Sohyia Media Ɛlɛsɛkye Mgbavolɛ Nee Mbɛlɛra Wɔ Ewiade Amuala

Wɔ 2025 arane mgbanyima dɔɔnwo hanle kɛzi sohyia media ɛlɛsɛkye mgbavolɛ nee mbɛlɛra la anwo edwɛkɛ. Wɔ maanle ko anu, bɛdua ngakula mɔɔ bɛtɛnyianle ɛvolɛ 16 la kɛ bɛmmakɔ sohyia media azo yɛɛ maanle bie mɔ noko ɛlɛdwenle nwo kɛ bɛbayɛ zɔ.

Nɔhalɛ nu, mgbavolɛ nee mbɛlɛra bie mɔ bɔbɔ ɛnwu ye kɛ sohyia media ɛmboa bɛ. Pew Research Center ne mɔɔ wɔ United States la yɛle neɛnleanu bie na bɛvale bɛdole gua wɔ April 2025 kɛ “asɛɛ mgbavolɛ nee mbɛlɛra mɔɔ bɛbizebizale bɛ edwɛkɛ la foa ko hanle kɛ sohyia media mɔɔ bɛfa bɛdi gyima la fa ngyegyelɛ dɔɔnwo ba.”

Dɔketama bie mɔ ɛha kɛ sohyia media ɛnyia mgbavolɛ nee mbɛlɛra dɔɔnwo adwenle ne azo tumi. Ɛkenle ɛvolɛ ne, Dr. Vivek Murthy mɔɔ ɛnee le dɔketa kpanyinli wɔ U.S. la hanle kɛ: “Mgbavolɛ nee mbɛlɛra dɔɔnwo ɛlɛnyia adwenle nu ngyegyelɛ na nuhua dɔɔnwo ne ala vi sohyia media.”

Kɛ ɔkɛyɛ na awovolɛ abɔ bɛ mra nwo bane avi esiane mɔɔ wɔ sohyia media zo la anwo ɛ? Baebolo ne fa folɛdulɛ kpalɛ maa.

Mɔɔ awovolɛ bahola ayɛ la

Suzu Baebolo ngyinlazo ɛhye mɔ anwo.

“[Sonla] mɔɔ anye gyi ɔ ti anwo la dwenle ɔ gyakɛ biala mɔɔ ɔlɛtu la anwo.”—Mrɛlɛbulɛ 14:15.

Kɛmɔ sohyia media bahola azɛkye ɛ ra la ati, mmapele ɛ nwo kɛ ɛmaa yeava yeali gyima. Kolaa na wɔamaa ɛ ra ava sohyia media ali gyima la, nea kɛ ɔbali mekɛ mɔɔ wɔva wɔmaa ye la azo, ɔbava agɔnwolɛma kpalɛ yɛɛ ɔnrɛnlea debie biala mɔɔ ɛnle kpalɛ la.

• Amaa wɔanwu nwolɛ edwɛkɛ dɔɔnwo la, kenga edwɛkɛ “Should My Child Use Social Media?” yɛɛ “Teaching Your Teenager Social Media Safety.”

“Bɛva bɛ mekɛ bɛli gyima kpalɛ.”—Ɛfɛsɛsema 5:16.

Saa ɛmaa ɛ ra ava sohyia media ali gyima a, maa ye nwolɛ mɛla na kilehile deɛmɔti mɛla ne babɔ ɔ nwo bane la anu kile ye. Yɛ subane biala mɔɔ kile kɛ ɛ ra ne subane ɛlɛsɛkye ɔti ɔwɔ kɛ ɔte mekɛ dodo mɔɔ ɔfa ɔkɔ sohyia media zo la nzonlɛ.

• Fa Nwu Esiane Mɔɔ Yintanɛte Zo Agɔnwolɛvalɛ Fa Ba La vidio ne boa ɛ ra maa ɔde deɛmɔti ɔwɔ kɛ ɔnea boɛ wɔ sohyia media zo la abo.

Amaa wɔanwu debie gyɛne mɔɔ awovolɛ bahola ayɛ aboa bɛ mra la, nea edwɛkɛ “Kpɔkɛdelɛ Nwo Kpanyinli Bie Ɛbɔ Kɔkɔ Kɛ Sohyia Media Bahola Agyegye Ngakula​—Duzu A Baebolo Ne Ka A?”

Sukoa dɔɔnwo

Baebolo ne ka kɛ yɛde “mekɛ mɔɔ anu yɛ se la” anu. (2 Timote 3:1-5) Eza ɔmaa yɛ folɛdulɛ kpalɛ mɔɔ boa yɛ maa yɛgyinla ɔ nloa la. Edwɛkɛ mɔɔ bo 20 mɔɔ gyi Baebolo ne azo mɔɔ baboa awovolɛ nee bɛ mra la wɔ “Mgbavolɛ Nee Mbɛlɛra Dɔɔnwo Ɛlɛnyia Adwenle Nu Ngyegyelɛ—Duzu A Baebolo Ne Ka A?” edwɛkɛ ne anu.