Kpɔkɛdelɛ Nwo Kpanyinli Bie Ɛbɔ Kɔkɔ Kɛ Sohyia Media Bahola Agyegye Ngakula​—Duzu A Baebolo Ne Ka A?

Wɔ May 23, 2023, kpɔkɛdelɛ nwo kpanyinli bie mɔɔ wɔ United States la bɔle maanlema kɔkɔ kɛ sohyia media ɛlɛgyegye ngakula dɔɔnwo.

• “Sohyia media bahola aboa ngakula nee mgbavolɛ nee mbɛlɛra ɛdeɛ, noko daselɛ dɔɔnwo kile kɛ sohyia media bahola amaa ngakula nee mgbavolɛ nee mbɛlɛra anyia adwenle nu ngyegyelɛ.”​—Social Media and Youth Mental Health: The U.S. Surgeon General’s Advisory, 2023.

Bɛhwenle adwenle bɛhɔle neɛnleanu bie mɔɔ kilehile deɛmɔti ɔwɔ kɛ yɛmaa ɛhye yɛ edwɛkɛ mɔɔ hyia yɛ la azo.

• Mgbavolɛ nee mbɛlɛra mɔɔ ɛli ɛvolɛ 12 kɔdwu 15, “mɔɔ fa dɔnehwele mɔɔ bo nsa kɔ sohyia media azo la bahola anyia adwenle nu ngyegyelɛ ndɛndɛ.”

• “Menli mɔɔ ɛli ɛvolɛ 14, “mɔɔ fa sohyia media di gyima dɔɔnwo la ɛngola da kpalɛ, bɛgyegye bɛ wɔ yintanɛte zo, bɛ nye ɛnlie kɛzi bɛde la anwo, bɛbu bɛ nwo kɛ bɛnfɛta na bɛ rɛle bɔ yɛɛ ɛhye ta ka ngakula mraalɛ tɛla ngakula mrenyia.”

Kɛ ɔkɛyɛ na awovolɛ abɔ bɛ mra nwo bane avi esiane ɛhye mɔ anwo ɛ? Baebolo ne fa nwolɛ folɛdulɛ kpalɛ maa.

Mɔɔ awovolɛ bahola ayɛ

Maa ɔvale ɛ nwo. Awovolɛ suzu esiane mɔɔ wɔ nu la anwo, na si kpɔkɛ kɛ ɛbamaa ɛ ra ava sohyia media ali gyima anzɛɛ ɛnrɛyɛ.

• Baebolo ngyinlazo: “Tete kakula wɔ adenle mɔɔ ɔwɔ kɛ ɔfa zo la anu.”​—Mrɛlɛbulɛ 22:6.

• Amaa wɔazukoa dɔɔnwo wɔaboka nwo la, kenga edwɛkɛ “Should My Child Use Social Media?”

Saa ɛmaa ɛ ra fa sohyia media di gyima a, nea esiane mɔɔ wɔ nu la, na nwu mɔɔ ɛ ra ne yɛ ye wɔ yintanɛte zo la. Adenle boni azo?

Bɔ ɛ ra nwo bane fi debie mɔɔ ɛnle kpalɛ la anwo. Tete ɛ ra maa ɔnwu debie mɔɔ ɛnle kpalɛ la na ɔhwe ɔ nwo ɔvi nwo.

• Baebolo ngyinlazo: “Adwɔmane ɛbɛla nee nyɛleɛ evinli biala anzɛɛ anyebolo ɛdeɛ, bɛmmabɔ zo bɔbɔ wɔ bɛ avinli, . . . yɛɛ anyiemgba ɛbɛla anzɛɛ ɛdendɛlɛ ɛtane anzɛɛ ngoayɛ mgbane mgbane.”​—Ɛfɛsɛsema 5:3, 4.

• Amaa wɔanyia nzuzulɛ mɔɔ boa la, kenga edwɛkɛ “Teaching Your Teenager Social Media Safety.”

Fa mɛla to nwo. Kɛ neazo la, di mekɛ mɔɔ ɛ ra bahola ava sohyia media ali gyima nee mekɛ dodo mɔɔ ɔbava yeali gyima la anwo mɛla.

• Baebolo ngyinlazo: ‘Bɛnlea boɛ kpalɛ na kɛzi bɛbɔ bɛ ɛbɛla la ayɛ kɛ nrɛlɛbɛvolɛma la, na bɛva bɛ mekɛ bɛli gyima kpalɛ.’​—Ɛfɛsɛsema 5:15, 16.

• Fa Nvoninli Mɔɔ Bɛdolɔ La Vidio ne Nwu Esiane Mɔɔ Yintanɛte Zo Agɔnwolɛvalɛ Fa Ba La boa ɛ ra maa ɔde ɔ bo kɛ bɛfa mɛla bɛto sohyia media nwo.