Asoo Nyamenle A Maa Yɛnwu Amaneɛ A?

Baebolo Ne Bua Kɛ

Baebolo ne bua kɛ kyɛkyɛ! Amaneɛnwunlɛ ɛmboka Nyamenle adwenle mɔɔ ɔlɛ ye wɔ alesama anwo la anwo. Noko, mekɛ mɔɔ menli nwiɔ mɔɔ bɛlimoale bɛbɔle bɛ la kpole Nyamenle tumililɛ la bɛhilele kɛ bɛdabɛ a bɛbazi mɔɔ le kpalɛ nee ɛtane la anwo kpɔkɛ a. Bɛandie Nyamenle na ɛhye maanle bɛnwunle amaneɛ.

Bɛ kpɔkɛ ɛtane ne anwo amaneɛ a yɛlɛnwu ye ɛnɛ a. Yemɔti tɛ Nyamenle a vale amaneɛnwunlɛ rale.

Baebolo ne ka kɛ: “Saa awie kɔ ngyegyelɛ nu a ɔmmaka kɛ, ‘Nyamenle ɛlɛsɔ me anlea.’ Ɔluakɛ ɛtane ɛngola ɛnzɔ Nyamenle ɛnnea yɛɛ Nyamenle mumua ne ɛnzɔ awie biala ɛnnea.” (Gyemise 1:13) Awie biala kola nwu amaneɛ​—bɛdabɛ mɔɔ Nyamenle kulo bɛ la bɔbɔ.