Asoo Amaneɛnwunlɛ Kɔsɔɔti Vi Abɔnsam?

Baebolo ne bua kɛ

Baebolo ne kile kɛ Seetan Abɔnsam le awie mɔɔ wɔ ɛkɛ amgba a. Ɔle kɛ amumuyɛnli anwo ɛzulolɛ bie mɔɔ ɔdua “adalɛ nwanwane ninyɛne” nee ‘adalɛ adenle’ zo ɔdi ye bodane nwo gyima la. Nɔhalɛ nu, Baebolo ne ka kɛ ‘ɔkakyi ɔ nwo ɔyɛ kɛ ɔle wienyi nu soanvolɛ.’ (2 Tɛsalonaekama 2:9, 10; 2 Kɔlentema 11:14) Ninyɛndane mɔɔ Abɔnsam yɛ la maa yɛnwu kɛ ɔwɔ ɛkɛ ne amgba.

Noko tɛ amaneɛnwunlɛ mɔɔ yɛyia la kɔsɔɔti a vi Abɔnsam a? Duzu ati ɔ? Nyamenle bɔle alesama mɔɔ yɛkola yɛkpa kɛ yɛbayɛ mɔɔ le kpalɛ anzɛɛ mɔɔ le ɛtane a. (Dwɔhyua 24:15) Saa yɛanzi kpɔkɛ kpalɛ a, yɛbayia nwolɛ ngyegyelɛ ne.​—Galeehyeama 6:7, 8.