Maanyɛlɛma Bɔ Kɔkɔ Kɛ Ɔnrɛhyɛ Na Amagɛdɔn Ara​—Duzu A Baebolo Ne Ka A?

Wɔ Kenlenzile nwonlomɔ, October 10, 2022, Russiama totole bɔmbo wɔ Ukraine azuamgbole bie mɔ azo kɛ bɛfa bɛali bɛ nzenralɛ wɔ belegye titili bie mɔɔ la Russia nee Crimea avinli mɔɔ bɛzɛkyele ye kenle nwiɔ mɔɔ ɛpɛ nu la anwo. Mɔɔ maanyɛlɛma bie mɔ hanle kɛ ɔnrɛhyɛ na Amagɛdɔn ara la yeangyɛ biala yɛɛ edwɛkɛ ɛhye zile a.

• “Ɔbɔ ye [U.S. Maanle Kpanyinli John F.] Kennedy mekɛ zo mɔɔ anrɛɛ bɛfa nukelea akodeɛ bɛali gyima wɔ mɔɔ bɛfɛlɛ ye Cuban Missile Crisis ne anu la, ewiade ne ɛtɛbikyele Amagɛdɔn zɛhae bieko ɛlɛ. . . . Menlie menli kɛ awie bahola ava nukelea akodeɛ ali gyima zɛhae mɔɔ ɔnrɛva Amagɛdɔn ɔnrɛra a.”​—U.S. Maanle Kpanyinli Joe Biden, October 6, 2022.

• Mɔɔ bɛbizale Ukraine Maanle Kpanyinli Volodymyr Zelensky mɔɔ bahola avi nukelea akodeɛ mɔɔ bɛbava bɛali gyima anu ara la, ɔhanle kɛ: “Medie medi kɛ ɔnrɛhyɛ na Amagɛdɔn ara. Ɔle esiane ɔmaa ewiade amuala.”​—BBC News, October 8, 2022.

Asoo nukelea akodeɛ mɔɔ bɛbava bɛali gyima la bahola ava Amagɛdɔn ara ɔ? Duzu a Baebolo ne ka a?

Asoo nukelea akodeɛ bava Amagɛdɔn ara ɔ?

Kyɛkyɛ. Edwɛkɛkpɔkɛ “Amagɛdɔn” finde Baebolo ne anu kokye ala wɔ Yekile 16:16. Baebolo ne maa ɔda ali kɛ ɔle konle mɔɔ bahɔ zo wɔ Nyamenle nee “arelemgbunli mɔɔ wɔ azɛlɛ ye azo amuala la” avinli a na tɛ konle mɔɔ bahɔ zo wɔ maanle maanle avinli la ɔ. (Yekile 16:14) Nyamenle balua Amagɛdɔn konle ne azo ava alesama tumililɛ ara awieleɛ.​—Daneɛle 2:44.

Saa ɛkulo kɛ ɛnwu mɔɔ Amagɛdɔn bava ara alesama anwo zo la a, kenga edwɛkɛ mɔɔ se Duzu A Le Amagɛdɔn Konle Ne?

Asoo nukelea konle bazɛkye azɛlɛ ne nee menli mɔɔ de zo la ɔ?

Kyɛkyɛ. Ɔwɔ nu kɛ alesama tumivolɛma bahola ava nukelea akodeɛ ali gyima kenle bie ɛdeɛ, noko Nyamenle ɛnrɛmaa bɛnrɛva bɛnrɛzɛkye azɛlɛ ne. Baebolo ne ka kɛ:

• “Azɛlɛ ne wɔ ɛkɛ ne dahuu.”​—Nolobɔvo 1:4.

• “Tenlenema banyia azɛlɛ ne, na bɛadɛnla zolɛ dahuu.”​—Edwɛne 37:29.

Noko akee, Baebolo ngapezo nee ninyɛne mɔɔ ɛlɛsisi kenle nsa ye la maa ɔda ali kɛ ɔnrɛhyɛ nzenzaleɛ kpole bara. (Mateyu 24:3-7; 2 Timote 3:1-5) Dua yɛ Baebolo ɛzukoalɛ mɔɔ bɛnlie ɛhwee la azo sukoa mɔɔ Baebolo ne ka ye wɔ kenle bie nwo la anwo debie.