Anyelielɛ a Le “Sonla ne Mɔɔ Kɛgyinla Kpundii wɔ Sɔnea Nu”
1 Keleseɛnema kɔsɔɔti yia sɔnea. (2 Tem. 3:12) Sɔnea bahola ayɛ anwodolɛ, ezukoa afoa nu anwongyelelɛ, ninyɛne mɔɔ sua yɛ ɛhane, ɛkpɔlɛ anzɛɛ ninyɛne gyɛne. Seetan sɔ yɛ nea kɛ yɛ sa nu kɛdo, yɛkɛbu yɛ nye yɛkɛgua yɛ Keleseɛne ɛzonlenlɛ gyima ne azo anzɛɛ yɛkɛgyakyi Nyamenle ɛzonlenlɛ. (Dwo. 1:9-11) Kɛzi sɔnea nu ɛgyinlanlɛ maa yɛ nye die ɛ?—2 Pit. 2:9.
2 Siezie Ɛ Nwo Maa Sɔnea: Gyihova ɛva ye nɔhalɛ Edwɛkɛ ne mɔɔ Gyisɛse ɛbɛlabɔlɛ nee ye ngilehilelɛ nwo edwɛkɛ wɔ nu la ɛmaa. Saa yɛtie Gyisɛse edwɛkɛ ne na yɛdi zo a, yɛbanyia adiabo kpalɛ mɔɔ baziezie yɛ amaa sɔnea a. (Luk. 6:47-49) Eza yɛnyia anwosesebɛ yɛfi nziezielɛ gyɛne—yɛ mediema Keleseɛnema, asafo ayia, nee mbuluku mɔɔ gyi Baebolo ne azo mɔɔ akɛlɛ nɔhavo nee nrɛlɛbɛvolɛ eku ne ɛyɛ la anu. Yɛfa asɔneyɛlɛ nwo adenle mɔɔ Nyamenle ɛva ɛmaa la yɛdi gyima dahuu.—Mat. 6:13.
3 Gyihova eza ɛmaa yɛnyia anyelazo. Saa yɛnyia Gyihova nee ye ɛwɔkɛ ne mɔ anu diedi kpole a, yɛ anyelazo ne yɛ kɛ “sɛkɛ maa yɛ ɛkɛla. Ɔgyi pi, na ɔgyi ye kpundii.” (Hib. 6:19) Wɔ Baebolo mekɛ nu, ɛnee saa meli biala tu a ɔfa ye sɛkɛ ne ɔkɔ, bɔbɔ wɔ mekɛ mɔɔ maanle nu le kpalɛ la. Saa ahumu bie tu arɛlevilɛ nu a, bɛto sɛkɛ ne amaa meli ne angɔnzi bolɛ. Zɔhane ala a, Nyamenle ɛwɔkɛ ne mɔ anu diedi mɔɔ yɛbanyia ye ɛnɛ la, bamaa yɛangyinla kpundii wɔ mekɛ mɔɔ yɛkɛyia ngyegyelɛ mɔɔ le kɛ ahumu la a. Sɔnea kola to yɛ arɛlevilɛ nu. Ɔwɔ nuhua kɛ mɔlebɛbo ne Lesetelama diele Pɔɔlo nee Baanabase edwɛkɛ ne ɛdeɛ, noko mekɛ mɔɔ Dwuuma dwazotiama rale la ninyɛne hakyile arɛlevilɛ nu.—Gyi. 14:8-19.
4 Sɔnea nu Ɛgyinlanlɛ Maa Yɛ Nye Die: Saa yɛyia dwazotia na yɛkɔ zo yɛka edwɛkɛ ne a ɔmaa yɛ ahonle tɔ yɛ azule nu. Saa Kelaese ati bɛbɔ yɛ anyiemgba a, yɛdi fɛlɛko. (Gyi. 5:40, 41) Yɛgyinla sɔnea nu a ɔboa ɔmaa yɛsukoa mɛlɛbɛnwoaze, tieyɛ, nee kɛzi bɛgyinla sɔnea nu la kpalɛ. (Mɛla. 8:16; Hib. 5:8; Gye. 1:2, 3) Ɔmaa yɛfa yɛ rɛle yɛwula Gyihova anu, yɛfa yɛ nwo yɛto ye ɛwɔkɛ ne mɔ azo, na yɛnriandi yɛkɔfea ye nu.—Mrɛ. 18:10.
5 Yɛze kɛ sɔnea ɛndɛnla ɛkɛ ɛngyɛ. (2 Kɔl. 4:17, 18) Sɔnea maa yɛnyia adenle yɛkile kɛ yɛkulo Gyihova kpalɛ. Saa yɛgyinla nu a, yɛbahola yɛabua Seetan ɛzonledolɛ ne. Yemɔti, yɛ sa nu ɛndo! “Nyilalɛ ɛha [“Anyelielɛ a le,” NW] sonla ne mɔɔ kɛgyinla kpundii wɔ sɔnea nu la, ɔboalekɛ saa ɔko ɔtɔ zolɛ a ye ahatualɛ a le ngoane.”—Gye. 1:12.