biala na yɛnwu kɛzi menli dɔɔnwo ɛlɛpɛ nu la a, ɔmaa gyima kpole mɔɔ bɛlɛyɛ na bɛaha edwɛkɛ ne bɛahile menli mɔɔ wɔ ewiade amuala la si yɛ nwo. Saa yɛnwu menli dɔɔnwo ne na yɛdwenle kɛzi Gyihova kulo sonla ko biala la anwo a ɔmaa kpɔkɛ mɔɔ yɛbɔ kɛ yɛkɔ zo yɛava edwɛkɛhanlɛ ne yɛalumua wɔ yɛ ɛbɛlabɔlɛ nu la anu mia. Yɛsuzu kɛ Gyihova ɛlɛneɛnlea menli mɔɔ se ɛkponle ne anwo la ahonle nu, na ɔlɛkpondɛ bɛdabɛ mɔɔ bɛfɛta la. Yemaa yɛde nganeɛ kɛ yɛ nee anwumabɔvolɛ ne mɔ ɛlɛbɔ nu ayɛ gyima kpalɛ.”
6. (a) Daselɛlilɛ fofolɛ boni a bɛlɛyɛ nwolɛ ngyehyɛleɛ wɔ asafo dɔɔnwo anu a, na kɛzi ɔle ngakyile wɔ suakpole zo bagua nu daselɛlilɛ titile ne anwo ɛ? (b) Kɛ ɔkɛyɛ na asafo dɔɔnwo ayɛ ko wɔ mekɛ mɔɔ bɛlɛyɛ bagua nu daselɛlilɛ la ɛ?
6 Bɛ Ɛkɛ Ne Bagua Nu Daselɛlilɛ Nwo Ngyehyɛleɛ: Ɛye suakpole zo bagua nu daselɛlilɛ titile ne ɛsie ahane a, mgbanyima eku dɔɔnwo ɛlɛyɛ daselɛlilɛ fofolɛ nwo ngyehyɛleɛ wɔ bɛ azɛlɛsinli ne anu. Adenle fofolɛ ɛhye maa nolobɔlɛma fa ɛkponle anzɛɛ mbuluku gua debie zo na bɛfa bɛsie ɛleka mɔɔ menli fa la wɔ asafo ne azɛlɛsinli ne anu. Ɛhye ɛnle kɛ suakpole zo bagua nu daselɛlilɛ titile ne, mɔɔ bɛmaa asafo dɔɔnwo anu amra ka edwɛkɛ ne wɔ ɛleka ko ne ala mɔɔ ɔfese ne kɛhile bɛ la.—Nea ɛlɛka, “Koyɛlɛ Kpalɛ Nwo Hyia.”
7. Kɛzi mgbanyima ne mɔ bayɛ bɛ ɛkɛ ne bagua nu daselɛlilɛ nwo ngyehyɛleɛ wɔ ɛleka mɔɔ fɛta la ɛ?
7 Mgbanyima ne mɔ bazuzu nwolɛ saa bɛlɛ ɛleka mɔɔ menli dɔɔnwo wɔ la wɔ bɛ azɛlɛsinli ne anu a, na bɛanlea kɛ ɔfɛta kɛ bɛyɛ bagua nu daselɛlilɛ nwo ngyehyɛleɛ a. Ɛleka mɔɔ bɛbahola bɛava ɛkponle anzɛɛ mbuluku ne bie bɛazie la a le kale agyinlaleɛ, nwɔhoalilɛleka, adenle mɔɔ menli dɔɔnwo fa zo, gualilɛleka, kɔlegyi nu, anwumalɛne agyinlaleɛ, yɛɛ ɛleka mɔɔ ɛvolɛ dwu a bɛyia ɛkɛ la. Saa bɛfa ɛkponle bɛsie ɛleka ko ne ala, wɔ kenle zɔhane mɔ anu, yɛɛ mekɛ ko ne ala anu a nvasoɛ wɔ zolɛ. Bɛnwu ye kɛ saa bɛfa ɛkponle bɛsie gualilɛleka a ɔboa ɔtɛla sotɔɔ kpole ko anyunlu, ɔluakɛ menli mɔɔ ɛlɛkɔ ɛkɛ la adwenle wɔ deɛ mɔɔ bɛlɛkɔ bɛahɔdɔ la azo ala. Wɔ ɛleka bie mɔ mɔɔ menli dɔɔnwo ɛnle la, mbuluku ekyi bie a bɛbava bɛahɔ ɛkɛ a. Mgbanyima bahola ahwe ngɛlata titile bie mɔ mɔɔ bɛbava bɛahile Ɛzinzalɛ Arane ne nee Awake! magazine yɛɛ Baebolo ne Kilehile buluku ne wɔ bagua nu daselɛlilɛ ɛhye anu la bɛavi yɛ Intanɛte ɛleka ne. Menli mɔɔ bayɛ gyima ɛhye la bɛayɛ ye kɛ bɛdabɛ mɔɔ bɛlɛyɛ suakpole zo bagua nu daselɛlilɛ titile ne la, na ɔwɔ kɛ bɛdi adehilelɛ mɔɔ ɛzonlenlɛ gyima zo neavolɛ ne bava amaa bɛ la azo kpalɛ. Saa awie mɔɔ ɔnle bɛ azɛlɛsinli ne anu la fa ye address maa bɛ a, ɔwɔ kɛ bɛkyehyɛ Please Follow Up (S-43) ndɛndɛ na bɛfa kɛlata ne bɛmaa kɛlɛhɛlɛvolɛ ne.
8. Saa bɛnlɛ bagua nu daselɛlilɛ nwo ngyehyɛleɛ wɔ bɛ asafo ne anu a, ndenle boni a bɛbahola bɛalua zo bɛayɛ bagua nu daselɛlilɛ a?
8 Bagua Nu Daselɛlilɛ Wɔ Wɔ Ɛzonlenlɛ Gyima Ne Anu: Bie a asafo bie mɔ ɛnlɛ ɛleka wɔ bɛ azɛlɛsinli ne anu mɔɔ menli dɔɔnwo wɔ mɔɔ bɛfa ɛkponle bɛsie anzɛɛ bɛfa mbuluku bɛgua ɛkponle zo a ɔyɛ boɛ a. Noko akee, wɔ zɔhane asafo ne mɔ anu, bɛlɛmaa nolobɔlɛma anwosesebɛ kɛ bɛbɔ mɔdenle bɛyɛ bagua nu daselɛlilɛ bɛboka bɛ ɛzonlenlɛ gyima ne anwo. Bɛlɛ ɛleka mɔɔ bɛtɔne debie anzɛɛ sotɔɔ bie mɔɔ menli dɔɔnwo tɔ debie wɔ nu la wɔ ɛkɛ ɔ? Ɛleka mɔɔ menli dɔɔnwo kɔdie bɛ nye anzɛɛ yia la wɔ ɛkɛ ɔ? Asoo ɔdwu mekɛ ne bie a menli dɔɔnwo yia nu wɔ azɛlɛsinli ne anu? Saa ɔle zɔ a, ɛnee bɛbahola bɛayɛ bagua nu daselɛlilɛ.
9 Gyihova kpondɛ “kɛ menli kɔsɔɔti nwu nɔhalɛ ne na bɛnyia ngoane.” (1 Tem. 2:4) Ɛhye ati, yɛlɛbɔ mɔdenle kɛ menli dɔɔnwo bade Belemgbunlililɛ ne anwo edwɛkɛ ne kolaa na awieleɛ ne ara. (Mat. 24:14) Wɔ ɛleka dɔɔnwo ɔyɛ se kɛ yɛbado menli wɔ sua nu. Noko, yɛbahola yɛ nee bɛ adendɛ wɔ mekɛ mɔɔ bɛvi sua nu na bɛlua gua zo la. Bie a bagua nu daselɛlilɛ a le adenle mɔɔ menli bie mɔ balua zo ade edwɛkpa ne a. Yemɔti, ɔrɛla ye kɛ yɛbayɛ yɛ ɛzonlenlɛ gyima ne bɔkɔɔ ɔlua edwɛkɛ ne mɔɔ yɛbaha yɛahile menli wɔ ɛleka biala mɔɔ yɛbanwu bɛ la azo.—2 Tem. 4:5.
9. Duzu ati a ɔwɔ kɛ yɛbɔ mɔdenle yɛka edwɛkɛ ne yɛkile menli wɔ ɛleka biala mɔɔ yɛbanwu bɛ la ɛ?
[Ɛlɛka wɔ mukelɛ 5]
Koyɛlɛ Kpalɛ Nwo Hyia
Amaneɛbɔlɛ kile kɛ ɔyɛ a nolobɔlɛma mɔɔ vi asafo mɔɔ bikye nwolɛ la anu yɛ bagua nu daselɛlilɛ wɔ gua ko ne ala azo, ɛleka ko ne ala mɔɔ kale gyinla yɛɛ gyima ko ne ala anyunlu. Nolobɔlɛma mɔɔ vi asafo ngakyile nu la ɛgyakyi magazine wɔ ɛleka ko ne ala na bɛha edwɛkɛ ne wɔ gyima ko ne ala anu. Ɔdwu mekɛ ne bie a ɛhye maa menli mɔɔ yɛ gyima nee menli mɔɔ de ɛkɛ la fa ɛya wɔ mekɛ bɔbɔ mɔɔ nolobɔlɛma ɛnli daselɛ wɔ ɛkɛ ne wɔ mekɛ ko ne ala anu la. Ɛhye ati, fane dɔɔnwo ne ala ɔle kpalɛ kɛ ɛbayɛ gyima wɔ asafo ne azɛlɛsinli ne anu wɔ mekɛ mɔɔ ɛlɛyɛ bagua nu daselɛlilɛ la.
Saa nolobɔlɛma kulo kɛ bɛyɛ gyima wɔ asafo mɔɔ bikye bɛ la azɛlɛsinli nu a ɔwɔ kɛ bɛka bɛkile bɛ ɛzonlenlɛ gyima zo neavolɛ ne. Ɔbahola yeanwu asafo gyɛne ne anu ɛzonlenlɛ gyima zo neavolɛ ne na yeazɛlɛ ye adenle kolaa na ye asafo ne anu amra ayɛ gyima wɔ ɛkɛ. Saa bɛka kɛ asafo mɔɔ bɛka aneɛ gyɛne la ɛyɛ gyima wɔ ɛleka ko ne ala a, ɔwɔ kɛ ɛzonlenlɛ gyima zo neavolɛma di nwolɛ adwelie amaa bɛanga menli mɔɔ wɔ ɛkɛ la ɛya. Ɔlua koyɛlɛ kpalɛ zo, bɛbahola bɛayɛ ‘debie biala pɛpɛɛpɛ.’—1 Kɔl. 14:40.
[Nvoninli wɔ mukelɛ 6]
[Nvoninli wɔ mukelɛ 6]