Yɛle Alasevolɛ Mekɛ Biala
1. Duzu a yɛkola yɛsukoa yɛfi Gyisɛse daselɛ ne mɔɔ ɔlile ye wɔ bula ne anwo la anu ɛ?
1 Ɛnee Gyisɛse ɛva mekɛ dɔɔnwo ɛdia. Ɛnee yevɛ yɛɛ nzuhɔne ɛlɛku ye. Mekɛ mɔɔ ye ɛdoavolɛ ne mɔ hɔle kɛ bɛkadɔ aleɛ la, ɔdɛnlanle bula bie mɔɔ wɔ Samɛlea sua bie azo la kɛ ɔdie ɔ menle. Gyisɛse angɔ Samɛlea kɛ ɔkali daselɛ; ɛnee ɔlɛpɛ nuhua yeahɔ Galeli yeahɔdoa ye ɛzonlenlɛ gyima ne azo wɔ ɛkɛ. Noko akee, ɔvale nwolɛ adenle ne ɔlile raalɛ bie mɔɔ ɛlɛto bula ne bie la daselɛ. (Dwɔn 4:5-14) Duzu ati ɔ? Gyisɛse angyakyi kɛ ɔkɛyɛ Gyihova “nɔhalɛ dasevolɛ.” (Yek. 3:14) Saa yɛyɛ Gyihova Alasevolɛ mekɛ biala a, ɛnee yɛlɛsukoa Gyisɛse.—1 Pita 2:21.
2. Kɛ ɔkɛyɛ na yɛaziezie yɛ nwo yɛali mgbemgbɛnenu daselɛ ɛ?
2 Siezie Ɛ Nwo: Saa yɛlɛ mbuluku wɔ yɛ nwo a, yɛbahola yɛaziezie yɛ nwo yɛali mgbemgbɛnenu daselɛ. Nolobɔlɛma dɔɔnwo fa trate na bɛfa bɛmaa menli mɔɔ yɛ gyima wɔ sotɔɔ nu, ɛleka mɔɔ bɛtɔne patulo nee awie mɔ mɔɔ bɛ nee bɛ kɛyia wɔ alehyenlɛ ne anu la. (Nolo. 11:6) Adiema raalɛ ko mɔɔ ta tu adenle la nea kɛ dahuu ɔlɛ Baebolo nee Baebolo ne Kilehile buluku na ɔbɔ mɔdenle ɔfa ɔ nee menli mɔɔ ɔ nee bɛ de nwolɛ la bɔ adwelielilɛ bo.
3. Kɛ ɔkɛyɛ na yɛabɔ adwelielilɛ bo ɛ?
3 Bɔ Adwelielilɛ Bo: Saa yɛlɛdi mgbemgbɛnenu daselɛ a, ɔngyia kɛ yɛfa Ngɛlɛlera ne anu edwɛkɛ biala yɛbɔ ɔ bo. Mekɛ mɔɔ Gyisɛse nee raalɛ ne ɛlɛdi adwelie wɔ bula ne azo la, yeanla ɔ nwo ali kɛ yemɔ a le Mɛzaya ne yeanva yeambɔ ɔ bo. Ɔzɛlɛle ye nzule ala na ɔmanle ɔ nye liele kɛ ɔ nee ye kɛdendɛ. (Dwɔn 4:7-9) Adiema raalɛ ko noko nwunle kɛ zɔhane adenle ko ne ala boa ye maa ɔbɔ adwelielilɛ bo, wɔ mekɛ mɔɔ bɛkɛbiza ye kɛ ɔlile ɛnwomenlelielɛ bie la. Kɛ anrɛɛ ɔkɛbua kɛ ɔnli ɛnwomenlelielɛ ɔluakɛ ɔle Gyihova Alasevolɛ la ati la, ɔka kɛ: “Mebɔ kpɔkɛ kɛ menrɛli bie.” Ahenle mɔɔ bizale kpuyia ne la ta ka kɛ kɛmɔti ɛ, na ɔmaa adiema raalɛ ne nyia adenle di ye daselɛ.
4. Duzu ati a Mateyu 28:18-20 maa wɔ anwosesebɛ ɛ?
4 Ɔwɔ nuhua kɛ Gyisɛse bɔle mɔdenle wiele ye ɛzonlenlɛ gyima ne wɔ azɛlɛ ye azo ɛdeɛ, noko, ɔ nye tɛdie daselɛlilɛ gyima ne mɔɔ bɛlɛyɛ ye kɛmɔ ɔyɛle la anwo kpalɛ. (Mat. 28:18-20) Ɛhye ati, kɛmɔ Gyisɛse yɛle nwolɛ Neazo manle yɛ la, yɛdayɛ noko yɛle Alasevolɛ mɔɔ yɛziezie yɛ nwo kɛ yɛbaha yɛ diedi ne anwo edwɛkɛ wɔ bagua nu mekɛ biala a.—Hib. 10:23.