Yɛ Magazine Ne—Bɛyɛ Bɛmaa Menli Dɔɔnwo Anye Die Nwo
1. Kɛzi akɛlɛ nɔhavo nee nrɛlɛbɛvolɛ eku ne sukoa ɛzoanvolɛ Pɔɔlo ɛ?
1 Kɛmɔ ɛzoanvolɛ Pɔɔlo hanle ye edwɛkɛ ne wɔ adenle mɔɔ bamaa ɔ sa aha “menli muala” azo la, zɔhane ala a akɛlɛ nɔhavo nee nrɛlɛbɛvolɛ eku ne noko dua yɛ magazine ne mɔ azo ɔ sa ka menli mɔɔ bɛvi maanle ngakyile nu na asolo bɛ diedi la a. (1 Kɔl. 9:22, 23) Amaa yɛahola yɛava Ɛzinzalɛ Arane ne nee Awake! yɛali gyima kpalɛ la, ɔwɔ kɛ yɛnwu menli mɔɔ bɛkɛlɛ bɛmaa bɛ la na yɛte bɛ edwɛkɛ bo.
2. Nwane mɔ a bɛyɛ Awake! ne bɛmaa bɛ a?
2 Awake!: Bɛyɛ Awake! ne kɛ bɛfa bɛaboa menli mɔɔ bɛle kɛ bɛdabɛ mɔɔ ɛzoanvolɛ Pɔɔlo nee bɛ dendɛle wɔ mekɛ mɔɔ ɔtendɛ yeahile “Atɛnsema” la. (Gyi. 17:22) Ɛnee menli zɔhane mɔ ɛnle Keleseɛnema yɛɛ bɛnlɛ Ngɛlɛlera ne anu ndelebɛbo dɔɔnwo. Zɔhane ala a menli mɔɔ kenga Awake! ne la ɛnlɛ Baebolo ne anu ndelebɛbo dɔɔnwo a. Bie a bɛnze Keleseɛnema ngilehilelɛ ne anwo ɛhwee yɛɛ bɛnlie Nyamenlezonlenlɛ bɛnli anzɛɛ bɛnze nvasoɛ kpalɛ mɔɔ wɔ Baebolo ne azo la. Awake! ne bodane titile a le kɛ, ɔboa ye kengavoma yeamaa bɛanwu kɛ nɔhalɛ Nyamenle ne wɔ ɛkɛ. Magazine ɛhye bodane bieko a le kɛ ɔboa kengavolɛ ne yeamaa yeanyia Baebolo ne anu diedi na yeade ɔ bo kɛ, Gyihova Alasevolɛ le ngakyile fi ɛzonlenlɛ mɔɔ ɛha la anwo.
3. Nwane mɔ a bɛkɛlɛ Ɛzinzalɛ Arane ne ko biala bɛmaa bɛ a?
3 Ɛzinzalɛ Arane: Menli mɔɔ kenga magazine ɛhye mɔɔ yɛfa yɛmaa maanlema la lɛ ɛbulɛ ekyi maa Nyamenle nee Ngɛlɛlera ne. Bɛlɛ Baebolo ne anwo nrɛlɛbɛ ɛdeɛ, noko bɛnde ye ngilehilelɛ fɔɔnwo ne abo kpalɛ. Bɛ nee menli mɔɔ Pɔɔlo hanle bɛ nwo edwɛkɛ kɛ “bɛsulo Nyamenle” la le ko. (Gyi. 13:14-16) Bɛkɛlɛ Ɛzinzalɛ Arane ne anu edwɛkɛ mɔɔ yɛsukoa la bɛmaa Gyihova Alasevolɛ titile. Pɔɔlo zuzule kɛ menli mɔɔ kenga ye ngɛlata ne mɔ la ze Ngɛlɛlera ne anu na bɛlɛ nɔhalɛ ne anwo ndelebɛbo mɔɔ di munli a. (1 Kɔl. 1:1, 2) Eza bɛkɛlɛ Ɛzinzalɛ Arane ne anu edwɛkɛ mɔɔ yɛsukoa la bɛmaa menli mɔɔ kɔ debiezukoalɛ na bɛte edwɛkɛ agbɔkɛ nee ninyɛne mɔɔ Alasevolɛ ne mɔ ka nwolɛ edwɛkɛ abo la.
4. Duzu ati a ɔwɔ kɛ yɛnwu magazine ko biala mɔɔ yɛfa yɛkɔ daselɛlilɛ la anu edwɛkɛ ɛ?
4 Ɔwɔ nuhua kɛ yɛta yɛfa magazine nwiɔ ne yɛbɔ nu yɛmaa ɛdeɛ, noko yɛlɛfa yɛamaa a yɛka ko ala anwo edwɛkɛ. Ɛhye ati, fa yɛ wɔ bodane kɛ ɛbanwu magazine ko biala anu edwɛkɛ. Ɛhye bamaa wɔanwu edwɛkɛ mɔɔ ɛka a menli mɔɔ ɛbayia bɛ anye balie nwolɛ la.