‘Bɛli Edwɛkpa ne Anwo Daselɛ Kpalɛ’
1. Edwɛkpa boni a ɔwɔ kɛ yɛka a?
1 Wɔ ewiade mɔɔ bɛnde edwɛkɛ kpalɛ wɔ nu la anu, yɛlɛ nwolɛ adenle kɛ ‘yɛbabɔ edwɛkpa ne mɔɔ fane Nyamenle ɛlolɛ ne anwo la nolo.’ (Gyi. 20:24) Ɛhye kile kɛ yɛbamaa menli anwu kɛ ɔnrɛhyɛ “awieleɛ mekɛ ne” bapɛ nu yeamaa Gyihova tenlene ewiade fofolɛ ne, ɛleka mɔɔ “alumua ninyɛne ne mɔ ɛze ɛhɔ” la ara. (2 Tem. 3:1-5; Yek. 21:4) Zɔhane mekɛ ne anwodolɛ ɛnle ɛkɛ ne bieko. (Aye. 33:24) Alɔvolɛ mɔɔ ɛwu la vi bɛ ngakyelɛ nla ne mɔ anu bavinde na bɛ nee bɛ mbusua nee bɛ gɔnwo mɔ azia abɔ nu bieko. (Dwɔn 5:28, 29) Bɛbayɛ azɛlɛ ye kɔsɔɔti paladaese kɛnlɛma. (Aye. 65:21-23) Edwɛkpa ne mɔɔ ɔwɔ kɛ yɛka la anu ekyi bie ɛne!
2. Duzu ati a Ngakyelɛlilɛ mekɛ ne bamaa yɛanyia adenle kpalɛ yɛali edwɛkpa ne anwo daselɛ ɛ?
2 March, April yɛɛ May siane ne mɔ bamaa yɛanyia mekɛ kpalɛ yɛabɔ edwɛkpa ɛhye nolo. Wɔ siane ɛhye mɔ anu kɛzi maanle nu de wɔ ewiade ɛleka ne bie mɔ la maa ɔfɛta kɛ yɛfa mekɛ dɔɔnwo yɛdi daselɛ. Bieko, yɛbali ɛvolɛ ɛhye anu Ngakyelɛlilɛ ne mɔɔ le debie mɔɔ nwolɛ hyia la wɔ Folɛ, March 22, mekɛ mɔɔ ewia ne ɛhɔdɔ la wɔ ewiade amuala. Ɛnɛ a le mekɛ mɔɔ ɔwɔ kɛ yɛbɔ ɔ bo yɛsiezie yɛ nwo kɛ yɛbayɛ dɔɔnwo wɔ daselɛlilɛ nu a.
3. Duzu a baboa mbusua yeamaa bayɛ dɔɔnwo wɔ daselɛlilɛ nu a?
3 Adekpakyelɛ Boavolɛ: Asoo ɛbahola wɔayɛ ngyehyɛleɛ na wɔava siane ko, nwiɔ anzɛɛ siane nsa ne amuala wɔayɛ adekpakyelɛ boavolɛ? Duzu ati a bɛnva mekɛ bɛnzuzu edwɛkɛ ɛhye anwo wɔ bɛ abusua debiezukoalɛ bieko anu a? Saa bɛyɛ ngyehyɛleɛ kpalɛ a, abusua ne anu sonla ko anzɛɛ dɔɔnwo bahola ayɛ adekpakyelɛ boavolɛ gyima ne bie. (Mrɛ 15:22) Bɛva asɔneyɛlɛ bɛzuzu edwɛkɛ ɛhye anwo, na bɛnlea kɛzi Gyihova bayila bɛ mɔdenlebɔlɛ ne azo la. (Mrɛ. 16:3) Saa awie biala angola anyɛ adekpakyelɛ boavolɛ wɔ abusua ne anu bɔbɔ a, abusua ne anu amra bahola ava bodane fɔɔnwo bie azie bɛ nye zo na bɛ nee menli mɔɔ ɛlɛyɛ adekpakyelɛ gyima ne la alua amaa bɛayɛ dɔɔnwo wɔ daselɛlilɛ nu.
4. Saa yɛyɛ gyima a kɛzi yɛbahola yɛatoto yɛ ninyɛne boɛ amaa yɛahola yɛayɛ adekpakyelɛ boavolɛ gyima ne bie ɛ?
4 Saa ɛyɛ gyima a, ngyehyɛleɛ kpalɛ baboa wɔ yeamaa wɔahola wɔayɛ adekpakyelɛ boavolɛ. Bie a ɛbahola wɔava wɔ ewiazo ɛnwomenlelielɛ mekɛ ne bie wɔali daselɛ. Anzɛɛ ɛbahola wɔalie azɛlɛsinli mɔɔ bikye wɔ sua nu anzɛɛ wɔ gyima nu la amaa wɔahɔ daselɛlilɛ kɛyɛ dɔnehwele ko kolaa na wɔahɔ gyima anzɛɛ wɔ mekɛ mɔɔ wɔkpɔne la. Ɛbahola noko wɔadu ninyɛne mɔɔ anwo ɛngyia la wɔazie siane fofolɛ amaa wɔanyia mekɛ dɔɔnwo wɔava wɔahɔ daselɛlilɛ wɔ dapɛne awieleɛ. Bie mɔ ɛzɛlɛ kenle ko anzɛɛ nwiɔ ɛvi gyima nu amaa banyia mekɛ dɔɔnwo bɛava bɛahɔ daselɛlilɛ.
5. Kɛzi ɛbahola wɔaboa awie mɔɔ ɛyɛ kpanyinli anzɛɛ ɔnlɛ anwosesebɛ la wɔamaa yeayɛ adekpakyelɛ boavolɛ ɛ?
5 Saa wɔyɛ kpanyinli anzɛɛ ɛnlɛ anwosesebɛ a, ɛbahola wɔayɛ adekpakyelɛ boavolɛ gyima ɔlua mekɛ ekyi mɔɔ ɛbava wɔahɔ daselɛlilɛ alehyenlɛ biala la azo. Biza Gyihova maa ɔmaa wɔ “tumi bedevinli ne.” (2 Kɔl. 4:7) Adiema raalɛ ko mɔɔ ɛli ɛvolɛ 106 la holale yɛle adekpakyelɛ boavolɛ gyima! Kɛmɔ ɔ nwo amra mɔɔ bɛle Keleseɛnema nee menli mɔɔ wɔ asafo ne anu boale ye la ati, ɔholale ɔlile daselɛ wɔ sua nu nee sua nu, ɔyɛle sia kɔkpɔla, Baebolo ɛzukoalɛ na ɔvale ɔ nwo ɔwulale ɛzonlenlɛ gyima ne afoa ngakyile nu. Ɔboale ɔmanle bɛ nee menli bulu bɔle Baebolo ɛzukoalɛ bo. Ɔhanle kɛ: “Saa medwenle nwolɛ adenle kɛnlɛma mɔɔ menyianle menzonlenle kɛ adekpakyelɛ boavolɛ la anwo a, ɔmaa menyia ɛlɔlɛ nee anyezɔlɛ kpole memaa Gyihova, ɔ Ra ne nee Ye ahyehyɛdeɛ ne mɔɔ ɛlɔlɛ wɔ nu la. Meka ye nɔhalɛ nu kɛ ‘Gyihova, mo!’”
6. Kɛzi mgbavolɛ mɔɔ bɛzɔne bɛ mɔɔ bɛtɛkɔ sukulu la bahola ayɛ adekpakyelɛ boavolɛ gyima ne bie ɛ?
6 Saa ɛle kpavolɛ mɔɔ bɛzɔne wɔ na ɛtɛkɔ sukulu a, ɛdawɔ noko ɛbahola wɔayɛ adekpakyelɛ boavolɛ gyima ne bie. Ɛbahola wɔayɛ ngyehyɛleɛ wɔava wɔ dapɛne awieleɛ ne mɔ wɔali gyima kpalɛ kɛ menli mɔɔ yɛ gyima la. Bie a ɛbahola wɔahɔ daselɛlilɛ kɛyɛ dɔnehwele ko kolaa na wɔahɔ sukulu anzɛɛ wɔ mekɛ mɔɔ wɔkpɔne sukulu la wɔ kenle ne bie mɔ anu. Sukulu ɛnwomenlelielɛ mekɛ bie wɔ ɛkɛ mɔɔ ɛbahola wɔava wɔahɔ daselɛlilɛ ɔ? Saa ɛkulo kɛ ɛyɛ adekpakyelɛ boavolɛ gyima ne bie a, ka nwolɛ edwɛkɛ kile wɔ awovolɛ.
7. Duzu a mgbanyima ne mɔ bahola ayɛ ava awula daselɛlilɛ nwo anwosesebɛ wɔ Ngakyelɛlilɛ mekɛ ne anu a?
7 Bɛwula Nwolɛ Anwosesebɛ: Mgbanyima ne mɔ bahola alua bɛ neazo zo ayɛ dɔɔnwo ava awula asafo ne anu amra anwosesebɛ. (1 Pit. 5:2, 3) Bɛbahola bɛayɛ daselɛlilɛ nwo ngyehyɛleɛ bɛamaa menli mɔɔ kulo kɛ kɔ daselɛlilɛ nwonlomɔ ne ala, mekɛ mɔɔ bɛkpɔne sukulu anzɛɛ gyima la. Ɔwɔ kɛ ɛzonlenlɛ gyima zo neavolɛ ne nwu ye kɛ bɛbanyia mediema mɔɔ fɛta la bɛamaa bɛanlea daselɛlilɛ ne azo na bɛanyia azɛlɛsinli dɔɔnwo bɛayɛ nuhua gyima yɛɛ mbuluku nee magazine mɔɔ bɛbava bɛali daselɛ wɔ gyimalilɛ titile siane ɛhye mɔ anu la.
8. Duzu a yɛsukoa yɛfi mɔɔ asafo ko yɛle la anu a?
8 Wɔ asafo ko anu, mgbanyima ne mɔ lumua wulale mediema anwosesebɛ wɔ adekpakyelɛ boavolɛ gyima ne anwo wɔ siane dɔɔnwo anu. Dapɛne biala anu bɛhɔle zo bɛbɔle asafo ne amaneɛ wɔ nolobɔlɛma dodo mɔɔ bɛlie bɛ bɛdo nu kɛ bɛyɛ adekpakyelɛ boavolɛ gyima ne bie la anwo. Ɛhye manle menli mɔɔ kulo kɛ yɛ dɔɔnwo wɔ daselɛlilɛ nu la nwunle kɛ bɛbanyia mediema bɛ nee bɛ ahɔ daselɛlilɛ. Bɛyɛle daselɛlilɛ nyianu nwo ngyehyɛleɛ bɛmanle menli mɔɔ kulo kɛ kɔ nwonlomɔ ne ala yɛɛ nɔsolɛ nu la. Mɔɔ vi nu rale a le kɛ bɛnyianle mediema 53 mɔɔ asɛɛ le menli mɔɔ wɔ asafo ne anu foa ko la yɛle adekpakyelɛ boavolɛ gyima ne bie wɔ April siane ne anu!
9. Duzu ati a Ngakyelɛlilɛ mekɛ ne le mekɛ kpalɛ maa menli mɔɔ fɛta, kɛ bɛbɔ edwɛkpa ne anwo nolobɔlɛ bo la ɛ?
9 Boa Awie Mɔ Maa Bɛli Daselɛ: Saa menli mɔɔ bɛle fofolɛ nee mgbavolɛ la fɛta kɛ bɛkɔ daselɛlilɛ a, bɛbahola bɛamaa bɛ nee nolobɔlɛma mɔɔ bɔ mɔdenle la alua wɔ daselɛlilɛ nu. Bɛbahola bɛanyia nwolɛ adenle ɛhye wɔ Ngakyelɛlilɛ mekɛ ne mɔɔ asafo ne anu amra dɔɔnwo babuke bɛ ɛzonlenlɛ gyima ne anu la anu. Ɛlɛ Baebolo sukoavo mɔɔ ɛlɛnyia anyuhɔlɛ mɔɔ ɛmaa ye ɛbɛlabɔlɛ nee Gyihova tenlene ngyinlazo ne mɔ ɛyɛ ko la ɔ? Ɛlɛ ngakula mɔɔ bɔ ɛbɛla kpalɛ mɔɔ bɛlɛnyia anyuhɔlɛ noko bɛnle nolobɔlɛma la ɔ? Saa menli zɛhae mɔ ɛha kɛ bɛkulo kɛ bɛkɔ daselɛlilɛ na ɛte nganeɛ kɛ bɛfɛta a, ɛnee ka nwolɛ edwɛkɛ kile asafo ne anu mgbanyima ne mɔ. Ebianutɛnlavolɛ ne bayɛ ngyehyɛleɛ amaa mgbanyima nwiɔ nee wɔ yɛɛ ɛ ra ne anzɛɛ wɔ sukoavo ne ayia.
10. Duzu a mgbanyima ne mɔ bahola ayɛ ava aboa menli mɔɔ bɛyɛ bɛtɛɛ la ɛ?
10 Siane ne mɔ mɔɔ ɛlɛba la le kpalɛ maa menli mɔɔ ɛyɛ bɛtɛɛ la kɛ bɛbahola bɛ nee asafo ne azia abɔ nu ayɛ gyima. Ɔwɔ kɛ Asafo Buluku Ɛzukoalɛ zo neavolɛma nee mgbanyima gyɛne bɔ mɔdenle kpɔla menli zɛhae mɔ na bɛto ɛsalɛ bɛfɛlɛ bɛ kɛ bɛkulo kɛ bɛ nee bɛ kɔ daselɛlilɛ. Saa bɛyɛ bɛtɛɛ bɛhyɛ a, ɔwɔ kɛ mgbanyima nwiɔ dumua nee bɛ tendɛ na bɛnwu kɛ saa bɛfɛta a.—km 11/00 m. 7.
11. “Nyamenle ɛlolɛ” kpole kpalɛ mɔɔ yela ye ali la a le duzu?
11 Siezie Ɛ Nwo Maa Ngakyelɛlilɛ Ne: Ɛkpɔnedeɛ ne le “Nyamenle ɛlolɛ” kpole kpalɛ mɔɔ yela ye ali a. (Gyi. 20:24) Menli mgbe mgbe mɔɔ lɛ nwolɛ anyezɔlɛ la bayia nuhua wɔ Folɛ, March 22, ali Kelaese ewule ne anwo Ngakyelɛlilɛ ne wɔ mekɛ mɔɔ ewia ne ɛhɔdɔ la wɔ ewiade amuala. Yɛkulo kɛ yɛto ɛsalɛ yɛfɛlɛ ahonlekpalɛma kɔsɔɔti kɛ bɛrɛla ɛvoyialilɛ titile ɛhye mɔɔ di kɛzi Gyihova ɛlo alesama anwo daselɛ la bie.
12. Nwane mɔ a ɔwɔ kɛ yɛto ɛsalɛ yɛfɛlɛ bɛ yɛmaa bɛba ngakyelɛlilɛ ne bie a?
12 Kɛlɛ menli mɔɔ ɛkulo kɛ ɛto ɛsalɛ ɛfɛlɛ bɛ la aluma. Ɔda ali wienyi kɛ menli mɔɔ ɛbahɛlɛ bɛ aluma la bie mɔ a le ɛ nwo amra, ɛ gɔnwo mɔ mɔɔ ɛ nee bɛ kɔ sukulu, wɔ Baebolo sukoavoma dɛba nee nuhua ne mɔɔ ɛ nee bɛ tɛsukoa yɛɛ menli mɔɔ ɛta ɛkpɔla bɛ dahuu la. Saa menli mɔɔ ɛkɛdo ɛsalɛ ɛkɛvɛlɛ bɛ la bie mɔ biza kpuyia wɔ Ngakyelɛlilɛ ne anwo a, ɛbahola wɔava Baebolo ne Kilehile buluku ne anu mokanwo edwɛkɛ ne mɔɔ fane Awulae Nɔsolɛ Aleɛ ne anwo mɔɔ wɔ mukelɛ 206-8 la wɔaboa ye. Ɛhye bahola abuke Baebolo ɛzukoalɛ nwo adenle, ɔluakɛ ɔbamaa wɔanyia adenle wɔava buluku ne mɔɔ yɛfa yɛyɛ Baebolo ɛzukoalɛ la wɔahile ye.
13. Kɛzi Gyihova yilale nolobɔlɛma nwiɔ mɔɔ bɔle mɔdenle dole ɛsalɛ vɛlɛle awie mɔ manle bɛhɔle Ngakyelɛlilɛ ne bie la ɛ?
13 Adiema raalɛ ko hɛlɛle ye abusua ne anu menli 48 aluma. Bɛ nuhua biala mɔɔ ɔkɛvɛlɛ ye la ɔpɛ ye duma nu na ɔkɛlɛ mekɛ mɔɔ ɔvɛlɛle ye la. Nea kɛzi ɔ nye liele kɛ menli mɔɔ ɔvɛlɛle bɛ la anu 26 rale Ngakyelɛlilɛ ne bie a! Adiema nrenya bie mɔɔ lɛ sotɔɔ la dole ɔ sa vɛlɛle ye gyimayɛvolɛ mɔɔ ɛnee le ɛsɔfo la. Nrenya ne rale na yemɔ anzi ɔhanle kɛ: “Menzukoale Baebolo ne anu ninyɛne dɔɔnwo wɔ dɔnehwele ko anu mendɛlale ɛvolɛ 30 mɔɔ menlile wɔ Wulomane asɔne ne anu la.” Ngakyelɛlilɛ ne anzi mekɛ ekyi bie anu, ɔmanle bɛ nee ye bɔle debiezukoalɛ bo wɔ Baebolo ne Kilehile buluku ne anu.
14. Ewiade amuala gyimayɛlɛ boni a babɔ ɔ bo wɔ March 1 a?
14 Gyimayɛlɛ: Ɔbɔ ɔ bo Folɛ, March 1 toonwo kɔdwu March 22 la, bɛbava ɛsalɛdolɛ kɛlata titile bɛado ɛsalɛ bɛavɛlɛ menli wɔ ewiade amuala kɛ bɛrɛla Ngakyelɛlilɛ ne bie. Yɛ kɔsɔɔti yɛkulo kɛ yɛyɛ gyima ɛhye mɔɔ hyia la bie. Ɔkɛyɛ kpalɛ kɛ yɛkɛva ɛsalɛdolɛ kɛlata ɛhye yɛkɛmaa suamenle ne tɛla kɛ yɛkɛgyakyi ye wɔ anlenkɛ ne anloa. Noko akee saa bɛlɛ azɛlɛsinli dɔɔnwo a, mgbanyima ne mɔ bahola amaa bɛagyakyi bie wɔ menli mɔɔ ɛnee bɛnle sua nu la ɛkɛ. Wɔ dapɛne awieleɛ yɛbava magazine mɔɔ ɛra fofolɛ la yɛamaa.
15. Kɛzi yɛbava Ngakyelɛlilɛ ɛsalɛdolɛ kɛlata ne yɛamaa ɛ?
15 Kɛmɔ mekɛ mɔɔ yɛbava yɛamaa ɛsalɛdolɛ kɛlata ne anzo la ati, ɔwɔ kɛ yɛka edwɛkɛ sikalɛ bie ala. Fi anyelielɛ nu tendɛ. Ɛbahola wɔaha debie zɛhae: “Yɛkulo kɛ yɛto ɛsalɛ yɛfɛlɛ wɔ, wɔ abusua ne anu amra yɛɛ ɛ gɔnwo mɔ yɛmaa bɛba ɛvoyialilɛ mɔɔ anwo hyia mɔɔ bɛbayɛ ye March 22 la bie. Wɔ ɛsalɛdolɛ kɛlata ɛdeɛ ɛ. Edwɛkɛ mɔɔ ɛha la wɔ kɛlata ne azo.” Bie a suamenle ne babiza kpuyia bie mɔ. Anzɛɛ ɔbalie ɛsalɛdolɛ kɛlata ne na yeaha kɛ ɔkɛra. Yɛ awie mɔɔ kɛhile nwolɛ anyelielɛ la nzonlɛ na yɛ ngyehyɛleɛ sia kɔkpɔla ye.
16. Anwubielɛ boni a kile nvasoɛ mɔɔ wɔ zo kɛ yɛkɛva kɛlata ne yɛkɛdo ɛsalɛ yɛkɛvɛlɛ menli mɔɔ wɔ yɛ azɛlɛsinli ne anu la kɛ bɛrɛla Ngakyelɛlilɛ ne bie a?
16 Ɛkenle ɛvolɛ ne sogyanli bie nwunle Ngakyelɛlilɛ ɛsalɛdolɛ kɛlata ne wɔ ye anlenkɛ ne anyunlu. Ɔyɛle kɛ ɔbahɔ bie noko ɛnee ɔwɔ kɛ ɔsɛlɛ adenle ɔfi ye kpanyinli ne ɛkɛ. Mekɛ mɔɔ ɔvale kɛlata ne ɔhilele sogya kpanyinli ne la, kpanyinli ne yɛle koonwu na akee ɔhanle kɛ ye awovolɛ le Alasevolɛ na ɛnee ɔ nee bɛ kɔ debiezukoalɛ. Sogya kpanyinli ne manle ye adenle na akee ɔdaye kpanyinli mumua ne ɔ nee ye hɔle Ngakyelɛlilɛ ne abo!
17. Kɛzi yɛkola yɛkile kɛ yɛtɛmanle Nyamenle ɛlolɛ ne ɛtɛyɛle mgbane ɛ?
17 Kile Nwolɛ Anyezɔlɛ: Mekɛ mɔɔ ɛvolɛ 2008 Ngakyelɛlilɛ mekɛ ne ɛlɛbikye la, ɔrɛla ye kɛ yɛ nuhua ko biala kɛdwenledwenle kɛzi Gyihova ɛlo yɛ la anwo. Ɛzoanvolɛ Pɔɔlo hɛlɛle kɛ: “yɛbodo yɛsɛlɛ bɛ kɛ bɛmmamaa Nyamenle ɛlolɛ ne mɔɔ bɛ sa ɛha ye la yɛ mgbane.” (2 Kɔl. 6:1) Kɛzi yɛda ye ali kɛ Nyamenle ɛlolɛ ne ɛtɛyɛle mgbane ɛ? Pɔɔlo hɛlɛle kɛ: “Wɔ yɛ nyɛleɛ biala anu . . . yɛkile kɛ yɛle Nyamenle sonvolɛma.” (2 Kɔl. 6:4) Ɛhye ati yɛdua yɛ nyɛleɛ kpalɛ nee mɔdenle mɔɔ yɛbava yɛabɔ edwɛkpa ne nolo la azo yɛkile kɛ yɛ nye sɔ Gyihova ahyɛlɛdeɛ ne. Wɔ Ngakyelɛlilɛ mekɛ ɛhye anu yɛbanyia adenle kɛnlɛma yɛayɛ dɔɔnwo na yɛali edwɛkpa ne anwo daselɛ kpalɛ.
[Caption on page 3]
Nwane Mɔ a Bahola Ayɛ Adekpakyelɛ Boavolɛ Gyima ne Bie A?
◼ Mbusua
◼ Menli mɔɔ yɛ gyima
◼ Menli mɔɔ ɛyɛ mgbanyinli na bɛnlɛ anwosesebɛ
◼ Menli mɔɔ kɔ sukulu
[Caption on page 4]
Ɛlɛfa Ɛsalɛdolɛ Kɛlata ne Wɔamaa A:
◼ Ka edwɛkɛ sikalɛ; fa anyelielɛ tendɛ
◼ Yɛ menli mɔɔ anye kɛlie nwolɛ la nzonlɛ, na sia kɔkpɔla bɛ
◼ Fa magazine ne maa wɔ dapɛne awieleɛ