Maanle Nu Mɔɔ Ɛlɛyɛ Wuluwulu Kpole Wɔ Ewiade Amuala​—Duzu A Baebolo Ne Ka A?

Wɔ July 2022, bɛbɔle amaneɛ kɛ maanle nu ɛyɛ wuluwulu kpole wɔ ewiade amuala:

• “Bɛbɔle menli kɔkɔ wɔ China kɛ azuamgbole kɛyɛ 70 azo bayɛ wuluwulu kpalɛ wɔ wuluwulu mekɛ mɔɔ tɔ zo nwiɔ la anu wɔ July.”​—July 25, 2022, CNN Wire Service.

• “Senle dɔle kpɔkɛ dɔɔnwo anu wɔ Europe ɔlua wuluwulu ne mɔɔ ɛlɛyɛ kpole la ati.”​—July 17, 2022, The Guardian.

• “Maanle nu yɛle wuluwulu kpole wɔ United States azuamgbole dɔɔnwo azo wɔ Molɛ wɔ mekɛ mɔɔ ewia ne bɔle kpole wɔ East Coast nee South yɛɛ Midwest ɛleka ne mɔ la.”​—July 24, 2022, The New York Times.

Duzu a ɛhye mɔ amuala kile a? Asoo azɛlɛ ye bayɛ ɛleka mɔɔ bɛtɛnla a ɔnyɛ boɛ ɔ? Duzu a Baebolo ne ka a?

Asoo wuluwulu kpole ne le Baebolo ngapezo?

Ɛhɛe. Wuluwulu kpole mɔɔ ɛra ewiade amuala la boka ninyɛne mɔɔ Baebolo ne hanle kɛ ɔbasisi yɛ mekɛ ye azo la anwo. Kɛ neazo la, Gyisɛse hanle kɛ yɛbanwu “ninyɛne ɛzulolɛ” anzɛɛ “ninyɛne mɔɔ tu ahonle la.” (Luku 21:11; Good News Translation) Wuluwulu mɔɔ ɛlɛyɛ kpole wɔ ewiade amuala la maa menli dɔɔnwo sulo kɛ alesama bazɛkye azɛlɛ ye.

Asoo azɛlɛ ye bayɛ mɔɔ bɛtɛnla zo a ɔnyɛ boɛ ɔ?

Kyɛkyɛ. Nyamenle bɔle azɛlɛ ne kɛ alesama ɛdɛnla zolɛ dahuu. (Edwɛne 115:16; Nolobɔvo 1:4) Ɔnrɛmaa alesama ɛnrɛzɛkye azɛlɛ ne, emomu, yebɔ ɛwɔkɛ kɛ “[ɔbazɛkye] bɛdabɛ mɔɔ bɛlɛsɛkye azɛlɛ ne la.”​—Yekile 11:18.

Suzu ngapezo nwiɔ mɔɔ maa yɛnwu debie gyɛne mɔɔ Nyamenle ɛbɔ nwolɛ ɛwɔkɛ la anwo:

• “Fienemgbole nee azɛlɛ resee anye balie, yɛɛ ɛsɛlɛ bali fɛlɛko na zolɛ ayɛ felawɔse ngome.” (Ayezaya 35:1) Nyamenle ɛnrɛmaa azɛlɛ ne ɛnrɛyɛ kɛ ɛsɛlɛ mɔɔ bɛtɛnla zo a ɔnyɛ boɛ la, emomu ɔbayɛ ɛleka mɔɔ ɛzɛkye la boɛ.

• “Ɛnea azɛlɛ ne, ɛmaa ɔso ma dɔɔnwo na ɔkye aleɛ.” (Edwɛne 65:9) Nyamenle bayila azɛlɛ ne yeamaa yeayɛ paladaese.

Amaa wɔazukoa kɛzi maanle nu tɛnlabelɛ mɔɔ ɛlɛkakyi le Baebolo ngapezo anwo ninyɛne dɔɔnwo la, kenga edwɛkɛ “Climate Change and Our Future​—What the Bible Says.”

Amaa wɔazukoa Baebolo ne anu ɛwɔkɛ mɔɔ fale azɛlɛ ne mɔɔ bɛbayɛ ye boɛ la anwo ninyɛne dɔɔnwo la, nea edwɛkɛ “Who Will Save the Earth?”