Yɛ Ngyehyɛleɛ Ɛnɛ Tɛlɛ Wɔ Ɛzonlenlɛ Gyima Ne Anu

1. Debie boni a nwolɛ hyia wɔ Ngakyelɛlilɛ mekɛ ne anu a, na kɛ ɔkɛyɛ na yɛaziezie yɛ nwo yɛamaa ɛ?

¹ Ngakyelɛlilɛ mekɛ biala maa yɛnyia adenle yɛyɛ “Gyihova mo kpole kpalɛ.” (Edw. 109:30) Ɛbadɛlɛ wɔ ɛzonlenlɛ gyima ne anu wɔ March kɛ ɛfa wɔahile anyezɔlɛ wɔamaa ɛkpɔnedeɛ Maavolɛ ne ɔ? Ɛnɛ a ɔwɔ kɛ ɛbɔ ɔ bo ɛyɛ nwolɛ ngyehyɛleɛ a.—Mrɛ. 21:5.

2. Mekɛ mɔɔ bɛdele adekpakyelɛ boavolɛma dɔnehwele ne azo wɔ ɛkenle ɛvolɛ ne April la, kɛzi ɛ nee menli mɔɔ ɛha la dele nganeɛ wɔ nwo ɛ?

² Adekpakyelɛ Boavolɛ Gyima: Ɛkenle ɛvolɛ ne, asafo dɔɔnwo anye liele kpole wɔ mekɛ mɔɔ bɛnwunle ngyehyɛleɛ ne mɔɔ kile kɛ bɛbahola bɛava dɔnehwele mɔɔ bɛde zo bɛayɛ adekpakyelɛ boavolɛ gyima wɔ April la. Adiema nrenya ko hɛlɛle kɛ: “Mekɔ sukunwiɔ, na ɔmmaa mengola menyɛ dahuu adekpakyelɛnli. Noko mebava dɔnehwele 30 meayɛ bie na meabɔ mɔdenle meayɛ dɔnehwele 50 wɔ April siane ne anu.” Adiema raalɛ mɔɔ yɛ gyima dahuu la hɛlɛle kɛ: “Dɔnehwele abulasa ɛdeɛ, ye ɛnyianlɛ ɛnyɛ se!” Mekɛ mɔɔ bɛhanle ngyehyɛleɛ ɛhye anwo edwɛkɛ la, adiema raalɛ ko mɔɔ ɛnee ɔle adekpakyelɛnli, na kɛkala yeli ɛvolɛ 80 la hanle kɛ: “Mekɛ ɛhye a ɛnee melɛkendɛ a! Gyihova ze kɛ ɛnee adekpakyelɛ gyima ne a boa me wɔ ɛbɛlabɔlɛ nu a!” Bɛdabɛ mɔɔ bɛnrɛhola bɛnrɛyɛ adekpakyelɛ boavolɛ la fa bodane bie mɔ sie bɛ nye zo kɛ bɛyɛ dɔɔnwo wɔ ɛzonlenlɛ gyima ne anu.

3. Ninyɛne boni mɔ ati a ɔwɔ kɛ yɛsuzu kɛ yɛbayɛ adekpakyelɛ boavolɛ gyima wɔ March, April, nee May ɛ?

³ March siane ne bayɛ mekɛ kpalɛ amaa adekpakyelɛ gyima, ɔluakɛ yɛbanyia adenle bieko yɛayɛ dɔnehwele 30 anzɛɛ 50. Bieko, ɔvi Folɛ, March 17 mɔɔ kɔ la, yɛbabɔ nolo titile bie abo yeava yeado ɛsalɛ yeavɛlɛ menli yɛamaa bɛara Ngakyelɛlilɛ ne bie wɔ April 5. Menli dɔɔnwo anye balie kɛ bɛbayɛ dɔɔnwo wɔ ɛzonlenlɛ gyima ne anu, yemɔti bɛbahulo noko kɛ bɛkɛva dɔnehwele 50 bɛkɛyɛ adekpakyelɛ boavolɛ wɔ April nee May.

4. Kɛ ɔkɛyɛ na yɛahola yɛadɛlɛ yɛ ɛzonlenlɛ gyima ne anu ɛ, na boni a bavi nu ara a?

⁴ Wɔ bɛ Abusua Ɛzonlenlɛ nɔsolɛ bieko abo, duzu ati a ɛ nee wɔ abusua ne ɛnzuzu adenle mɔɔ bɛ nuhua ko biala bahola ava zo adɛlɛ ye ɛzonlenlɛ gyima ne anu wɔ Ngakyelɛlilɛ mekɛ ne anu la anwo ɛ? (Mrɛ. 15:22) Sɛlɛ Gyihova kɛ ɔyila wɔ mɔdenlebɔlɛ ne azo. (1 Dwɔn 3:22) Saa ɛtɛlɛ wɔ ɛzonlenlɛ gyima ne anu a, ɔbamaa wɔaye Gyihova ayɛlɛ, na eza ɛ nye alie kpole.—2 Kɔl. 9:6.