Kɛzi Daselɛlilɛ Ekpunli Ngyehyɛleɛ Ne Boa Yɛ La

1-2. Kɛzi mediema dɔɔnwo bu daselɛlilɛ ekpunli ngyehyɛleɛ ne ɛ?

ƐKAKYE kenle mɔɔ bɛmaanle wɔ adenle kɛ ɛhɔ daselɛlilɛ la ɔ? Kenle zɔhane ɛ nye liele ɔluakɛ ɛrabokale azonvolɛ ekpunli kpole bie mɔɔ bɛye Gyihova duma ne ayɛlɛ la anwo. (Edw. 148:​1, 2, 12, 13) Noko kenle ko zɔhane, eza ɛrabokale daselɛlilɛ ekpunli ekyi bie mɔɔ ɛ mediema diedima ekyi bie a wɔ nu la anwo. Daselɛlilɛ ekpunli ne mɔ boa yɛ titili maa yɛyɛ gyima mɔɔ bɛva bɛmaa yɛ kɛ yɛbɔ Belemgbunlililɛ ne anwo edwɛkpa ne nolo wɔ “azɛlɛ ye azo amuala” la.—Mat. 24:14.

² Kɛzi ɛbu daselɛlilɛ ekpunli ngyehyɛleɛ ne ɛ? Adiema raalɛ bie mɔɔ bɛfɛlɛ ye Wendya la hanle kɛ: “Ngyehyɛleɛ ɛhye ɛboa me kpalɛ wɔ kɛzi medi daselɛ la anu. Mezukoa ndenle fofolɛ mɔɔ bɛdua zo bɛdi daselɛ na bɛkilehile awie mɔ la mevi mediema gyɛne ɛkɛ. Eza bɛboale me bɛmaanle menvale sunsum nu bodane menziele me nye zo na mendwule nwo yɛɛ yemaa menyia agɔnwolɛma kpalɛ.” Adiema bie mɔɔ bɛfɛlɛ ye Rich la noko hanle kɛ: “Ɔle nwolɛ adenle kɛnlɛma kɛ ɛbayɛ ekpunli zo neavolɛ. Nolobɔlɛma bie mɔ boa awie maa ɔfɛta kɛ bɛbazɔne ye, noko ekpunli zo neavolɛ lɛ nwolɛ adenle dɔɔnwo kɛ ɔbaboa ahenle zɔhane yeamaa yeanyia anyuhɔlɛ wɔ sunsum nu wɔ ɛvolɛ dɔɔnwo anu.” Adiema raalɛ Dinah hanle kɛ: “Ɔyɛ me fɛ kɛ mewɔ daselɛlilɛ ekpunli bie anu la. Mebu mediema mɔɔ wɔ me ekpunli ne anu la kɛ me mbusuafoɔ.”

3. Duzu a yɛbazuzu nwo wɔ edwɛkɛ ɛhye anu a?

³ Wɔ edwɛkɛ ɛhye anu, yɛbalimoa yɛazuzu gyima mɔɔ ekpunli zo neavolɛ nee ye boavolɛ yɛ la anwo, na yɛanlea kɛzi bɛboa mediema mɔɔ wɔ bɛ ekpunli ne anu la. Mɔɔ tɔ zo nwiɔ, yɛbazuzu kɛzi yɛdayɛ mumua ne yɛbaboa yɛ ekpunli ne yɛamaa yeagyinla la anwo. Mɔɔ tɔ zo nsa, yɛbanwu kɛzi ngyehyɛleɛ kɛnlɛma ɛhye boa yɛ la.

EKPUNLI ZO NEAVOLƐ NEE YE BOAVOLƐ

4. (a) Ekpunli zo neavolɛ gyima titili a le boni? (b) Kɛzi ekpunli zo neavolɛ ne boa ye ekpunli ne anu amra ɛ? (Nea ɛlɛka, “Nzuzulɛ Mɔɔ Baboa Ekpunli Zo Neavolɛ.”)

⁴ Ekpunli zo neavolɛ le asafo nu kpanyinlib mɔɔ mgbanyima eku ne ɛkpa ye kɛ ɔboa nolobɔlɛma ekpunli bie ɔmaa bɛnyia anyuhɔlɛ wɔ sunsum nu la. Kɛzi ɔyɛ ye gyima ne ɛ? Mɔɔ limoa, ɔmaa ɔ nye kɔ ekpunli ne anu amra anu ko biala anwo. (Mrɛ. 27:23) Kɛmɔ ɔ nye la ɛkɛ na ɔdwenle mediema ne mɔ anwo la ati, ɔta ɔ nee bɛ bɔ adawu. Yemɔ boa ye maa ɔmaa bɛ anwosesebɛ, ɔkyekye bɛ rɛle na ɔfa moalɛ mɔɔ bɛhyia la ɔmaa bɛ. (Mrɛ. 12:25; Aye. 32:2; Gye. 2:​15-17) Mɔɔ tɔ zo nwiɔ, ɔboa nolobɔlɛnli ko biala ɔmaa ɔta ɔkɔ daselɛlilɛ. Ɔfa anyelielɛ ɔdi daselɛlilɛ gyima ne anyunlu, titili wɔ Folɛ nee Molɛ. Eza ɔta ɔ nee nolobɔlɛnli ko biala kɔ daselɛlilɛ amaa yeamaa ye anwosesebɛ na yeatete ye wɔ edwɛkɛhanlɛ gyima ne anu. Saa ɔnrɛhola ɔnrɛhɔ daselɛlilɛ a, ɔyɛ ngyehyɛleɛ ɔmaa ye boavolɛ ne anzɛɛ nolobɔlɛnli gyɛne mɔɔ fɛta la nea zo. Mɔɔ tɔ zo nsa, ɔboa mediema mrenyia mɔɔ bɛzɔne bɛ la ɔmaa bɛfɛta kɛ bɛbayɛ gyima dɔɔnwo bɛaboa asafo ne. (1 Tim. 3:1) Ɔfi ye ahonle nu ɔkanvo mediema mrenyia, ɔtu bɛ folɛ na ɔtete bɛ ɔmaa bɛfɛta kɛ asafo nu azonvolɛ nee mgbanyima. Kɛmɔ bɛ gyima ne hyia la ati, mgbanyima eku ne nea kɛ bɛbakpa mgbanyima mɔɔ bɛbahola bɛayɛ gyima ɛhye kpalɛ la.

5. Ngyegyelɛ boni mɔ a ekpunli zo neavolɛ bie mɔ yia a?

⁵ Ekpunli zo neavolɛ yia ngyegyelɛ dɔɔnwo. Maa yɛva Jörg mɔɔ le ekpunli zo neavolɛ wɔ Germany la kɛ neazo. Ɔlɛ gyimalilɛ dɔɔnwo wɔ asafo ne anu kɛ asafo nu mgbanyima gyɛne la. Ɔhanle kɛ: “Kɛ ɔkɛyɛ na meahola meayɛ gyimalilɛ ngakyile mɔɔ melɛ wɔ asafo ne anu la ɛnla aze. Ɛhye ati ɔmmaa mengola mendwu bodane mɔɔ meva mezie me nye zo kɛ me nee awie biala mɔɔ wɔ me ekpunli ne anu la bali adwelie la anwo.” Abel, asafo nu kpanyinli bie mɔɔ ɛli ɛvolɛ 70 mɔɔ wɔ Uganda la hanle kɛ: “Yɛnlɛ asafo nu mgbanyima nee azonvolɛ dɔɔnwo wɔ yɛ asafo ne anu. Ɔti menli mɔɔ wɔ daselɛlilɛ ekpunli ne mɔ anu la anwo zonle. Ɛhye ati kɛzi mekulo kɛ mekpɔla me ekpunli ne anu amra ko biala la, mengola menyɛ ye zɔ.” Yɛɛ Obed mɔɔ vi Suriname la hanle kɛ: “Me nye die nwo kɛ mebatete awie mɔ. Noko ndetelɛ die mekɛ nee anwosesebɛ yɛɛ ɛnnwu nvasoɛ mɔɔ wɔ zo la ɛkɛ ne ala. Na kɛmɔ menlɛ alagye la ati, menda mentete awie mɔ.” Duzu a bahola aboa asafo nu mgbanyima mɔɔ ɛlɛyia ngyegyelɛ ko ne ala bie nee ngyegyelɛ gyɛne la ɛ?

6. Duzu ati a ekpunli ne anu amra anwo anzo a ɔboa ekpunli zo neavolɛ ne ɛ?

⁶ Saa ɔbayɛ boɛ a, ɔwɔ kɛ ekpunli ne anu amra anwo yɛ ekyi amaa ekpunli zo neavolɛ ne anwu bɛ nuhua ko biala kpalɛ na yeaboa bɛ yeamaa bɛ nwo ayɛ se wɔ sunsum nu. Na saa mgbanyima mɔɔ wɔ asafo ne anu la anwo anzo ɛ? Ɔnle kɛ bɛmaa ekpunli ne anu amra anwo so mɔɔ ekpunli zo neavolɛ ne ɛngola ɛnyɛ ye gyima ne amuala a. Emomu mgbanyima eku ne bahola amaa asafo nu sonvolɛ anlea ekpunli bie azo kɔkpula kɛ bɛbanyia asafo nu kpanyinli anlea zo la. Saa bɛ nwo anzo a, ɔbamaa ekpunli zo neavolɛma ne ahola aboa bɛ mediema ne mɔ bɛamaa bɛabikye Gyihova kpalɛ, na ɛhye a le bɛ gyima ne foa mɔɔ hyia kpalɛ a.

7. Saa mgbanyima ne mɔ anwo anzo a, duzu a ekpunli zo neavolɛma bahola ayɛ aboa ye ekpunli ne anu amra a? (1 Pita 5:2) (Eza nea nvoninli ne.)

⁷ Saa ɛle ekpunli zo neavolɛ wɔ asafo mɔɔ mgbanyima ne mɔ anzo la anu a, bɔ mɔdenle kɛ ɛbatete wɔ boavolɛ ne amaa yeaboa yeamaa bɛanlea Nyamenle mboane ne. (Kenga 1 Pita 5:2.) Fa gyimalilɛ bie mɔ wula wɔ boavolɛ ne asa. Kɛ neazo la, ɔyɛ a maa ɔnlea daselɛlilɛ ayia ne azo. Eza ɔhyia kɛ bɛsuzu kɛzi bɛbahola bɛaboa nolobɔlɛnli ko biala bɛamaa yeanyia anyuhɔlɛ wɔ daselɛlilɛ nu na yeabikye Gyihova la anwo. Ɛ nee wɔ boavolɛ ne ɛda ɛhɔkpɔla mediema na bɛmaa bɛ anwosesebɛ. Kolaa na bɛahɔ la, ɛ nee ye ɛzuzu mɔɔ bɛkɔ a bɛbaha la anwo yɛɛ saa bɛwie a, ka mɔɔ ɔbɔle nwolɛ mɔdenle nee mɔɔ ɔhyia kɛ ɔdi nwolɛ gyima la kile ye. Nzinlii wɔ boavolɛ ne noko bahola afɛta kɛ ekpunli zo neavolɛ. (2 Tim. 2:2) Eza ɛbahola wɔamaa wɔ ekpunli ne anu amra gyɛne aboa wɔ bɛamaa bɛatete nolobɔlɛma mɔɔ wɔ ekpunli ne anu la. Kɛ neazo la, adekpakyelɛma nee nolobɔlɛma mɔɔ bɔ mɔdenle la kola nee nolobɔlɛma mɔɔ bɛle fofolɛ la kɔ daselɛlilɛ. Eza nolobɔlɛma mɔɔ bɛbɔ mɔdenle la bahola aboa mediema mɔɔ bɛhyia moalɛ la bɛamaa bɛanwu kɛzi bɛbɔ adawubɔlɛ bo wɔ daselɛlilɛ nu, kɛzi bɛyɛ sia kɔkpɔla anzɛɛ bɛyɛ Baebolo ɛzukoalɛ la. Akee maa yɛzuzu ninyɛne nsa mɔɔ yɛbahola yɛayɛ amaa yɛ daselɛlilɛ ekpunli ne agyinla la anwo.

BOA MAA WƆ DASELƐLILƐ EKPUNLI NE ƐGYINLA

8. Duzu a yɛyɛ a ɔbamaa yɛ ekpunli ne agyinla a? (Wulomuma 1:12)

⁸ Kɔ daselɛlilɛ ayia ne bie. Saa yɛ nee awie mɔ bɔ nu kɔ daselɛlilɛ a, ɔmaa yɛmaa yɛ nwo anwosesebɛ ngoko. (Kenga Wulomuma 1:12.) Eza saa yɛ nee yɛ ekpunli ne bɔ nu kɔ daselɛlilɛ a, ɔmaa bɛnyia anwobanebɔlɛ na bɛnyia anwodozo kpole bɛdi menli dɔɔnwo daselɛ. Saa wɔ gyima ɛmmaa ɛngola ɛ nee wɔ ekpunli ne ɛmbɔ nu ɛngɔ daselɛlilɛ a, ɛbahola wɔazɛlɛ wɔ gyimamenle ne saa ɔbahola yeayɛ nzenzaleɛ wɔ mekɛ mɔɔ ɛfa ɛkɔ gyima la anu a. Bie a ɔbade ɔ bo yeamaa wɔahɔ daselɛlilɛ na wɔayɛ wɔ gyima ne mekɛ fofolɛ. (Nih. 2:​4-6) Saa ɛnde kpɔkɛ kpalɛ anzɛɛ ɛlɛyɛ kpanyinli la ati ɛngola ɛngɔ daselɛlilɛ ayia a, ka nwolɛ edwɛkɛ kile wɔ ekpunli zo neavolɛ ne. Ɔbahola yeayɛ ngyehyɛleɛ yeamaa wɔalua videoconference zo wɔadie daselɛlilɛ ayia ne bie na bɛwie a yeamaa ekpunli ne anu amra bie nee wɔ alua fonu anzɛɛ kɛlata ɛhɛlɛlɛ zo ali daselɛ. Ɛle kpavolɛ anzɛɛ bɛlɛra mɔɔ ɛte kpɔkɛ noko ɔyɛ se ɔmaa wɔ kɛ ɛbada wɔahɔ daselɛlilɛ ɔ? Saa ɔle zɔ a, ɛ nee wɔ ekpunli ne anu amra bie mɔ ɛyɛ ngyehyɛleɛ na bɛhɔ daselɛlilɛ dapɛne biala. Bie a ɔwɔ kɛ ɛsia ɛsuzu ninyɛne mɔɔ kɛkala hyia wɔ kpalɛ la anwo anzɛɛ ɛnea kɛzi ɛfa wɔ mekɛ ɛdi gyima la. (Wlo. 12:11; Kɔl. 4:5) Saa ɛyɛ ye zɔ a, ɔbamaa wɔahola wɔaboa wɔ ekpunli ne anu amra. Yemɔti yɛ asɔne sɛlɛ Gyihova kɛ ‘ɔmaa ɛnyia ɛhulolɛ ne yɛɛ anwosesebɛ ne na wɔahola wɔayɛ.’—Fel. 2:13.

9. Duzu a yɛbahola yɛayɛ yɛamaa anyelielɛ nee ɛlɔlɛ adɛnla yɛ daselɛlilɛ ekpunli ne anu a? (Wulomuma 12:13)

⁹ Die bɛ kɛnlɛma. Saa ‘yɛdie nyɛvolɛ dahuu’ a, yɛbaboa yɛamaa anyelielɛ nee ɛlɔlɛ adɛnla yɛ daselɛlilɛ ekpunli ne anu. (Kenga Wulomuma 12:13.) Kɛ neazo la, yɛbahola yɛamaa yɛ ekpunli ne arayɛ daselɛlilɛ ayia wɔ yɛ sua nu. Wɔ asafo bie mɔ anu, bɛyɛ ngyehyɛleɛ mɔɔ saa awie vi asafo fofolɛ nu bamaa ɛdendɛlɛ a, bɛmaa ekpunli ko die ye ɛyɛvolɛ. Saa ɔdwu ekpunli bie mɔ anwo zo kɛ bɛdie tendɛvolɛ ne ɛyɛvolɛ a, ekpunli ne bɔ nu di aleɛ na bɛmaa bɛ nwo anwosesebɛ saa bɔbɔ tendɛvolɛ ne angola amba amboka bɛ nwo a. Adekpakyelɛ titilinli bie mɔɔ bɛfɛlɛ ye Sarah la hanle kɛ: “Saa melɛdie awie ɛyɛvolɛ a, me ahonle tu ekyi. Ɔti amaa me ahonle andu la menyɛ ninyɛne mgbole. Kɛzi mebanwu ahenle ne kpalɛ la a medwenle nwo a na tɛ aleɛ kpole mɔɔ mebado la ɔ.” Saa yɛbɔ mɔdenle yɛmaa ɛlɔlɛ ba yɛ ekpunli ne anu na yɛyɛ kɛ abusua a, ɔmaa yɛbikye Gyihova nee yɛ nwo ngoko.—Nih. 8:10; Gyi. 20:35.

10. Saa yɛkulo kɛ yɛnyia anyuhɔlɛ wɔ daselɛlilɛ gyima ne afoa bie anu a, duzu a ɔwɔ kɛ yɛyɛ a? (Mrɛlɛbulɛ 1:5; 27:17) (Eza nea nvoninli ne.)

¹⁰ Dimoa tudu nwolɛ agyakɛ. Saa yɛze edwɛkɛhanlɛ nee ngilehilelɛ gyima ne anye zo kpalɛ a, ɔmaa yɛ nye die nwo kɛ yɛ nee yɛ ekpunli ne babɔ nu ahɔ daselɛlilɛ. Asoo daselɛlilɛ gyima ne afoa bie wɔ ɛkɛ mɔɔ ɛkulo kɛ ɛnyia anyuhɔlɛ wɔ nu ɔ? Ɛbahola wɔalimoa wɔadudu nwolɛ agyakɛ wɔaha wɔahile adekpakyelɛnli anzɛɛ nolobɔlɛnli bie mɔɔ bɔ mɔdenle mɔɔ wɔ wɔ ekpunli ne anu la wɔamaa yeaboa wɔ. (Kenga Mrɛlɛbulɛ 1:5; 27:17.) Zɔhane a adiema raalɛ bie mɔɔ bɛfɛlɛ ye Heather mɔɔ se nyiane la yɛle a. Ɔhanle kɛ: “Menganle mengilele adekpakyelɛnli bie kɛ ɔboa me ɔmaa menwu kɛzi bɛyɛ sia kɔkpɔla kpalɛ la. Ɛnee ɔkulo menli yɛɛ ɔ ti akunlu le kɛnlɛma na ɛnee ɔta ɔ nee me kɔ daselɛlilɛ. Ɔboale me bɔbɔ ɔmaanle me nee menli mɔɔ yɛhɔkpɔlale bɛ la anu ko bɔle Baebolo ɛzukoalɛ bo. Ɔyɛ me fɛ kɛ memaanle ɔboale me la ɔluakɛ kɛkala me nye die nwo kɛ mebahɔ daselɛlilɛ.” Eza ɛbahola wɔaha debie mɔɔ ɛkulo kɛ ɛnyia anyuhɔlɛ wɔ nu la wɔahile wɔ ekpunli zo neavolɛ ne, na bie a ɔbahola yeaboa wɔ wɔ nwolɛ. Ɔda ali wienyi kɛ, yɛbahola yɛalua ndenle dɔɔnwo azo yɛaboa yɛ daselɛlilɛ ekpunli ne yɛamaa yeagyinla.

KƐZI WƆ DASELƐLILƐ EKPUNLI NE BOA WƆ LA

11-12. Kɛzi daselɛlilɛ ekpunli ngyehyɛleɛ ne bahola aboa wɔ yeamaa wɔabikye Gyihova ɛ? Maa neazo.

¹¹ Ɔmaa yɛbikye Gyihova. Daselɛlilɛ ekpunli ngyehyɛleɛ ne bahola aboa yɛ nuhua ko biala yeamaa yeabikye Gyihova kpalɛ. Kɛ neazo la, ekpunli zo neavolɛ ne kpɔla bɛdabɛ mɔɔ bɛla Gyihova ahonle nwo la na ɔmaa bɛ anwosesebɛ wɔ mekɛ kpalɛ nu. Menli ɛhye mɔ bie a le ahunlanvolɛ, nrisa yɛɛ mrelera. (1 Tɛs. 2:8; Gye. 1:27) Eza bɛtete yɛ bɛmaa yɛnwu kɛzi yɛbayɛ Belemgbunlililɛ ne anwo edwɛkpahanlɛ nee ngilehilelɛ gyima ne afoa ngakyile ne mɔ kpalɛ la. Bieko, bɛboa mediema mrenyia mɔɔ bɛzɔne bɛ mɔɔ bɛyɛ neazo kpalɛ la bɛmaa bɛfɛta kɛ bɛbayɛ gyima dɔɔnwo wɔ asafo ne anu.—1 Tim. 3:10.

¹² Nea kɛzi daselɛlilɛ ekpunli ngyehyɛleɛ ne boale Wendy mɔɔ yɛlimoa yɛha ɔ nwo edwɛkɛ la. Ɔhanle kɛ: “Kɛmɔ ɛnee me papa anye ɛnlie nɔhalɛ ne anwo la ati, tɛ dahuu a me mame holale nee ye ekpunli ne bɔle nu hɔle daselɛlilɛ wɔ Folɛ nee Molɛ a. Noko ɛnee ɔmaa me adenle ɔmaa mekɔ. Adiema raalɛ kpanyinli bie mɔɔ le adekpakyelɛnli la vale me kɛ ɔ ra na ɔmaanle menyianle anyuhɔlɛ mɔɔ ɛboa me wɔ daselɛlilɛ nu nee asafo ne anu a. Eza mekakye kɛ me ekpunli zo neavolɛ ne vale Baebolo ne dule me folɛ fane dɔɔnwo, na yeboa me too badwu ɛnɛ.”

13. Kɛzi daselɛlilɛ ekpunli ne maa yɛnyia agɔnwolɛma mɔɔ bɛkile kɛ bɛkulo yɛ la ɛ? (Eza nea nvoninli ne.)

¹³ Yɛnyia agɔnwolɛma mɔɔ bɛkile kɛ bɛkulo yɛ. Kɛmɔ yɛ nee yɛ ekpunli ne anu amra bɔ nu kɔ daselɛlilɛ la ati, ɔmaa yɛfa bɛ agɔnwolɛ kyengye. (Fel. 1:27) Eza kɛmɔ menli mɔɔ wɔ ekpunli ne anu la anwo anzo la ati, ɔmmaa ɔnyɛ se kɛ bɛdabɛ mɔɔ bɛse nyiane anzɛɛ bɛwɔ menli nu a bɛ ahonle tu la banyia agɔnwolɛ. (2 Kɔl. 6:13) Yɛbahola yɛava yɛ nwo yɛado agɔnwolɛma ɛhye mɔ anwo zo kɛ bɛbaboa yɛ wɔ ngyegyelɛ mekɛ nu, kɛ neazo la saa yɛnde kpɔkɛ, yɛ rɛle bɔ anzɛɛ yɛ kulovolɛ bie wu a. (1 Tɛs. 5:14) Na yɛbahyia agɔnwolɛma kpalɛ zɛhae anwo kpole kpalɛ bɔbɔ wɔ kenle bie. (Mat. 24:21) Bie a yɛ ngyegyelɛ ne mɔ ɛnrɛvi ɛkɛ, noko saa yɛze kɛ yɛbahola yɛava yɛ nwo yɛado yɛ mediema mɔɔ bɛkulo yɛ na bɛgyi yɛ nzi la anwo zo a, ɔkola ɔmaa yɛgyinla yɛ ngyegyelɛ ne mɔ anloa.—Mrɛ. 17:17.

14. Saa esiane bie anzɛɛ edwɛkɛ bie si arɛlevilɛ nu a, kɛzi yɛ daselɛlilɛ ekpunli ne boa yɛ ɛ?

¹⁴ Ɔboa yɛ wɔ mekɛ mɔɔ esiane anzɛɛ edwɛkɛ bie bazi arɛlevilɛ nu la. Saa ewulenzane bie ba, esiane si, yɛ nwo to yɛ arɛlevilɛ nu, yɛlɛyia kpɔdekpɔdeyɛlɛ nee ezukoa nwo ngyegyelɛ a, yɛ ekpunli ne boa yɛ wɔ mekɛ mɔɔ fɛta la anu. Kɛ neazo la, wɔ asafo biala anu, Asafo Ɛzonlenlɛ Kɔmatii ne nee ekpunli zo neavolɛma ne yɛ ngyehyɛleɛ boa bɛdabɛ mɔɔ bɛlɛ ngyianlɛ fɔɔnwo bie la. Ekpunli zo neavolɛma ne dimoa kpondɛ abusua biala mɔɔ wɔ bɛ ekpunli ne anu la na bɛnea kɛ bɛbanwu ninyɛne mɔɔ bɛhyia nwo ndɛndɛ mɔɔ bie a le nyile, aleɛ, nzule, dabelɛ yɛɛ adɛladeɛ la amaa bɛava moalɛ bɛamaa bɛ. Nea ndenle ngɛnlɛma mɔɔ yɛ daselɛlilɛ ekpunli ne dua zo boa yɛ na bɛkile kɛ bɛkulo yɛ a!

15. Duzu a ka bɛdabɛ mɔɔ bɛwɔ Gyihova ahyehyɛdeɛ ne anu la amuala bɔ nu a?

¹⁵ Kɛ mɔɔ yɛlimoa yɛnwu ye la, Gyihova ahyehyɛdeɛ ne le kpole kpalɛ. Anwumabɔvolɛ nɔhavoma mgbe ɛya dɔɔnwo anzɛɛ mgbe mgbe dɔɔnwo a wɔ foa ne mɔɔ wɔ anwuma la anu a. Yɛɛ menli mɔɔ bo mgbe ngɔnla la a wɔ foa ne mɔɔ wɔ azɛlɛ ye azo la noko anu a, na bɛ nwo ɛlɛso alehyenlɛ biala. (Zɛk. 8:23; Yek. 5:11) Gyihova azonvolɛ mɔɔ wɔ anwuma nee azɛlɛ ye azo la amuala bɔ mɔdenle kɛ bɛbabɔ Nyamenle Belemgbunlililɛ ne anwo edwɛkpa ne nolo na ɛhye ka bɛ bɔ nu. (Yek. 14:​6, 7) Eza yɛyɛ biala mɔɔ yɛbahola la kɛ yɛbanyia daselɛlilɛ ekpunli ngyehyɛleɛ ne azo nvasoɛ, ɔluakɛ ɔboa yɛ ɔmaa yɛfa yɛ ahonle muala yɛye Gyihova ayɛlɛ.—Edw. 111:1.