Nwane A Ɛbakpa Ye Kɛ Wɔ Adekilevolɛ A?​—Duzu A Baebolo Ne Ka A?

Menli ɛlɛsuzu adekilevolɛ mɔɔ bɛbakpa ye la anwo kpalɛ, amaa bɛazi kpɔkɛ kpalɛ.

Duzu a Baebolo ne ka a?

Alesama mɔɔ di menli nwo zo tumi la ɛnli munli

Baebolo ne ka kɛ alesama mɔɔ ɛlɛdi menli nwo zo tumi la amuala ɛnli munli.

• “Mmafa ɛ nwo ɛto mgbanyima anzɛɛ sonla dasanli mɔɔ ɛngola ɛmmaa ngoane la anwo zo. Ye ɛnwomenle ne fi ye nu a, ɔsia ɔkɔ ndɛtɛlɛ nu; kenle ko ne ala ye nzuzulɛ kɔsɔɔti minli.”​—Edwɛne 146:3, 4, ɔbodwɛkɛ.

Mgbanyima mɔɔ bɔ mɔdenle kpalɛ bɔbɔ la bawu kenle bie. Eza debie biala ɛngile kɛ menli mɔɔ bara nzinlii la badoa gyima kpalɛ mɔɔ bɛyɛle la azo.​—Nolobɔvo 2:18, 19.

Baebolo ne kile kɛ ɔnle kɛ sonla di ɔ gɔnwo sonla nwo zo tumi.

• “Ɔnle sonla mɔɔ ɛlɛtia la ɛdeɛ kɛ ɔbahile ɔ gyakɛ mɔɔ ɔtu bɔbɔ la adenle.”​—Gyɛlɛmaya 10:23.

Nwane a bahola ayɛ adekilevolɛ kpalɛ amaa yɛ ɛnɛ a?

Adekilevolɛ mɔɔ Nyamenle die ye to nu

Baebolo ne ka kɛ Nyamenle ɛkpa adekilevolɛ kpalɛ mɔɔ yɛbahola yɛava yɛ nwo yɛado ɔ nwo zo: Gyisɛse Kelaese. (Edwɛne 2:6) Gyisɛse le Nyamenle Belemgbunlililɛ ne mɔɔ ɔle arane mɔɔ ɔbali tumi yeavi anwuma la azo Belemgbunli.​—Mateyu 6:10.

Asoo ɛbalie Gyisɛse wɔado nu kɛ wɔ adekilevolɛ ɔ? Baebolo ne maa yɛnwu kɛ kpuya ɛhye anwo hyia kpalɛ:

• “Bɛli ralɛ ne [Gyisɛse Kelaese] eni, anrɛɛ Nyamenle bava ɛya na yeazɛkye bɛ yeavi adenle ne azo, ɔluakɛ Ye ɛya ne sɔ ndɛndɛ. Anyelielɛ a le bɛdabɛ kɔsɔɔti mɔɔ bɛnriandi bɛkɔfea Ye nu la.”​—Edwɛne 2:12.

Ɛnɛ a le mekɛ mɔɔ ɔwɔ kɛ ɛsi kpɔkɛ a. Baebolo ngapezo kile kɛ Gyisɛse bɔle ye tumililɛ bo wɔ 1914 na ɔnrɛhyɛ Nyamenle Belemgbunlililɛ ne bagyinla alesama arane kɔsɔɔti agyakɛ anu.​—Daneɛle 2:44.

Kenga edwɛkɛ mɔɔ se “Kpa Kɛ Ɛbagyinla Nyamenle Belemgbunlililɛ Ne Anzi Ɛnɛ!” la na sukoa kɛzi ɛbahile kɛ ɛgyi Adekilevolɛ Gyisɛse anzi la anwo debie.