COVID Ɛhu Menli Mgbe 6​—Duzu A Baebolo Ne Ka A?

Ewiade Amuala Kpɔkɛdelɛ Fane ne (World Health Organization) (WHO), ɛbɔ amaneɛ kɛ ɔkadwu May 23, 2022 la, ɛnee COVID-19 ɛhu menli mgbe 6.27. Noko wɔ WHO amaneɛbɔlɛ mɔɔ bɛvale bɛdole gua wɔ May 5, 2022 la anu, bɛbule mgbonda kɛ menli mɔɔ ɛwu la zonle tɛla zɔ. Ɔhanle ye wɔ nu kɛ wɔ 2020 nee 2021 anu, “bɛdabɛ mɔɔ COVID-19 ewulenzane ne hunle bɛ anzɛɛ ɔlua ewulenzane ne azo bɛwule la . . . dodo bayɛ mgbe 14.9.” Asoo Baebolo ne ka ewulenzane zɛhae mɔɔ ɛmaa yɛ nwo ɛbubu yɛ la anwo edwɛkɛ?

Baebolo ne hanle ewulenzane nwo edwɛkɛ dole ɛkɛ

•  Gyisɛse hanle dole ɛkɛ ne kɛ ewulenzane anzɛɛ “ewule ɛzulolɛ ngakyile” bara wɔ “mekɛ mɔɔ li awieleɛ la anu.”​—Luku 21:11, Contemporary English Version; 2 Timote 3:1.

Gyisɛse ngapezo ne ɛlɛba nu ɛnɛ. Amaa wɔazukoa nwolɛ ninyɛne dɔɔnwo la, kenga edwɛkɛ “Duzu A Bahile Kɛ Yɛwɔ “Awieleɛ Mekɛ” Anzɛɛ ‘Ewiade Awieleɛ Ne’ Anu A?”

Baebolo ne kyekye yɛ rɛle

•  “Arɛlekyekyelɛ muala Nyamenle ne . . . kyekye yɛ rɛle wɔ yɛ sɔnea kɔsɔɔti anu.”​—2 Kɔlentema 1:3, 4.

Edwɛkɛ mɔɔ wɔ Baebolo ne anu la ɛkyekye menli dɔɔnwo mɔɔ bɛ alɔvolɛ ɛwu la arɛle. Sukoa nwolɛ ninyɛne dɔɔnwo wɔ edwɛkɛ “Coping With Grief​—What You Can Do Today“ nee “The Best Help for Those Who Grieve” anu.

Baebolo ne maa yɛnwu kɛ ɔbara awieleɛ bɔkɔɔ

•  “Wɔ Belemgbunlililɛ ɛrɛla. Wɔ ɛhulolɛdeɛ ɛyɛ ɛkɛ wɔ azɛlɛ ye azo kɛ anwuma la.”​—Mateyu 6:10.

Ɔnrɛhyɛ “Nyamenle Belemgbunlililɛ ne” banlea kɛ “maanlema ne anu biala ɛnrɛha kɛ: ‘Me nwo ɛdo me.’” (Maake 1:14, 15; Ayezaya 33:24) Nea Duzu A Le Nyamenle Belemgbunlililɛ Ne? vidio ne amaa wɔanwu anwuma arane ɛhye nee mɔɔ ɔbayɛ la.

Bɔ mɔdenle sukoa mɔɔ Baebolo ne ka la anwo ninyɛne dɔɔnwo amaa ɛ nee wɔ abusua ne anyia folɛdulɛ kpalɛ nee ɛwɔkɛ ngɛnlɛma mɔɔ wɔ nu la azo nvasoɛ.