Bɛne zo: Hurricane Ian, Florida, USA, September 2022 (Sean Rayford/Getty Images); avinli: Ninli bie nee ɔ ra nrenyia ɛlɛtu, Donetsk, Ukraine, July 2022 (Alex Chan Tsz Yuk/SOPA Images/LightRocket via Getty Images); fema zo: Bɛlɛyɛ menli dɔɔnwo COVID test, Beijing, China, April 2022 (Kevin Frayer/Getty Images)
BƐHƆ ZO BƐZINZA!
2022: Amaneɛnwunlɛ Nee Basabasayɛlɛ Ɛvolɛ—Duzu A Baebolo Ne Ka A?
Wɔ 2022, konle konle, ezukoa nwo ngyegyelɛ nee azɛlɛ ne mɔɔ bɛlɛsɛkye ye la anwo amaneɛbɔlɛ hɔle ɔ nyunlu kpalɛ. Baebolo ne angomekye a maa yɛnwu mɔɔ ninyɛne ɛhye mɔ kile la a.
Ninyɛne mɔɔ sisile wɔ 2022 la kile duzu?
Ninyɛne mɔɔ ɛlɛsisi la maa yɛnwu ye wienyi kɛ yɛde mekɛ mɔɔ Baebolo ne fɛlɛ ye “mekɛ mɔɔ li awieleɛ la” anu. (2 Timote 3:1) Mekɛ ɛhye mɔɔ li awieleɛ la bɔle ɔ bo wɔ 1914. Yɛ kɛzi ninyɛne mɔɔ ɛlɛsisi kenlensa ye la nee mɔɔ Baebolo ne hanle dole ɛkɛ la yia la nzonlɛ:
‘Konle konle.’—Mateyu 24:6.
“2022 A Le Ɛvolɛ Mɔɔ Konle Zɛkyele Ninyɛne Dɔɔnwo Kpalɛ Bieko Wɔ Europe A.”a
Nea edwɛkɛ “Russia Ɛhɔteta Ukraine.”
“Ɛhɔne.”—Mateyu 24:7.
“2022: Ɛvolɛ Mɔɔ Ɛhɔne Mɔɔ Tɛla Biala Rale.”b
Nea edwɛkɛ “Ukraine Konle Ne Ɛva Ɛhɔne Ɛra Ewiade Amuala.”
“Ewulenzane.”—Luku 21:11.
“Polio ziale rale, monkeypox noko vale ngyegyelɛ dɔɔnwo rale yɛɛ COVID-19 noko tɛgyegye menli. Ewule ngakyile ɛhye mɔ yɛ ɛzulolɛ noko alesama ɛngola ɛnyɛ nwolɛ ɛhwee.”c
Nea edwɛkɛ “COVID Ɛhu Menli Mgbe 6.”
“Ninyɛne ɛzulolɛ.”—Luku 21:11.
“Maanle nu mɔɔ yɛ wuluwulu, ezule mɔɔ ɛndɔ, senle yɛɛ azuyilɛ. Maanle nu tɛnlabelɛ mɔɔ hakyile wɔ 2022 wawaa mekɛ nu la zɛkyele ninyɛne, hunle menli dɔɔnwo yɛɛ ɔzɛkyele menli mgbe dɔɔnwo mɔɔ wɔ ewiade amuala la azua bɔkɔɔ.”d
Nea edwɛkɛ “Maanle Nu Mɔɔ Ɛlɛyɛ Wuluwulu Kpole Wɔ Ewiade Amuala.”
“Basabasayɛlɛ.”—Luku 21:9.
“Ezukoa nwo ngyegyelɛ, titili ninyɛne awolɛ mɔɔ ɛyɛ se kpalɛ la ɛmaa menli dɔɔnwo ɛva ɛya, ɔlua ɛhye ati wɔ 2022 ɛvolɛ ye anu menli ɛlɛtendɛ atia arane ngakyile mɔɔ bɛwɔ ɛkɛ la kpalɛ.”e
Nea edwɛkɛ “Ninyɛne Awolɛ Ɛlɛyɛ Se Kpalɛ Wɔ Ewiade Amuala.”
Duzu a bazi wɔ ɛvolɛ bieko a?
Awie biala ɛnze debie fɔɔnwo mɔɔ bazi wɔ ɛvolɛ 2023 a. Mɔɔ yɛze ye la a le kɛ ɔnrɛhyɛ Nyamenle Belemgbunlililɛ ne anzɛɛ ye anwuma arane ne barayɛ nzenzaleɛ dɔɔnwo wɔ azɛlɛ ye azo. (Daneɛle 2:44) Arane ɛhye baye alesama ngyegyelɛ kɔsɔɔti avi ɛkɛ na yeamaa bɛayɛ Nyamenle ɛhulolɛdeɛ wɔ azɛlɛ ye azo.—Mateyu 6:9, 10.
Yɛsɛlɛ wɔ tie Gyisɛse Kelaese folɛdulɛ mɔɔ se “bɛhɔ zo bɛzinza” la na nea kɛzi ninyɛne mɔɔ ɛlɛsisi la nee Baebolo ngapezo yia la. (Maake 13:37) Ɛ nee yɛ ɛli kɛzi Baebolo ne bahola aboa wɔ kɛkala nee kɛzi ɔbamaa ɛdawɔ nee wɔ abusua ne anyia kenle bie anyelazo kpalɛ la anwo adwelie.
a AP News, “2022 Le Ɛvolɛ Mɔɔ Konle Zɛkyele Ninyɛne Dɔɔnwo Kpalɛ Bieko Wɔ Europe A.”—Jill Lawless, December 8, 2022.
b World Food Programme (Ewiade Aleɛ Nwo Gyimalilɛ Ngyehyɛleɛ), “Aleɛ Nwo Ngyegyelɛ Wɔ Ewiade Amuala.”
c JAMA Health Forum, “Yɛde Mekɛ Mɔɔ Ewulenzane Ɛbu Zo La Anu—COVID-19, Monkeypox, Polio, yɛɛ Ewule Ngakyile Dɔɔnwo.”—Lawrence O. Gostin, JD, September 22, 2022.
d Earth.Org, “Duzu A Maanle Maanle Nu Tɛnlabelɛ Ne Hakyile Kpole Wɔ 2022 Wawaa Mekɛ Ne Anu La A?”—Martina Igini, October 24, 2022.
e Carnegie Endowment for International Peace, “Ezukoa Nwo Ngyegyelɛ Nwo Ɛya Maanle Bɛdwazole Bɛtiale Arane Ne Mɔ Wɔ Ewiade Amuala Wɔ 2022.”—Thomas Carothers yɛɛ Benjamin Feldman, December 8, 2022.