Dwosaya Hulole Nyamenle Mɛla Ne

Mɔɔ Dwosaya lile ɛvolɛ mɔtwɛ la yɛɛ ɔrayɛle Dwuda belemgbunli a. Mekɛ zɔhane ɛnee menli ne ye ngonyia na bɛsonle awozonle. Mɔɔ Dwosaya lile ɛvolɛ 16 la, ɔzukoale kɛzi ɔbahola yeazonle Gyihova kpalɛ la. Mɔɔ ɔlile ɛvolɛ 20 la, ɔbɔle ɔ bo kɛ ɔsɛkye ananze nee afɔlemokyea kɔsɔɔti mɔɔ wɔ maanle ne anu la. Mɔɔ Dwosaya lile ɛvolɛ 26 la, ɔyɛle ngyehyɛleɛ ɔmaanle bɛyɛle Gyihova ɛzonlenlɛsua ne boɛ.

Ɛsɔfo kpanyinli Helekaya nwunle Gyihova Mɛla buluku ne mɔɔ ɔbayɛ kɛ Mosisi hɛlɛle la wɔ ɛzonlenlɛsua ne anu. Hyeefan mɔɔ ɔle belemgbunli ne kɛlɛhɛlɛvolɛ la vale buluku ne hɔmaanle Dwosaya na ɔgengale ɔhilele ye. Mɔɔ Dwosaya ɛlɛtie la, ɔnwunle kɛ menli ne ɛyɛ Gyihova anwo anzosesebɛ wɔ ɛvolɛ dɔɔnwo anu. Belemgbunli Dwosaya hanle hilele Helekaya kɛ: ‘Gyihova ɛva yɛ nwo ɛya. Bɛ nee ye ɛhɔdendɛ. Gyihova baha mɔɔ ɔwɔ kɛ yɛyɛ la ahile yɛ.’ Gyihova luale ngapezonli raalɛ Hɛleda anwo zo buale edwɛkɛ ne: ‘Menli mɔɔ de Dwuda la ɛkpo me. Mebadea bɛ noko tɛ mekɛ mɔɔ Dwosaya le belemgbunli la ɔ, ɔluakɛ ɔbɛlɛle ɔ nwo aze.’

Mɔɔ Belemgbunli Dwosaya dele edwɛkɛ ne la, ɔhɔyiale Dwudama wɔ ɛzonlenlɛsua ne anu. Akee ɔgengale Gyihova Mɛla ne kpole ɔhilele menli ne amuala. Dwosaya nee menli ne bɔle ɛwɔkɛ kɛ bɛbavi bɛ ahonle muala anu bɛadie Gyihova.

Dwuda maanle ne ɛtɛdile Akpabɛnwo ɛvoyia ne wɔ ɛvolɛ dɔɔnwo anu. Noko mɔɔ Dwosaya gengale ye wɔ Mɛla ne anu kɛ ɔwɔ kɛ bɛdi Akpabɛnwo ne ɛvolɛ biala la, ɔzele maanle ne kɛ: ‘Yɛbali Akpabɛnwo yɛamaa Gyihova.’ Dwosaya bɔle afɔle ngakyile na ɔyɛle ngyehyɛleɛ ɔmaanle edwɛndolɛma dole edwɛne wɔ ɛzonlenlɛsua ne anu. Akee maanle ne lile Akpabɛnwo ne, na eza bɛlile Paano Mɔɔ Mgbɔvonle Ɛnle Nu Ɛvoyia ne kenle nsuu. Ɔvi Samoɛle mekɛ zo, bɛtɛdile Akpabɛnwo Ɛvoyia zɛhae bie ɛlɛ. Dwosaya hulole Nyamenle Mɛla ne kpalɛ. Ɛ nye die nwo kɛ ɛbazukoa Gyihova anwo debie ɔ?