Mɔɔ Nyamenle Belemgbunlililɛ Ne Bayɛ Ye Wɔ Ezukoa Nwo Ngyegyelɛ Nwo La

Menli dɔɔnwo mɔɔ wɔ ewiade la ɛnnyia ezukoa mɔɔ sa bɛ a, na ɔlɛyɛ ngyegyelɛ kpole yeamaa bɛ.

• Neɛnleanu biea mɔɔ bɛyɛ ye kenlensa ye wɔ ewiade amuala la kile kɛ, “ezukoa mɔɔ bɛfa bɛtua menli kakɛ siane biala la azo ɛlɛte kpalɛ.” Bɛbɔle kɔkɔ kɛ saa bɛanyɛ nwolɛ debie a, menli bie mɔ banyia ezukoa adɛla bɛ gɔnwo mɔ” na ɔbamaa “gyimayɛvoma dɔɔnwo nee bɛ mbusua anwo ahyele bɛ wɔ bɛ ɛbɛlabɔlɛ nu.”

Asoo arane ne mɔ bahola ali ezukoa nwo ngyegyelɛ ɛhye anwo gyima kpalɛ ɔ?

Baebolo ne maa yɛnwu kɛ arane bie wɔ ɛkɛ mɔɔ ɔbali ezukoa nwo ngyegyelɛ kɔsɔɔti anwo gyima amaa awie annyia ezukoa andɛla ɔ gɔnwo. Ɔka kɛ “anwuma Nyamenle ne bava belemgbunlililɛ bie azie ɛkɛ,” arane kokye mɔɔ banlea azɛlɛ ye kɔsɔɔti azo la. (Daneɛle 2:44) Wɔ zɔhane arane ne tumililɛ bo, bɛ rɛle ɛnrɛvi awie anzɛɛ bɛnrɛkpo ye. (Edwɛne 9:18) Nyamenle Belemgbunlililɛ ne banlea kɛ ye maanlema banyia mɔɔ bɛhyia nwo la na bɛ nye alie. Menli kɔsɔɔti akunlu badwo bɛ gyima ɛsesebɛ mɔɔ bɛyɛ la anwo.​—Ayezaya 65:21, 22.