Asoo Amagɛdɔn Babɔ Ɔ Bo Wɔ Israel Ɔ?​—Duzu A Baebolo Ne Ka A?

Baebolo ne ka kɛ Amagɛdɔn ɛnle konle mɔɔ bahɔ zo wɔ ɛleka ekyi bie a, emomu ɔle konle mɔɔ arane ne mɔ nee Nyamenle baho wɔ ewiade amuala a.

• “Bɛle edwɛkɛ mɔɔ vi sunsum ɛtane ne mɔ ɛkɛ . . . bɛkɔ arelemgbunli mɔɔ wɔ azɛlɛ ye azo amuala la ɛkɛ ne kɛ bɛkaboɔboa bɛ nloa bɛamaa Nyamenle, Tumivolɛ Bedevinli ne kenle kpole ne anu konle ne. . . . Bɛboɔboale bɛ nloa bɛhɔle ɛleka mɔɔ bɛfɛlɛ ye Hibulu nu Amagɛdɔn la.”​—Yekile 16:14, 16.

Edwɛkɛkpɔkɛ “Amagɛdɔn” vi Hibulu edwɛkɛkpɔkɛ Har Meghid·dohnʹ anu na ɔkile “Mɛgido Boka.” Ɛnee Mɛgido le suakpole wɔ tete Yizilayɛ. Ɔlua ɛhye ati, menli bie mɔ die di kɛ bɛbaho Amagɛdɔn konle ne wɔ Israel. Noko, Mɛgido anzɛɛ azɛlɛ biala ɛnle Middle East mɔɔ le kpole mɔɔ “arelemgbunli mɔɔ wɔ azɛlɛ ye azo amuala” nee bɛ sogyama bahola aho wɔ ɛkɛ a.

Bɛhɛlɛle Yekile buluku ne anu edwɛkɛ ne wɔ “sɛkɛlɛneɛ” adenle zo. (Yekile 1:1) Amagɛdɔn ɛnle ɛleka fɔɔnwo bie, emomu ɔle mekɛ mɔɔ maanle maanle mɔɔ wɔ ewiade amuala la babɔ nu aho atia Nyamenle tumililɛ ne a.​—Yekile 19:11-16, 19-21.