Kɛzi Abɔnsam De Ɛ?

Mualɛ mɔɔ Baebolo ne fa maa la

Abɔnsam le sunsum nu abɔdeɛ, ɛhye kile yɛngola yɛnnwu ye.—Ɛfɛsɛsema 6:11, 12.

Abɔnsam anwo nvoninli mɔɔ menli ze ye kpalɛ la a le kɛ ɔlɛ bulalɛ bie mɔɔ agye le nsa la wɔ ɔ sa nu. Ɔle abɔdeɛ mɔɔ zɔho abɔnkye mɔɔ lɛ mɛne nee dualɛ la.

Abɔnsam anwo nvoninli mɔɔ menli ze ye kpalɛ la a le abɔdeɛ mɔɔ zɔho abɔnkye mɔɔ lɛ mɛne, dualɛ na ɔlɛ bulalɛ bie mɔɔ agye le nsa la. Menli bie mɔ die di kɛ menli mɔɔ dolɔ nvoninli mɔɔ dɛnlanle aze wɔ ɛvolɛ mɔɔ bo apenle ko la a dolɔle Abɔnsam anwo nvoninli ɛhye a, na mɔɔ bɛdele ye wɔ nwɔra nu la a bɛgyinlanle zo bɛdolɔle a.

Duzu a Baebolo ne ka ye wɔ Abɔnsam anwo a?

Baebolo ne fa Abɔnsam toto ninyɛne dɔɔnwo anwo. Ɛhye maa yɛnwu ye subane na tɛ debie mɔɔ ɔzɔho ye la. Ninyɛne mɔɔ ɔfa ye ɔtoto nwo la bie mɔ a le:

Wienyi nu anwumabɔvolɛ. Ɔyɛ ɔ nwo kɛ ɔyɛ ninyɛne mgbalɛ yeamaa menli na yealua zo yeamaa bɛalie ye ngilehilelɛ bɛado nu bɛagyakyi Nyamenle ɛdeɛ ne.—2 Kɔlentema 11:14.
Awenade mɔɔ ɛlɛkpo. Ɔteta Nyamenle azonvolɛ atisesebɛ nu.—1 Pita 5:8.
Ɛwɔlɛ kpole. Ɔ nwo yɛ ɛzulolɛ, ɔlɛ tumi yɛɛ ɔsɛkye ninyɛne.—Yekile 12:9.

Baebolo tɛkese ngakyile mɔɔ ka Abɔnsam anwo edwɛkɛ la

2 Kɔlentema 11:14: “Seetan bɔbɔ kɔ zo yɛ ɔ nwo kɛ wienyi nu anwumabɔvolɛ.”

Mɔɔ ɔkile: Seetan yɛ ɔ nwo kɛ ɔle sonla kpalɛ amaa yealua zo yeabɛlɛbɛla menli yeamaa bɛalie ye ngilehilelɛ bɛado nu bɛagyakyi Nyamenle ɛdeɛ ne.
Ɛfɛsɛsema 6:11: “Bɛwula Nyamenle konle ninyɛne ne amuala na bɛahola bɛagyinla kpundii bɛaho bɛatia Abɔnsam agyiba ne mɔ.”

Mɔɔ ɔkile: Abɔnsam dua ndenle ɛtane zo maa menli yɛ Nyamenle anwo anzosesebɛ.
Gyemise 4:7: “Bɛbɛlɛ bɛ nwo aze bɛmaa Nyamenle; bɛzi Abɔnsam adenle, na ɔvi bɛ nwo ɔbanriandi.”

Mɔɔ ɔkile: Saa awie tie Nyamenle na yeandie Abɔnsam a, ɔbahola yeali Seetan anwo zo konim.
1 Pita 5:8: “Bɛ kpɔvolɛ Abɔnsam luolua nu kɛ awenade mɔɔ ɛlɛkpo akpondɛ awie ahye ye ali la.”

Mɔɔ ɔkile: Abɔnsam kpɔ menli mɔɔ tie Nyamenle la na ɔkpondɛ kɛ ɔsɛkye agɔnwolɛvalɛ mɔɔ bɛ nee Nyamenle lɛ la.