Ɛbayɛ Adekpakyelɛ Boavolɛ Ɔ?
1. Duzu ati a Ngakyelɛlilɛ mekɛ ne le mekɛ kpalɛ mɔɔ yɛfa yɛtɛlɛ yɛ ɛzonlenlɛ gyima ne anu ɛ?
1 Ngakyelɛlilɛ mekɛ ne le mekɛ kpalɛ mɔɔ yɛfa yɛtɛlɛ yɛ ɛzonlenlɛ gyima ne anu a. Ɔle mekɛ mɔɔ yɛsuzu Gyihova ɛlɔlɛ kpole mɔɔ ɔluale zo ɔvale ɔ Ra ne ɔmanle kɛ ɛkpɔnedeɛ la anwo. (Dwɔn 3:16) Ɛhye ka yɛ ahonle maa yɛnyia anyezɔlɛ, na yɛnyia ɛhulolɛ kpole kɛ yɛbaha Gyihova nee mɔɔ ɔlɛyɛ la anwo edwɛkɛ yɛahile alesama. (Aye. 12:4, 5; Luku 6:45) Eza ɔle mekɛ mɔɔ yɛdua nolobɔlɛ titile zo yɛto ɛsalɛ yɛfɛlɛ yɛ gɔnwo mɔ nee menli mɔɔ wɔ azɛlɛsinli ne anu la yɛmaa bɛ nee yɛ kɔ Ngakyelɛlilɛ ne a. Yemɔ anzi, yɛbɔ mɔdenle kɛ yɛbamaa menli mɔɔ rale bie la anyelielɛ ne ayɛ kpole. Ɛbadɛlɛ wɔ ɛzonlenlɛ gyima ne anu, na wɔayɛ adekpakyelɛ boavolɛ wɔ March, April, anzɛɛ May ɔ?
2. Duzu a maa March yɛ siane titile maa adekpakyelɛ boavolɛ gyima ɛ?
2 Maa March Ɛyɛ Siane Titile: March bayɛ siane titile amaa adekpakyelɛ boavolɛ gyima. Menli mɔɔ babiza nwolɛ adenle la bɛahile kɛ bɛbayɛ dɔnehwele 30 anzɛɛ 50. Saa maanzinli zo neavolɛ ne bakpɔla bɛ wɔ March a, adekpakyelɛ boavolɛma bahɔ nyianu mɔɔ ɔ nee dahuu yɛɛ adekpakyelɛma titile bayɛ la amuala bie. Ɛsalɛ mɔɔ yɛbado yɛavɛlɛ menli yɛamaa bɛara Ngakyelɛlilɛ ne, mɔɔ yɛbayɛ ye Dwɛkɛ, March 26, 2013 la, bayɛ mekɛ tendenle adɛla dɛba ne ɛdeɛ ne, na ɔbabɔ ɔ bo wɔ March 1. Bieko, dapɛne awieleɛ nnu a wɔ March anu a. Yemɔti, duzu ati a ɛnzuzu nwolɛ kpalɛ saa ɛbahola wɔaboka nwo wɔamaa bɛayɛ ɛhye siane titile kpalɛ wɔ ɛvolɛ ne anu a?
3. Kɛ ɔkɛyɛ na yɛayɛ ngyehyɛleɛ amaa yɛayɛ dɔɔnwo wɔ daselɛlilɛ nu ɛ?
3 Yɛ Ngyehyɛleɛ Ɛnɛ: Ɛnɛ a le mekɛ mɔɔ ɔwɔ kɛ ɛsuzu wɔ ngyehyɛleɛ ne anwo na ɛnea ɛleka mɔɔ ɔhyia kɛ ɛyɛ nzenzaleɛ amaa wɔahola wɔayɛ adekpakyelɛ gyima ne bie a. Abusua koyɛlɛ nwo hyia, yemɔti saa bɛlɛyɛ nɔsolɛ Abusua Ɛzonlenlɛ ne a bɛva mekɛ ekyi bɛzuzu abusua ne bodane ne anwo na bɛyɛ nwolɛ ngyehyɛleɛ. (Mrɛ. 15:22) Saa wɔangola wɔanyɛ adekpakyelɛ boavolɛ a, mmamaa wɔ abɛ nu bu. Asoo ɛbahola wɔayɛ wɔ ngyehyɛleɛ kpalɛ na wɔahyɛ ekyii wɔ kenle mɔɔ ɛnrɛhɔ ɛleka bie la anu? Asoo ɛbahola wɔahɔ daselɛlilɛ wɔ kenle fofolɛ nu wɔ dapɛne ne anu?
4. Saa yɛyɛ dɔɔnwo wɔ March, April nee May anu a, nvasoɛ boni a bavi nu ara a?
4 Saa yɛyɛ dɔɔnwo wɔ March, April nee May a, yɛbanyia anyelielɛ nee ahunlundwolɛ kpole mɔɔ yɛsonle Gyihova nee awie mɔ a ɔvi nu ɔba la. (Dwɔn 4:34; Gyi. 20:35) Mɔɔ hyia kpalɛ la, yɛ anwofamaa ne bamaa Gyihova anye alie.—Mrɛ. 27:11.