The Watchtower ne anu Nzenzaleɛ Mɔɔ Yɛ Anyelielɛ!
1 Wɔ ɛvolɛ ɛhye mɔlebɛbo, asafo ne mɔ asa hanle nolobɔlɛ bie mɔɔ yɛ anyelielɛ: Ɔvi January 2008, bɛbayɛ The Watchtower ne ngakyile nwiɔ, maanlema ɛdeɛ yɛɛ yɛ mediema Keleseɛnema noko ɛdeɛ! Bie a ɛnee ɛlɛdwenle nwo kɛ: ‘Kɛzi magazine nwiɔ ne bayɛ ngakyile ɛ? Saa bɛyɛ ye ngakyile nwiɔ a, duzu nvasoɛ a yɛbanyia a? Asoo yɛbanwu ninyɛne fofolɛ bie wɔ nu?’
2 Ngakyile Mɔɔ wɔ Nu: Bɛbavɛlɛ siane ne anu kenle mɔɔ lumua la ɛdeɛ ne Maanlema Ɛdeɛ. Bɛbaziezie edwɛkɛ mɔɔ wɔ nu la kɔsɔɔti bɛamaa maanlema. Bɛbavɛlɛ siane ne anu kenle 15 ɛdeɛ ne Debiezukoalɛ Ɛdeɛ na yɛnrɛva yɛnrɛmaa wɔ daselɛlilɛ nu. Debie mɔɔ yɛbazukoa ye siane ne anu la amuala, yɛɛ edwɛkɛ gyɛne mɔɔ Keleseɛnema mɔɔ ɛyila bɛ nwo zo anye balie nwo titile la a bara nu a. Alasevolɛ anye balie Maanlema Ɛdeɛ ne anwo, noko menli mɔɔ ɛnle Alasevolɛ na bɛdie Baebolo ne bɛdi la anye balie nwo titile. Awake! bahɔ zo ava edwɛkɛ mɔɔ menli ngakyile mɔɔ kpolerazulɛma nee bɛdabɛ mɔɔ bɛnle Keleseɛnema boka nwo anye balie nwo la amaa.
3 Zolɛ Nvasoɛ: Wɔ Debiezukoalɛ Ɛdeɛ ne anu, ɔnrɛhyia bieko kɛ bɛkɛhilehile edwɛkɛ mɔɔ le kɛ “adekpakyelɛ” la anu amaa menli mɔɔ ɛnle Alasevolɛ la ade ɔ bo. Bɛbahola bɛaha edwɛkɛ mɔɔ bayɛ nvasoɛ titile amaa Gyihova Alasevolɛ nee Baebolo sukoavoma mɔɔ ɛlɛnyia sunsum nu anyuhɔlɛ la wɔ nu. Na Maanlema Ɛdeɛ ne ɛ? Bɛbanlea maanlema anwo a bɛakpa edwɛkɛ mɔɔ wɔ nu nee adenle mɔɔ bɛbava zo bɛahɛlɛ la a, yemɔti awie mɔɔ ɛnle Dasevolɛ la bahola ava anyelielɛ agenga magazine ne atulu ye. Noko Gyihova Dasevolɛ biala mɔɔ bagenga la banyia zolɛ nvasoɛ. Kɛmɔ Watchtower ko nee Awake! ko a yɛbava yɛamaa wɔ siane ne anu la ati, yɛbanyia mekɛ dɔɔnwo yɛaziezie edwɛkɛ kpalɛ mɔɔ yɛbaha ye wɔ nwolɛ la.
4 Ninyɛne Fofolɛ: Bɛlɛyɛ ninyɛne fofolɛ mɔɔ yɛ anyelielɛ la wɔ Maanlema Watchtower Ɛdeɛ ne anu. Ninyɛne mɔɔ bara nu la anu ko bahilehile Baebolo mɔlebɛbo ngilehilelɛ bie mɔ anu amaa nuhua ala ɛkɛ. Ko noko bahile kɛzi Baebolo ne kola boa mbusua la. Bɛbayɛ Baebolo ɛzukoalɛ nwo ngyehyɛleɛ wɔ nu bɛamaa ngakula. Siane biala ɛdeɛ ne baha Baebolo nu edwɛkɛ kpɔtee bie mɔɔ maa yɛnwu Gyihova subane ne mɔ la anwo edwɛkɛ.
5 Yɛsɛlɛ kɛ Gyihova ɛyila The Watchtower ne anwo ngyehyɛleɛ fofolɛ ɛhye azo. Ɔrɛla ye kɛ, zɔhane magazine ne nee Awake! ne bamaa menli mɔɔ fɛta la asa aha edwɛkpa ne.—Mat. 10:11.