Mɔɔ Nyamenle Belemgbunlililɛ Ne Bayɛ Ye Wɔ Ninyɛne Mɔɔ Ɛbɔ Yɛ Ɛyia Mɔɔ Ɛlɛsɛkye La Anwo La

“Maanle nu tɛnlabelɛ mɔɔ ɛlɛsɛkye la ɛyɛ ngyegyelɛ ɛmaa menli, azuamgbole nee abɔdeɛ kɔsɔɔti. Maanle nu tɛnlabelɛ mɔɔ ɛhakyi la ɛmaa ahumu mɔɔ anloa yɛ se la ɛlɛsɛkye menli azua nee bɛ gyima wɔ ewiade amuala. Kɛmɔ nyevile ne ɛlɛdɔ la ati, ɔbahola yeahu abɔdeɛ mɔɔ wɔ nu la anu dɔɔnwo.”​—Inger Andersen, United Nations mgbanyima ne mɔ ko mɔɔ eza ɔnea UN Environment Programme ne azo la, July 25, 2023.

Asoo arane ne mɔ bahola aha bɛ nwo abɔ nu na bɛali ngyegyelɛ ɛhye mɔ mɔɔ ɛlɛsɛkye ewiade ye amuala la anwo gyima ɔ? Asoo bɛbahola baye ngyegyelɛ ɛhye mɔ bɛavi ɛkɛ ɔ?

Baebolo ne ka arane bie mɔɔ bahola ali ninyɛne mɔɔ ɛlɛsɛkye wɔ azɛlɛ ye azo anwo gyima la anwo edwɛkɛ. Ɔka kɛ “anwuma Nyamenle ne bava belemgbunlililɛ bie azie ɛkɛ,” arane bie mɔɔ bali ewiade ye amuala azo tumi na yeayɛ ninyɛne mɔɔ ɛzɛkye wɔ azɛlɛ ye azo boɛ la. (Daneɛle 2:44) Wɔ zɔhane tumililɛ ne abo, “bɛnrɛboda awie anzɛɛ bɛnrɛzɛkye debie” yɛɛ bɛnrɛzɛkye azɛlɛ ne.​—Ayezaya 11:9.