Yɛbɔ Mɔdenle Yɛnyia Anyuhɔlɛ Wɔ Daselɛlilɛ Nu—Bɔ Adawubɔlɛ Bo Amaa Wɔali Daselɛ Wɔ Mekɛ Mɔɔ Ɛnle Daselɛlilɛ Nu

Deɛmɔti Ɔhyia La: Fane dɔɔnwo ne ala saa yɛlɛyɛ azua nu daselɛlilɛ a, yɛndo menli dɔɔnwo wɔ sua nu. Noko akee, bie a yɛbayia bɛ wɔ mekɛ mɔɔ yɛde kale nu, yɛwɔ asopiti na yɛlɛkendɛ dɔketa, yɛlɛdie yɛ ɛnwomenle wɔ sukulu anzɛɛ gyima nu, nee ɛleka dɔɔnwo. Gyihova ɛhulolɛdeɛ a le kɛ menli kɔsɔɔti bade Belemgbunlililɛ edwɛkɛ ne. (1 Tem. 2:3, 4) Amaa yɛahola yɛali daselɛ la, fane dɔɔnwo ne ala ɔwɔ kɛ yɛdumua yɛbɔ adawubɔlɛ bo.

Kɛzi Bɛyɛ Ye La:

Kpa edwɛkɛ mɔɔ ɛbaha. Asoo ahenle te ɔ nyunlu yɛɛ ɔbahulo kɛ ɔbadendɛ? Asoo tɛnlabelɛ ne bamaa bɛahola bɛabɔ adawu? Nolobɔlɛma bie mɔ dumua nea ahenle anyunlu na bɛsele ekyi. Saa ahenle noko sele a, bɛbɔ mɔdenle kɛ bɛbabɔ adawubɔlɛ bo.
Saa ɛnlɛ akɛnrazilɛ mɔɔ ɛbava wɔadendɛ a, yɛ asɔne sikalɛ wɔ ɛ ti anu.—Nih. 2:4; Gyi. 4:29.
Fa edwɛkɛ sikalɛ bɔ ɔ bo, bie a ahyebizalɛ. Gyisɛse anva Belemgbunlililɛ ne anwo edwɛkɛ ambɔ ɔ nee Samɛlea raalɛ ne adawubɔlɛ ne abo. (Dwɔn 4:7) Ɔdwu mekɛ ne bie a, ɛbahola wɔava nganvolɛ le kɛ: “Ɛ mra ne mɔ bu debie kpalɛ!” wɔabɔ wɔ adawubɔlɛ ne abo. Ɛbahola wɔava kpuyia noko wɔabɔ ɔ bo: “Ɛdele nɔsolɛ ne amaneɛbɔlɛ ne ɔ?”
Mekɛ mɔɔ adawubɔlɛ ne ɛbɔ ɔ bo la, kpondɛ nwolɛ adenle ka edwɛkɛ ne, noko mmapele ɛ nwo. Maa adawubɔlɛ mumua ne ɛva ɔ nwo ɛrɛla. Bie a ɛbahola wɔaha edwɛkɛ bie mɔɔ ɔbamaa ahenle ahulo kɛ ɔbanwu dɔɔnwo la. Kɛ neazo la, saa adawubɔlɛ ne fane abusua nwo a, ɛbahola wɔaha kɛ, “Menwu kɛzi bɛtete ngakula la anwo folɛdulɛ bie mɔɔ baboa la.” Saa ɔfane edwɛkɛ mɔɔ rale amaneɛbɔlɛ nu la anwo a, ɛbahola wɔaha kɛ, “Kenlensa ye, me nye ɛlie edwɛkɛ kpalɛ bie mɔɔ bava nzenzaleɛ ara la ɛgengalɛ nwo.” Saa wɔangola wɔanli ye daselɛ na adawubɔlɛ ne azo pɛ bɔbɔ a, mmamaa ɛ sa nu to.
Fa trate anzɛɛ mbuluku gyɛne mɔɔ ɛbahola wɔava wɔamaa awie mɔɔ kɛhile edwɛkɛ ne anwo anyelielɛ la sie ɛ nwo.

Sɔ Ɛhye Nea Wɔ Siane Ɛhye Anu:

Yeanyɛ boɛ fee la, bɔ adawubɔlɛ ko abo dapɛne biala kɛ ɛfa wɔali daselɛ wɔ mekɛ mɔɔ ɛnle daselɛlilɛ nu la.