Gyihova Anwumabɔvolɛ Bɔle Hɛzikaya Anwo Bane

Aselea Maanle ne ɛho ɛva Yizilayɛ mbusua bulu belemgbunlililɛ ne. Kɛkala, Aselea Belemgbunli Sɛnakɛlebe kpondɛ kɛ ɔko ɔfa Dwuda mbusua nwiɔ belemgbunlililɛ ne noko. Ɔhonle ɔvale Dwuda azuamgbole ne mɔ ngoko ngoko. Noko sua mɔɔ ɛnee ɔkpondɛ ye kpalɛ la a le Gyɛlusalɛm. Ɛnee Sɛnakɛlebe ɛnze kɛ Gyihova ɛlɛbɔ Gyɛlusalɛm anwo bane.

Dwuda Belemgbunli Hɛzikaya maanle Sɛnakɛlebe ezukoa dɔɔnwo kɛ ɔgyakyi Gyɛlusalɛm. Sɛnakɛlebe liele ezukoa ne, noko ɔzoanle ye sogyama mɔɔ ze konle nye zo la kɛ bɛhɔteta Gyɛlusalɛm. Menli mɔɔ wɔ suakpole ne azo la ahonle dule kpalɛ ɔluakɛ ɛnee Aseleama ɛlɛbikye ɛkɛ. Hɛzikaya hanle hilele bɛ kɛ: ‘Bɛmmasulo. Aseleama anwo yɛ se, noko Gyihova bamaa yɛanyia anwosesebɛ yɛadɛla bɛ.’

Sɛnakɛlebe zoanle Relabehyaki, ye safohyenle kpanyinli ne, wɔ Gyɛlusalɛm kɛ ɔhɔgolo menli ne anwo. Safohyenle kpanyinli ne gyinlanle suakpole ne anwo deanle nu kɛ: ‘Gyihova ɛnrɛhola ɛnrɛboa bɛ. Bɛmmamaa Hɛzikaya bɛlɛbɛla bɛ. Nyamenle biala ɛnrɛhola ɛnrɛlie bɛ ɛnrɛvi yɛ sa nu.’

Hɛzikaya bizale Gyihova mɔɔ ɔwɔ kɛ ɔyɛ la. Gyihova buale kɛ: ‘Bɛmmamaa mɔɔ Safohyenle kpanyinli ne ɛlɛka la maa bɛ ahonle tu. Sɛnakɛlebe asa ɛnrɛha Gyɛlusalɛm.’ Eza Sɛnakɛlebe hɛlɛle Hɛzikaya ngɛlata. Ngɛlata ne anu edwɛkɛ ne se: ‘Bɛva bɛ nwo bɛmaa yɛ. Gyihova ɛnrɛhola ɛnrɛlie bɛ.’ Hɛzikaya yɛle asɔne kɛ: ‘Gyihova, yɛsɛlɛ wɔ, die yɛ, amaa awie biala anwu kɛ ɛ ngomekye a ɛle nɔhalɛ Nyamenle a.’ Gyihova zele ye kɛ: ‘Aselea belemgbunli ne ɛnrɛra Gyɛlusalɛm ɛke. Mebabɔ me suakpole ne anwo bane.’

Ɛnee Sɛnakɛlebe ze kɛ ɔnrɛhyɛ Gyɛlusalɛm bayɛ ye ɛdeɛ. Noko kenle ko nɔɔzo, Gyihova maanle ye anwumabɔvolɛ hɔle Aseleama azokoɛleɛ ne na ɔhunle bɛ sogyama 185,000! Belemgbunli Sɛnakɛlebe sogyama mɔɔ bɛ nwo yɛ se la wule. Yemɔti ɔziale ɔhɔle ye sua zo. Gyihova bɔle Hɛzikaya nee Gyɛlusalɛm anwo bane kɛ mɔɔ ɔhanle la. Saa ɛwɔ Gyɛlusalɛm ɛkɛ ne bie a, asoo anrɛɛ ɛbanyia Gyihova anu anwodozo ɔ?