Fa Magazine ne Mɔɔ Di Nɔhalɛ ne Anwo Daselɛ La Maa
1. Gyima boni a yɛfa The Watchtower nee Awake! ne yɛyɛ a?
1 The Watchtower Announcing Jehovah’s Kingdom nee Awake! magazine ne a le ninyɛne titile mɔɔ yɛfa yɛdi gyima wɔ Belemgbunlililɛ nolobɔlɛ nee ɛdoavolɛyɛlɛ gyima ne anu a. (Mat. 24:14; 28:19, 20) Dahuu yɛfi anyelielɛ nu yɛfa magazine nwiɔ ɛhye yɛmaa wɔ mekɛ mɔɔ yɛkɛva yɛ nwo yɛkɛwula Belemgbunlililɛ gyima ne afoa ngakyile nu la.
2. Nzenzaleɛ boni mɔ a bɛyɛ wɔ The Watctower nee Awake! ne anu a, na duzu ati ɔ?
2 Wɔ ɛvolɛ dɔɔnwo mɔ ɛze ɛhɔ la anu bɛhakyi kɛzi magazine ne kpole de, nuhua edwɛkɛ nee adenle mɔɔ bɛdua zo bɛfa bɛmaa la. Bodane mɔɔ nzenzaleɛ ɛhye mɔ gyi zo a le kɛ bɛmaa magazine ne ayɛ mɔɔ menli nye die nwolɛ kpalɛ amaa Belemgbunlililɛ edwɛkɛ ne aha menli kɔsɔɔti mɔɔ ɔwɔ kɛ “nwu nɔhalɛ ne na bɛnyia ngoane” la ahonle.—1 Tem. 2:4.
3. Kɛzi yɛbava magazine ne yɛali gyima wɔ daselɛlilɛ nu ɛ?
3 Sumunli January 2006, yɛnwu kɛzi yɛbaha edwɛkɛ ngakyile yɛava siane ko anu Awake! ɛdeɛ ne yɛamaa la. Kɛkala yɛbalua adenle ko ne ala azo yɛava siane biala The Watchtower Announcing Jehovah’s Kingdom yɛamaa wɔ daselɛlilɛ nu. Bɛkile edwɛkɛ mɔɔ yɛbanlea zo yɛava magazine ne yɛamaa la wɔ Yɛ Belemgbunlililɛ Gyima ne mukelɛ ne mɔɔ wɔ ɔ nzi la. Ɛhye mɔ ta twe adwenle kɔ edwɛkɛ mɔ lumua mɔɔ wɔ magazine ne anu la ko azo, noko ɔdwu mekɛ ne bie a bɛtwe adwenle bɛkɔ edwɛkɛ gyɛne mɔɔ yɛ anyelielɛ la azo. Yɛbahola yɛava nzuzulɛ ne mɔɔ bɛhile la yɛali gyima kpalɛ wɔ mekɛ mɔɔ yɛkɛde edwɛkɛ ne abo kpalɛ na yɛkɛva yɛdayɛ mumua ne yɛ edwɛkɛ yɛkɛha wɔ yɛ azɛlɛsinli ne anu la.
4. Duzu ati a ɔbahola yeayɛ kpalɛ kɛ yɛbaha edwɛkɛ gyɛne mɔɔ nee mɔɔ wɔ Yɛ Belemgbunlililɛ Gyima ne anu ɛnle ko la ɛ?
4 Ɔwɔ nu kɛ Yɛ Belemgbunlililɛ Gyima ne fa nzuzulɛ nwiɔ maa wɔ magazine ko biala anwo ɛdeɛ, noko ɛbahola wɔaha edwɛkɛ gyɛne mɔɔ ɛkulo la. Debie ko mɔɔ ɔti ɛbahola wɔayɛ zɔ la a le kɛ bie a menli dɔɔnwo anye balie nwo wɔ wɔ azɛlɛsinli ne anu. Anzɛɛ bie a ɛte nganeɛ kɛ saa ɛka edwɛkɛ bie mɔɔ ɛ nye die nwolɛ la a ɔbaboa kpalɛ.
5. Kolaa na wɔaha magazine ne mɔɔ ɛbava wɔamaa anwo edwɛkɛ la, duzu a ɔwɔ kɛ ɛyɛ a?
5 Kɛzi Ɛbaziezie Edwɛkɛ Mɔɔ Ɛbaha: Mɔɔ lumua la, ɔwɔ kɛ ɛte edwɛkɛ ne mɔɔ ɛkpondɛ kɛ ɛfa ɛdi gyima la abo kpalɛ. Tɛ dahuu biala a ɛbahola wɔanwu edwɛkɛ biala mɔɔ wɔ magazine ne anu la kolaa na wɔabɔ ɔ bo kɛ ɛfa wɔali gyima wɔ daselɛlilɛ nu a. Noko akee, ɔwɔ kɛ ɛfi anyelielɛ nu ɛka edwɛkɛ mɔɔ le nɔhalɛ la wɔ mɔɔ wɔkpa kɛ ɛfa wɔali gyima la anwo. Saa ɛbahola wɔayɛ zɔ a, kyesɛ wɔde deɛ mɔɔ ɛlɛka nwolɛ edwɛkɛ la abo kpalɛ.
6. Kɛzi yɛbahola yɛaziezie edwɛkɛ mɔɔ yɛbaha la ɛ?
6 Bieko, mmayɛ kyengye wɔ edwɛkɛ mɔɔ ɛbaha wɔava wɔabuke ɔ nye la anwo. Ɛbahola wɔava kpuyia mɔɔ yɛ anyelielɛ mɔɔ fane edwɛkɛ ne anwo la wɔabɔ adawubɔlɛ ne abo. Dahuu fa ɛ rɛle wula Nyamenle Edwɛkɛ ne anu kɛ ɔbaha menli ahonle. (Hib. 4:12) Kpa ngɛlɛlera mɔɔ fɛta na ɔfane edwɛkɛ ne mɔɔ ɛbaha wɔabuke ɔ nye anwo la, titile tɛkese mɔɔ wɔ edwɛkɛ ne mɔɔ ɛlɛka la anu anzɛɛ mɔɔ bɛhwe adwenle bɛhɔ zo wɔ nu la azo. Suzu kɛzi ɛbamaa ngɛlɛlera ne avane edwɛkɛ ne anwo la anwo.
7. Kɛzi yɛbahola yɛahakyihakyi edwɛkɛ mɔɔ yɛka la anu ɛ?
7 Adenle Biala Mɔɔ Ɛkɛnyia: Saa edwɛkɛ mɔɔ yɛka la baboa kpalɛ a, ɔwɔ kɛ yɛfa yɛdi gyima. Ɛ nee asafo ne ɛbɔ nu ɛva magazine ne ɛmaa wɔ Folɛ. Fa magazine ne maa menli mɔɔ ɛlumua ɛlie mbuluku gyɛne la. Dahuu fa magazine ne maa wɔ Baebolo sukoavoma yɛɛ menli gyɛne mɔɔ ɛkɛdo bɛ wɔ mekɛ mɔɔ ɛlɛyɛ sia kɔkpɔla la. Ɛbahola wɔava magazine ne wɔamaa menli wɔ mekɛ mɔɔ ɛlɛdi gua, ɛlɛtu adenle anzɛɛ ɛwɔ Dɔketa bie ɔfese la. Mekɛ mɔɔ ɛlɛka magazine ko ne ala anwo edwɛkɛ wɔ siane ne anu amuala la kakyihakyi mɔɔ ɛka la anu.
8. Ndenle boni mɔ azo a The Watchtower nee Awake! ne le ngakyile a?
8 The Watchtower nee Awake! magazine ne le ngakyile. Bɛkpogya Gyihova zo kɛ maanzaleɛ Tumivolɛ. (Gyi. 4:24) Bɛfa Nyamenle Belemgbunlililɛ ne anwo edwɛkpa ne bɛkyekye menli rɛle na bɛmaa bɛnyia Gyisɛse Kelaese anu diedi. (Mat. 24:14; Gyi. 10:43) Bieko, bɛkɔ zo bɛkile kɛzi ninyɛne mɔɔ ɛlɛsisi ewiade ɛlɛmaa Baebolo ngapezo ara nu la. (Mat. 25:13) Dua adenle biala mɔɔ ɛkɛnyia la azo fa magazine ne maa menli mɔɔ wɔ wɔ azɛlɛsinli ne anu la amaa banyia zolɛ nvasoɛ!
9. Duzu a ɔwɔ kɛ yɛyɛ na yɛalua zo yɛayɛ sia kɔkpɔla a?
9 Saa ɛfa magazine bie ɛmaa anzɛɛ ɛ nee awie ɛbɔ adawu mɔɔ fane sunsum nu ninyɛne nwo a, biza kpuyia bie mɔɔ maa bɛdwenle mɔɔ bahola abuke nwolɛ adenle amaa sia kɔkpɔla yɛɛ sunsum nu adawubɔlɛ bieko la. Saa yɛbɔ mɔdenle yɛdua nɔhalɛ ma ne a, yɛbahola yɛalie yɛali kɛ Gyihova babuke menli mɔɔ kulo kɛ bɛnwu ye nɔhalɛ nu na bɛsonle Ye la ahonle nu.—1 Kɔl. 3:6.