Ngakyelɛlilɛ Mekɛ Ne—Ɔmaa Yɛnyia Adenle Yɛyɛ Dɔɔnwo!
1. Duzu ati a ɔwɔ kɛ yɛsuzu nwo kɛ yɛbayɛ gyima dɔɔnwo wɔ March, April yɛɛ May anu ɛ?
1 Asoo ɛbahola wɔayɛ dɔɔnwo wɔ daselɛlilɛ nu wɔ Ngakyelɛlilɛ mekɛ ne mɔɔ ɛlɛba la anu? Nolobɔlɛma bie mɔ bɛahola azɛlɛ adenle avi sukulu anzɛɛ gyima nu na bɛava bɛahɔ daselɛlilɛ. Bie mɔ noko bɛayɛ mekɛ ezinra nu adekpakyelɛ titile gyima ne mɔɔ bɛbayɛ ye wɔ siane ne mɔ mɔɔ ɛlɛba la anu bie. Ɔvi April 2 mɔɔ kɔ la, yɛbabɔ nolo titile yɛava yɛado ɛsalɛ yɛavɛlɛ anyelielɛma yɛamaa bɛara Ngakyelɛlilɛ ne mɔɔ yɛbayɛ ye wɔ April 17 la bie. Yemɔ anzi, yɛbabɔ mɔdenle yɛaboa menli mɔɔ rale la yɛamaa bɛ anyelielɛ ne ayɛ kpole na yɛado ɛsalɛ yɛavɛlɛ bɛ yɛamaa bɛaradie ɛdendɛlɛ titile ne mɔɔ bɛbamaa ye wɔ April 25 dapɛne ne anu la bie. Nɔhalɛ nu, yɛlɛ ninyɛne dɔɔnwo mɔɔ ɔti ɔwɔ kɛ yɛsuzu nwo kɛ yɛbayɛ gyima dɔɔnwo wɔ March, April yɛɛ May anu a.
2. Adenle kpalɛ ko boni a yɛbahola yɛalua zo yɛayɛ dɔɔnwo wɔ daselɛlilɛ nu a?
2 Adekpakyelɛ Boavolɛ Gyima: Adenle kpalɛ ko mɔɔ yɛbahola yɛalua zo yɛayɛ dɔɔnwo la a le kɛ yɛbayɛ adekpakyelɛ boavolɛ. Kɛmɔ yɛ kɔsɔɔti yɛnlɛ alagye la ati, ɔhyia kɛ yɛdumua yɛyɛ nwolɛ ngyehyɛleɛ na yɛtoto yɛ ninyɛne boɛ. (Mrɛ. 21:5) Bie a ɛbahola wɔadu ninyɛne bie mɔ mɔɔ anwo ɛngyia mɔɔ ɛta ɛyɛ la wɔazie. (Fel. 1:9-11) Kɛmɔti a ɛnga ɛhulolɛ mɔɔ ɛlɛ kɛ ɛyɛ adekpakyelɛ gyima ne bie la ɛngile asafo ne anu amra na ɛnnea kɛ bɛdabɛ noko bɛbayɛ adekpakyelɛ boavolɛ gyima ne bie a?
3. Kɛzi mbusua bahola ayɛ ngyehyɛleɛ na bɛayɛ dɔɔnwo ɛ?
3 Wɔ bɛ Abusua Ɛzonlenlɛ nɔsolɛ bieko abo, ɔle kpalɛ kɛ bɛkɛzuzu bodane mɔɔ gyi bɛ nye zo la anwo kɛ abusua. (Mrɛ. 15:22) Saa bɛka bɛ nwo bɛbɔ nu a, bie a abusua ne anu amra bie bahola ayɛ adekpakyelɛ boavolɛ wɔ siane ko anzɛɛ dɔɔnwo anu. Na saa bɛnwu kɛ bɛnrɛhola bɛnrɛyɛ ye zɔ ɛ? Abusua ne bahola ayɛ ngyehyɛleɛ kɛ bɛbayɛ dɔɔnwo wɔ daselɛlilɛ nu wɔ nɔsolɛ bie mɔ anu anzɛɛ bɛbahyɛ wɔ daselɛlilɛ nu wɔ dapɛne awieleɛ.
4. Saa yɛyɛ dɔɔnwo wɔ daselɛlilɛ nu wɔ Ngakyelɛlilɛ mekɛ ɛhye anu a, nyilalɛ boni a vi nu bara a?
4 Gyihova nwu debie biala mɔɔ yɛyɛ yɛfa yɛsonle ye la na ɔ nye sɔ yɛ afɔlebɔlɛ ne. (Hib. 6:10) Saa yɛyɛ debie yɛmaa Gyihova nee awie mɔ a ɔmaa yɛ nye die. (1 Edk. 29:9; Gyi. 20:35) Asoo ɛbahola wɔayɛ dɔɔnwo wɔ Ngakyelɛlilɛ mekɛ ɛhye anu na wɔanyia anyelielɛ nee nyilalɛ kpole ne mɔɔ vi nu ba la bie ɔ?