Ɛlɛfa Wɔali Gyima Kpalɛ Ɔ?
1 “Me nye la kɛ mebava meahɔ daselɛlilɛ!” Ɛhye a adiema raalɛ ko hɛlɛle wɔ mekɛ mɔɔ ɔgengale The Watchtower January 1, 2008 ɔwiele la. Asoo wɔzuzu ninyɛne mɔɔ dahuu ba mɔɔ yɛfa yɛmaa la anu bie mɔ anwo, na wɔnwu ndenle mɔɔ ɛbalua zo wɔava wɔali gyima wɔ daselɛlilɛ nu la ɔ?
2 “Mɔɔ Yɛsukoa Yɛfi Gyisɛse Ɛkɛ”: Bie a wɔnwu kɛ edwɛkɛ ɛhye boa maa ɛbɔ Baebolo ɛzukoalɛ bo. Saa ɛtɛdumuale ɛtɛyɛle zɔ a, bɔ ɔ bo kenga edwɛkɛ ne ati ne kile suamenle ne na kile mɔɔ Gyisɛse hanle ye wɔ edwɛkɛ ne anwo kɛmɔ ɔwɔ ɛdendɛkpunli ne mɔɔ lumua la anu la. Saa ɔkile nwolɛ anyelielɛ a bɔ mɔdenle fa edwɛkɛtile ngyikyi ne mɔ mɔɔ bɛle kpuyia mɔɔ bɛfa bɛsuzu edwɛkɛ nwo la toa adawubɔlɛ ne azo. Maa ɔha kpuyia ne anwo edwɛkɛ. Kilehile nvoninli biala mɔɔ boka nwo la anu sikalɛ na kɔ ɛdendɛkpunli bieko mɔɔ doa zo la azo. Ɛbahola wɔaha edwɛkɛ ne foa ne mɔɔ lumua la anwo edwɛkɛ wɔ mekɛ mɔɔ ɛbalumua wɔahɔ ɛkɛ ne la na akee ɛsia ɛkɔ ɛkɛ bieko a, bayɛ foa ne mɔɔ ɛha la. Siezie ɛ nwo na toa debiezukoalɛ ne azo wɔ Baebolo ne Kilehile buluku ne anu.
3 “Mɔɔ Fa Abusua nu Anyelielɛ Ba”: Bɛyɛ edwɛkɛ ɛhye mɔɔ ba siane nsa biala la kɛ bɛfa bɛaboa kunlima, yelɛma nee awovolɛ bɛamaa bɛanwu kɛzi ɔwɔ kɛ bɛfa Baebolo ngyinlazo bɛdi gyima wɔ mekɛ mɔɔ ngyegyelɛ bie ɛlɛsɛkye anzondwolɛ mɔɔ wɔ abusua ne anu la. Eza bɛbahola noko bɛava edwɛkɛ ɛhye mɔ bɛaboa menli mɔɔ bɛnle alasevolɛ la bɛamaa bɛanwu nrɛlɛbɛ mɔɔ wɔ Baebolo ne anu la.—2 Tem. 3:16, 17.
4 Ngakula Ɛdeɛ: Foa ne mɔɔ se “Yɛ Ngakula Ɛdeɛ” ma kengavolɛ ne nyia debie mɔɔ ɔbahola yeava yeayɛ Baebolo edwɛkɛ fɔɔnwo bie anu neɛnleanu a. Ɛbahola wɔava edwɛkɛ ɛhye wɔaboa ngakula mɔɔ ɛ nee bɛ yia wɔ daselɛlilɛ nu la wɔamaa bɛanwu nvasoɛ kpalɛ mɔɔ wɔ zo kɛ bɛkɛzukoa Nyamenle Edwɛkɛ ne la. (Edw. 119:9, 105) Saa ɛ nee awovolɛ ɛlɛtendɛ a, ɛbahola wɔahwe adwenle wɔahɔ “Kilehile Ɛ Mra” foa ne mɔɔ ba siane biala la azo. Edwɛkɛ ɛhye bahola aboa ngakula yeamaa bɛazukoa debie mɔɔ hyia la bɛavi Baebolo ne anu menli ɛkɛ. Asoo wɔyɛ kɛ ɛbagenga foa ɛhye wɔahile ɛ mra ɔ?
5 Ninyɛne Gyɛne: Siane biala, foa ne mɔɔ se “Yɛ Kengavolɛma Biza” la suzu kpuyia mɔɔ menli mɔɔ bɛnle Alasevolɛ kola biza la anwo. Saa ɛlɛfa magazine ne mɔ wɔamaa wɔ sua nu nee sua nu a, ɛbahola wɔahwe adwenle wɔahɔ edwɛkɛ ɛhye azo. Foa ne mɔɔ se “Kɛlata Mɔɔ Vi . . .” la le awie edwɛkɛ mɔɔ bɛha mɔɔ kile ngyegyelɛ mɔɔ edwɛkpatɛlɛvolɛma nee awie mɔ gyinla ɔ nloa wɔ mekɛ mɔɔ bɛlɛyɛ bɛ daselɛlilɛ gyima ne la. Edwɛkɛ ɛhye mɔ kola boa anyelielɛma maa bɛnwu kɛ bɛlɛbɔ edwɛkpa ne nolo wɔ ewiade amuala bɛava bɛahile kɛ Kelaese ɛralɛ ne anwo sɛkɛlɛneɛ ne ɛra nu.—Mat. 24:3, 14.
6 Edwɛkɛ mɔɔ ba siane biala mɔɔ se “Bikye Nyamenle,” mɔɔ gyi Teokelase Ɛzonlenlɛ Sukulu Baebolo ɛgengalɛ ne azo la bahola aha menli mɔɔ lɛ ahonle kpalɛ la yeamaa bɛazukoa Gyihova anwo ninyɛne dɔɔnwo. Bɛyɛ foa ne mɔɔ se “Sukoa Bɛ Diedi” mɔɔ ba fane nna wɔ ɛvolɛ ko anu la kɛ bɛfa bɛaboa menli bɛamaa bɛayɛ Baebolo nu edwɛkɛ nwo nvoninli wɔ bɛ adwenle nu, amaa Baebolo ne anu menli—bɛ kpɔkɛzilɛ, bɛ ngyegyelɛ nee bɛ diedi—aha menli mɔɔ ɛlɛkenga ye ɛnɛ la ahonle.
7 Nea kɛzi yɛ nye die kɛ siane biala yɛ sa ka The Watchtower mɔɔ bɛyɛ kɛ yɛva yɛhɔ daselɛlilɛ la ɛ! Ɔrɛla ye kɛ yɛbanwu nuhua edwɛkɛ ne amuala amaa yɛava yɛali gyima kpalɛ wɔ daselɛlilɛ nu.